రెండోరోజు ‘అటుకుల బతుకమ్మ’… వాయనంగా బెల్లం, అటుకులు!

బతుకమ్మ… తెలంగాణ ప్రజల బతుకు పండుగ. పూలకు పూజలు చేసే పండుగ. తెలంగాణ సంస్కృతీ సంప్రదాయాలకు జీవన విధానానికి ప్రతీకగా నిలుస్తుంది ఈ పండుగ. 9 రోజుల పాటు తెలంగాణలోని ప్రతీ వీధిలో ఎక్కడ చూసినా సందడే కనిపిస్తూ ఉంటుంది. సెప్టెంబరు 28న ఎంగిలిపూల బతుకమ్మతో తెలంగాణలో సంబరాలు ప్రారంభమయ్యాయి. ఇక బతుకమ్మ పండుగలో భాగంగా రెండో రోజైన శనివారం (సెప్టెంబరు 29)  ఆశ్వీయుజ మాసం ప్రారంభమవుతుంది. ఈ రోజు ‘ అటుకుల బతుకమ్మ’గా అమ్మవారిని పూజిస్తారు. దేవీ శరన్నవరాత్రులు కూాడా ఈ రోజు నుంచే ప్రారంభమవుతాయి.

బతుకమ్మను పేర్చడానికి అవసరమైన పూలకోసం ఉదయాన్నే అడవికి వెళ్లి తంగేడు , గునుగు, బంతి, చామంతి, అడవి గడ్డి పూలు తీసుకువస్తారు. ఈ పూలను రెండు ఎత్తులలో గౌరమ్మను పేర్చి, ఆడవారు అందరూ కలసి ఆడుకొని సాయంత్రం చెరువులలో నిమజ్జనం చేస్తారు. నైవేద్యంగా సప్పిడి పప్పు, బెల్లం, అటుకులు సమర్పిస్తారు. ఈ రోజు అటుకులను వాయనంగా ఇస్తారు.

బతుకమ్మ పండుగ జరిగే 9 రోజులు 9 రూపాల్లో బతుకమ్మను తయారుచేసి, పాటలు పాడుతూ భక్తిశ్రద్ధలతో ‘బతుకమ్మ’ పండుగను తెలంగాణ వ్యాప్తంగా పిల్లాపెద్ద ప్రతి ఒక్కరూ ఘనంగా జరుపుకుంటారు. వీటిలో చివరిదైన సద్దుల బతుకమ్మ పండుగ దసరాకి రెండు రోజుల ముందు వస్తుంది..