కరోనా వ్యాధి నిర్ధారణకు ఎంత సమయం పడుతుందో తెలుసా..?

కరోనా వైరస్ నేపథ్యంలో ఫీవర్ హాస్పిటల్, గాంధీ, చెస్ట్ హాస్పిటల్ లో ఐసోలేషన్ ఫెసిలిటీస్ ఏర్పాటు చేసినట్లు మెడికల్ ఎడ్యుకేషన్ డైరెక్టర్ డా. రమేష్ రెడ్డి టీవీ9 కు వివరించారు. ఈ సందర్బంగా అయన మాట్లాడుతూ.. గత రెండు రోజులుగా గాంధీ హాస్పటల్ లో కరోనా డయాగ్నొస్టిక్ పరీక్షలు నిర్వహిస్తున్నట్లు తెలిపారు. అయితే ఒక టెస్ట్ కు 6 నుండి 8 గంటలు సమయం పడుతుందని డా. రమేష్ స్పష్టంచేశారు. రేపటి నుండి 24 గంటలు పని చేయాలని నిర్ణయించినట్లు.. సంబంధిత అధికారులకు ఆదేశాలు జారీ చేశామని తెలిపారు.

హైదరాబాదులోనే కాకుండా జిల్లా కేంద్రంలో ఉన్న మెడికల్ కాలేజీలలో కూడా సెంటర్ల ఏర్పాటుకు నిర్ణయం తీసుకున్నామని ఆయన అన్నారు. సిబ్బంది అంతా అప్రమత్తంగా ఉన్నామని.. కరోనా పై ప్రతి రోజు రివ్యూ మీటింగ్ నిర్వహిస్తున్నట్లు తెలిపారు. కాగా.. స్వైన్ ఫ్లూ లాగా మన ప్రాంతంలో ఎక్కువగా విస్తరించే అవకాశం లేదని, సిబ్బంది కొరత లేకుండా తగు జాగ్రత్తలు తీసుకుంటున్నట్లు డా. రమేష్ చెప్పారు.