కరీమా మృతిపై దర్యాఫ్తునకై కెనడా పోలీసులకు భర్త హమాల్ హైదర్ అభ్యర్థన, తనకూ బెదిరింపులు అందుతున్నట్టు వెల్లడి

తన భార్య కరీమా మృతిపై దర్యాప్తు జరిపించాలని ఆమె భర్త హమాల్ హైదర్ కెనడా పోలీసులను కోరాడు.  ఆమెకు కొంతకాలంగా బెదిరింపులు అందుతున్నాయని ఆయన పేర్కొన్నాడు. కరీమా ఎంతో ధైర్యం కలిగిన మహిళ అని, యాక్టివిస్ట్ గా అంతర్జాతీయంగా ఆమెకు చాలా పేరుందని ఆయన పేర్కొన్నాడు. ఆమె మృతిపై సమగ్ర దర్యాప్తు జరపాలని కోరే హక్కు తనకు ఉందని హమాల్ హైదర్ అన్నారు. కొంతకాలంగా తనకు కూడా బెదిరింపులు అందుతున్నట్టు ఆయన తెలిపాడు. పాకిస్తాన్ లోని బెలూచిస్తాన్ లో పాక్ ఆర్మీ, ప్రభుత్వ అక్రమాలను కరీమా లోగడ అనేక సందర్భాల్లో ప్రపంచ దేశాల దృష్టికి తెచ్చింది. ఈమె గత ఆదివారం టొరొంటోలో శవమై కనిపించింది.

కాగా కరీమా మృతి అనుమానాస్పదమైనది కాదని టొరంటో పోలీసులు వెల్లడించారు. ఇది నాన్-క్రిమినల్ డెత్ అని వారు అభిప్రాయపడ్డారు. తరచు కరీమా ఈ నగరంలోని సరస్సులు, నదీ ప్రాంతాలకు వెళ్తుందనివారు చెప్పారు. అంటే బహుశా ఈమె సూసైడ్ చేసుకుందా అని భావిస్తున్నారు.