Viral Video: ఇల్లు ఊడుస్తుండగా కదిలిన వింత ఆకారం.. ఏంటని చూడగా.. బాబోయ్ కుప్పలు తెప్పలుగా..!

Snakes

ఇంటిని శుభ్రం చేస్తుంటే చిన్న చిన్న పురుగులు, కీటకాలు రావడం సహజం. అయితే, ఈ ఇంటి నుంచి మాత్రం ఒకటి కాదు రెండు కాదు.. కుప్పలు తెప్పలుగా పాములు బయటకొచ్చాయి. మొదట చిన్న పాము పిల్ల కనిపించగా.. దాని వెంటనే ఒక్కొక్కటిగా 39 పాములు బయటకొచ్చాయి. అది చూసి ఆ ఇంటి వాసుల గుండె గుభేల్‌మంది. ఆ పాములను చూసి కేకలు వేయడం వారి వంతైంది. ఇందుకు సంబంధించిన పూర్తి వవరాలు ఇలా ఉన్నాయి.

మహారాష్ట్రలోని గోండియా నగరంలో ఓ మహిళా పని మనిషి ఇంటిని శుభ్రం చేస్తోంది. ఈ క్రమంలో డోర్ పక్కకు నెట్టి ఊడుస్తోంది. ఆ తలుపు వెనక చిన్న రంద్రంలో పాము పిల్ల కనిపించింది. దెబ్బకు అదిరిపోయిన ఆ మహిళ గట్టిగా కేకలు వేస్తూ అరిచింది. వెంటనే అలర్ట్ అయిన ఇంటి యజమానులు.. ఆ పామును బయటకు తీశారు. అయితే, ఆ పామును అలా తీయడమే ఆలస్యం.. వెనువెంటనే ఒక్కొక్కటిగా పాములు బయటకు వచ్చేశాయి. అలా ఒకటి కాదు రెండు కాదు.. ఏకంగా 39 పాములు బయటకు వచ్చాయి. వాటిని చూసి బెదిరిపోయిన ఇంటి సభ్యులు.. కేకలు వేస్తూ ఇంటి బయటకు పరుగులు తీశారు. వెంటనే స్నేక్ క్యాచర్‌కు సమాచారం అందించారు.

పాములు ఉన్న ప్రాంతానికి చేరుకున్న స్నేక్ క్యాచర్.. తలుపు ఫ్రేమ్, టైల్స్ పగలగొట్టగా అందులో చాలా పాములు కనిపించాయి. కుప్పలు కుప్పలుగా ఉన్న ఆ పాములను చూసి అతను సైతం షాక్‌కు గురయ్యాడు. అయితే, నాలుగు గంటల పాటు శ్రమించి దాదాపు 39 పాములను పట్టుకున్నాడు. ఆ పాములన్నింటినీ ప్లాస్టిక్ డబ్బాలో వేసి అటవీ ప్రాంతంలోకి తీసుకెళ్లి వదిలేశాడు. కాగా, ఇంట్లో బయటకొచ్చిన ఈ పాములు.. విషపూరితమైనవి కాదని స్నేక్ క్యాచర్ పేర్కొన్నారు.

మరిన్ని హ్యూమన్‌ఇంట్రస్ట్ వార్తల కోసం ఈ లింక్ క్లిక్ చేయండి..