ప్రాణం తీసిన వివాహేతర సంబంధం..

అక్రమ సంబంధాలు అనర్థాలకు దారితీస్తున్నాయి. పండంటి కాపురాల్ని దెబ్బ తీస్తున్నాయి. క్షణికావేశంలో తీసుకున్న నిర్ణయాలు పచ్చని సంసారాల్లో నిప్పులు పోస్తున్నాయి. భర్త, భార్య వేరే వ్యక్తులతో పెట్టుకున్న వివాహేతర సంబంధాలు… హత్యలకు, ఆత్మహత్యలకు కారణమవుతున్నాయి. తాజాగా హైదరాబాద్ మహానగరంలో ఇలాంటి ఘటనే చోటు చేసుకుంది. వేరే వ్యక్తితో ఓ మహిళ పెట్టుకున్న వివాహేతర సంబంధం ఆమె ప్రాణం తీసింది.

ఉప్పల్ పీఎస్ పరిధి చిలకానగర్‌లో రేణుక అనే మహిళ దారుణ హత్యకు గురైంది. అదే ప్రాంతానికి చెందిన అంజయ్య, రేణుకల మధ్య కొంతకాలంగా వివాహేతర సంబంధం కొనసాగుతున్నట్లు తెలుస్తోంది. అంజయ్య భార్య పుట్టింటికి వెళ్లగా.. నిన్న రాత్రి చిలకానగర్‌లోని అంజయ్య నివాసానికి రేణుక వచ్చింది. ఈ నేపథ్యంలో రేణుకను అంజయ్య దారుణంగా హత్య చేశాడు. రేణుక తలపై బలమైన గాయాలున్నాయి. హత్యానంతరం అంజయ్య పోలీసుల ఎదుట లొంగిపోయాడు. సంఘటన స్థలానికి చేరుకున్న పోలీసులు.. కేసు నమోదు చేసి దర్యాప్తు చేపట్టారు. అయితే, ఈ హత్యకి గల కారణాలపై పోలీసులు ఆరా తీస్తున్నారు. రేణుక మృతదేహాన్ని పోస్టుమార్టం నిమిత్తం ఉస్మానియా ఆస్పత్రికి తరలించారు పోలీసులు.