ఆ పానెల్ లోని ఇతర సభ్యులను తొలగించండి, సుప్రీంకోర్టును కోరిన రైతు సంఘం, అఫిడవిట్ సమర్పణ

తమ డిమాండ్ల సమస్యపై తలెత్తిన సంక్షోభ పరిష్కారానికి సుప్రీంకోర్టు ఏర్పాటు చేసిన కమిటీలోని మిగతా ముగ్గురు సభ్యులను తొలగించాలని భారతీయ కిసాన్ యూనియన్ లోక్ శక్తి కోరింది. ఈ మేరకు కోర్టుకు  ఓ అఫిడవిట్ ను సమర్పించింది. పరస్పర సామరస్య ప్రాతిపదికపై తమతో చర్చించే వారితో కూడిన కమిటీని నియమించాలని ఈ సంఘం అభ్యర్థించింది. సుప్రీంకోర్టు మొదట ఏర్పాటు చేసిన పానెల్ లోని నలుగురు సభ్యుల్లో ఒకరైన భారతీయ కిసాన్ యూనియన్ జాతీయ అధ్యక్షుడు, మాజీ ఎంపీ భూపేందర్ సింగ్ మాన్ ఇందులో నుంచి వైదొలగిన సంగతి తెలిసిందే. ప్రస్తుతం ఈ కమిటీలో ఉన్న ముగ్గురు సభ్యులూ రైతు చట్టాలకు అనుకూలురేనని, వారితో తాము చర్చించే ప్రసక్తే లేదని రైతు సంఘాలు ఇదివరకే స్పష్టం చేశాయి. ఈ నెల 26 న జరిగే ట్రాక్టర్ ర్యాలీని, రైతుల నిరసనను అడ్డుకునేలా చర్యలు తీసుకోవాలంటూ ఢిల్లీ పోలీసుల తరఫున కేంద్రం ఓ ఇంజంక్షన్ ను దాఖలు చేసిన నేపథ్యంలో దీన్ని కొట్టివేయాలని కూడా సుప్రీంకోర్టును ఈరైతు సంఘం అభ్యర్థించింది. ఈ ఇంజంక్షన్ పైన, ఈ అఫిడవిట్ పైన కోర్టు సోమవారం విచారణ జరపనుంది. తాము నియమించిన కమిటీ నుంచి మాన్ నిష్క్రమించడంపై కూడా అత్యున్నత న్యాయస్థానం దృష్టి సారించనుంది.

ఇక కేంద్రంతో తాడోపేడో తేల్చుకొవాలనే నిశ్చయంతో ఉన్న రైతు సంఘాలు ఈ నెల 26 న ట్రాక్టర్ ర్యాలీని నిర్వహించాలనే దాదాపు నిర్ణయించాయి. సిఖ్ ఫర్ జస్టిస్ అనే సంస్థ కూడా ఈ సంఘాలతో చేతులు కలిపింది. దీంతో ఈ రైతుల నిరసనలో ఖలిస్తానీల జోక్యం ఉందా అని జాతీయ దర్యాప్తు సంస్థ భావిస్తోంది. సిఖ్ ఫర్ జస్టిస్ సంస్థను ఇదివరకే నిషేధించారు.