గ్యాస్ సమస్యలు వేధిస్తున్నాయా? ఈ చెడు అలవాట్లను వెంటనే మానేయండి
గ్యాస్, కడుపు ఉబ్బరం వంటి సమస్యలు అప్పుడప్పుడు రావడం సాధారణమే. కానీ తరచూ ఇబ్బంది పెడుతూ ఉంటే వాటిని నిర్లక్ష్యం చేయకూడదు. సరైన ఆహారం, ఆరోగ్యకరమైన జీవనశైలి, క్రమం తప్పని వ్యాయామం ద్వారా ఈ సమస్యలను చాలావరకు నియంత్రించవచ్చు. లక్షణాలు ఎక్కువకాలం కొనసాగితే వైద్యులను సంప్రదించి తగిన పరీక్షలు చేయించుకోవడం ఉత్తమం..
ప్రస్తుత కాలంలో చాలా మంది గ్యాస్, కడుపు ఉబ్బరం, అజీర్ణం వంటి జీర్ణక్రియ సంబంధిత సమస్యలతో ఇబ్బంది పడుతున్నారు. సాధారణంగా ఈ సమస్యలకు తిన్న ఆహారమే కారణమని చాలా మంది భావిస్తారు. అయితే ఆరోగ్య నిపుణుల అభిప్రాయం ప్రకారం, మన రోజువారీ జీవనశైలిలోని కొన్ని చెడు అలవాట్లు కూడా ఈ సమస్యలకు ప్రధాన కారణాలుగా మారుతున్నాయి. జీర్ణవ్యవస్థ మన శరీరంలో అత్యంత కీలకమైన వ్యవస్థల్లో ఒకటి. మనం తీసుకునే ఆహారాన్ని జీర్ణం చేసి శరీరానికి అవసరమైన పోషకాలను అందించడంలో ఇది ముఖ్యపాత్ర పోషిస్తుంది. ఈ వ్యవస్థ సక్రమంగా పనిచేయకపోతే గ్యాస్, కడుపు ఉబ్బరం, అజీర్ణం, కడుపు నొప్పి వంటి సమస్యలు తలెత్తుతాయి. తరచూ ఇలాంటి సమస్యలు ఎదురవుతుంటే వాటి వెనుక ఉన్న అసలు కారణాలను తెలుసుకోవడం అవసరం.
గ్యాస్ సమస్యలకు కారణమయ్యే అలవాట్లు ఇవే
- నోయిడాలోని ఫోర్టిస్ హాస్పిటల్ గ్యాస్ట్రోఎంటరాలజీ విభాగం డైరెక్టర్ డాక్టర్ మహేష్ గుప్తా ప్రకారం, అనారోగ్యకరమైన జీవనశైలి జీర్ణవ్యవస్థపై తీవ్ర ప్రభావం చూపుతుంది.
- చాలా మంది బిజీ షెడ్యూల్ కారణంగా భోజనాన్ని ఆలస్యం చేస్తుంటారు. రెండు పూటల మధ్య ఎక్కువ గ్యాప్ ఉండటం వల్ల జీర్ణవ్యవస్థ పనితీరు దెబ్బతింటుంది. ఇది గ్యాస్, అజీర్ణ సమస్యలకు దారితీస్తుంది.
- ఆహారాన్ని సరిగా నమలకుండా త్వరగా తినడం వల్ల ఆహారంతో పాటు గాలి కూడా కడుపులోకి చేరుతుంది. దీంతో గ్యాస్, కడుపు ఉబ్బరం పెరిగే అవకాశం ఉంటుంది.
- ఫాస్ట్ ఫుడ్, అధిక మసాలా, నూనెతో తయారైన పదార్థాలు, ప్రాసెస్డ్ ఫుడ్స్ తరచూ తినడం వల్ల జీర్ణక్రియ మందగిస్తుంది. దీంతో గ్యాస్ సమస్యలు ఎక్కువవుతాయి.
- మన పేగుల్లో మంచి, చెడు బ్యాక్టీరియా సమతుల్యంగా ఉండాలి. ఈ సమతుల్యత దెబ్బతినే పరిస్థితిని “ఇంటెస్టినల్ డైస్బయోసిస్” అంటారు. ఇది గ్యాస్, ఉబ్బరం, అజీర్ణం వంటి సమస్యలకు కారణమవుతుంది.
గ్యాస్ సమస్యతో పాటు ఈ క్రింది లక్షణాలు కూడా ఉంటే నిర్లక్ష్యం చేయకూడదు.
- నిరంతర కడుపు నొప్పి
- తీవ్రమైన కడుపు ఉబ్బరం
- ఆకస్మికంగా బరువు తగ్గడం
- వాంతులు
- మలవిసర్జన అలవాట్లలో మార్పులు
- రోజువారీ పనులకు ఆటంకం కలిగించే స్థాయిలో అసౌకర్యం
ఈ లక్షణాలు ఇతర జీర్ణాశయ వ్యాధులకు సంకేతాలు కావచ్చని నిపుణులు హెచ్చరిస్తున్నారు. గ్యాస్ సమస్యను తగ్గించడానికి కొన్ని సాధారణ జీవనశైలి మార్పులు చాలా ఉపయోగపడతాయి. ప్రతిరోజూ ఒకే సమయానికి ఆహారం తీసుకోవడం జీర్ణవ్యవస్థను ఆరోగ్యంగా ఉంచుతుంది. నెమ్మదిగా తింటూ ఆహారాన్ని బాగా నమలడం వల్ల జీర్ణక్రియ సులభమవుతుంది. రోజంతా పుష్కలంగా నీరు తాగడం జీర్ణవ్యవస్థ పనితీరును మెరుగుపరుస్తుంది. పండ్లు, కూరగాయలు, ధాన్యాలు వంటి ఫైబర్ అధికంగా ఉండే ఆహారాలు జీర్ణక్రియకు మేలు చేస్తాయి. రోజూ కనీసం 30 నిమిషాలు నడక లేదా వ్యాయామం చేయడం వల్ల గ్యాస్ సమస్యలు తగ్గే అవకాశం ఉంటుంది. అధిక నూనె, మసాలాలు, ప్రాసెస్డ్ ఫుడ్స్ తీసుకోవడం తగ్గిస్తే జీర్ణవ్యవస్థ మెరుగ్గా పనిచేస్తుంది.