Vijayawada: విజయవాడలో మంకీపాక్స్ లేదు.. చిన్నారి నమూనాల్లో నెగటివ్ గా నిర్ధరణ
విజయవాడలో(Vijayawada) కలకలం రేపిన మంకీపాక్స్ (Monkeypox) అనుమానాస్పద కేసుపై వైద్యులు వివరణ ఇచ్చారు. చిన్నారికి ఈ వైరస్ సోకలేదని నిర్ధరించారు. దుబాయ్ నుంచి వచ్చిన ఓ చిన్నారికి మంకీఫాక్స్ వ్యాధి లక్షణాలు...
విజయవాడలో(Vijayawada) కలకలం రేపిన మంకీపాక్స్ (Monkeypox) అనుమానాస్పద కేసుపై వైద్యులు వివరణ ఇచ్చారు. చిన్నారికి ఈ వైరస్ సోకలేదని నిర్ధరించారు. దుబాయ్ నుంచి వచ్చిన ఓ చిన్నారికి మంకీఫాక్స్ వ్యాధి లక్షణాలు ఉండటంతో అధికారులు అప్రమత్తమయ్యారు. ఆమెకు వైరస్ సోకి ఉంటుందని అనుమానించారు. చిన్నారిని ఆస్పత్రికి తరలించి, నమూనాలు సేకరించారు. వాటిని పుణె (Pune) లోని వైరాలజీ ల్యాబ్‌కు పంపించారు. పరీక్షల్లో మంకీ పాక్స్ నెగెటివ్‌గా నిర్ధరణ అవడంతో అధికారులు, స్థానికులు ఊపిరి పీల్చుకున్నారు. బాలిక కుటుంబం ఇతరులతో కాంటాక్టు కాలేదని ఆరోగ్యశాఖ కమిషనర్‌ తెలిపారు. ప్రస్తుతం విజయవాడ ప్రభుత్వాస్పత్రిలో చిన్నారికి చికిత్స అందిస్తున్నారు. మంకీపాక్స్ అనేది స్మాల్ పాక్స్ కుటుంబానికి చెందిన వైరల్‌ వ్యాధి. ఇది జంతువుల నుంచి మానవులకు సోకుతుంది. స్మాల్ పాక్స్ లాగే మంకీపాక్స్ కు గురైన వ్యక్తి.. జ్వరం, తలనొప్పి, వాపు, నడుమునొప్పి, కండరాల నొప్పి, నీరసం వంటి లక్షణాలతో ఉంటారు. ముఖం, చేతులు, కాళ్లపై దద్దుర్లు, బొబ్బలు ఏర్పడతాయి.
వేగంగా విస్తరిస్తోన్న మంకీపాక్స్.. ఇప్పటికే 59 దేశాలకు పాకింది. ఈ కేసులు ఎక్కువగా యూరప్‌, ఆఫ్రికాలోనే నమోదవుతున్నట్లు ప్రపంచ ఆరోగ్య సంస్థ వెల్లడించింది. అయితే, ముఖ్యంగా స్వలింగ సంపర్కుల్లోనే ఈ కేసులు ఎక్కువగా వెలుగు చూస్తున్నాయని నిపుణులు ఆందోళన వ్యక్తం చేస్తున్నారు.
మరిన్ని ఆంధ్రప్రదేశ్ వార్తల కోసం క్లిక్ చేయండి..