‘రాత్రికి రాత్రే సక్సెస్ రాదు.. వెంటనే ఫలితం రాలేదని ఆగిపోకండి’.. ఈ ఒక్క ఇటుక కథ మీ కోసమే సుమీ!
రాత్రికి రాత్రే జీవితాన్ని మార్చుకోవాలని చాలామంది కోరుకుంటారు. వెంటనే విజయం రావాలని, వెంటనే మంచి ఫలితాలు కనిపించాలని ఆశిస్తారు. కానీ గొప్ప మార్పులు ఒక్కరోజులో జరగవు. ప్రతిరోజూ వేసే చిన్న అడుగులే కాలక్రమంలో పెద్ద విజయాలుగా మారతాయి. ఈ విషయాన్ని ఫరీద్ అనే యువకుడికి అతని తాత చెప్పిన చిన్న కథ అద్భుతంగా అర్థమయ్యేలా చేసింది..
Updated on: Oct 03, 2026 | 1:05 PM
ఫరీద్ తెలివైన యువకుడు. ప్రతిభ కూడా ఉంది. కానీ అతనిలో ఓ సమస్య ఉంది. ఏ పని ప్రారంభించినా వెంటనే ఫలితం రావాలని కోరుకునేవాడు. రెండు వారాలు గిటార్ నేర్చుకున్నాడు. వెంటనే అద్భుతంగా వాయించలేకపోవడంతో ప్రాక్టీస్ మానేశాడు. తర్వాత చేతితో తయారు చేసిన వస్తువులను విక్రయించేందుకు చిన్న దుకాణం ప్రారంభించాడు. నెలరోజులు గడిచినా పెద్దగా అమ్మకాలు జరగలేదు. దీంతో ఆ ప్రయత్నాన్ని కూడా వదిలేశాడు. ఏ పని చేసినా వెంటనే ఫలితం కనిపించాలన్నదే అతని ఆలోచన. కానీ తన సమస్యకు పరిష్కారం తన తాత దగ్గరే ఉందని అతనికి తెలియదు.
తాత చెప్పిన ‘ఒక్క ఇటుక’ కథ
ఫరీద్ తాత ఒమర్ మంచి తాపీ మేస్త్రీ. దాదాపు 30 ఏళ్లుగా గోడలు నిర్మిస్తున్నాడు. అతను నిర్మించిన గోడలు ఎన్నో ప్రతికూల వాతావరణాలను తట్టుకుని నిలిచాయి. ఒకరోజు ఫరీద్ తన తాత పెరట్లో ఇటుకలు వేస్తుండటాన్ని చూశాడు. ‘తాతా.. ఈ గోడ పూర్తి కావడానికి చాలా నెలలు పడుతుంది కదా!’ అన్నాడు. ఒమర్ చిరునవ్వుతో ‘దీనికి ఎంత సమయం అవసరమో అంతే సమయం పడుతుంది’ అని సమాధానం చెప్పాడు. ‘రోజుకు ఎన్ని ఇటుకలు వేస్తావు?’ అని ఫరీద్ అడిగాడు. ‘సాధారణంగా పది. కొన్నిసార్లు పన్నెండు’ అన్నాడు తాత. అది విన్న ఫరీద్ నవ్వుతూ ‘రోజుకు పది ఇటుకలా? అది పెద్ద విషయం కాదే!’ అన్నాడు. అప్పుడు ఒమర్ ఒక ఇటుకను తీసుకుని మనవడి చేతిలో పెట్టాడు. ‘ఇది బరువుగా ఉందా?’ అని అడిగాడు. ‘లేదు’ అన్నాడు ఫరీద్. ‘ఇప్పుడు ఇలాంటి పది ఇటుకలను ప్రతిరోజూ ఒక సంవత్సరం పాటు వేస్తే ఎలా ఉంటుందో ఊహించుకో. మొదటి రోజు వేసిన పది ఇటుకలను ఎవరూ పట్టించుకోరు. కానీ ఏడాది తర్వాత అక్కడ కనిపించే గోడను మాత్రం అందరూ చూస్తారు’. ఫరీద్ మౌనంగా ఉండిపోయాడు.
అప్పుడు తాత చెప్పాడు.. ‘నువ్వు వారంలో గిటార్ నేర్చుకోవాలనుకుంటున్నావు. నెలలో వ్యాపారం విజయవంతం కావాలని కోరుకుంటున్నావు. కానీ బలమైన గోడ ఒక్కరోజులో నిర్మించబడదు. అలాగే బలమైన జీవితం కూడా ఒక్కరోజులో నిర్మించబడదు’. తాత మాటలు ఫరీద్ మనసులో బలంగా నాటుకున్నాయి. ఆ రాత్రి ఇంటికి వెళ్లిన తర్వాత ఎన్నో రోజులుగా ముట్టుకోని తన గిటార్‌ను చూశాడు. మరుసటి రోజు రెండు గంటలు ప్రాక్టీస్ చేయాలని నిర్ణయించుకోలేదు. కేవలం పది నిమిషాలు ప్రాక్టీస్ చేశాడు. తర్వాతి రోజు పన్నెండు నిమిషాలు. ఆ తర్వాత పదిహేను నిమిషాలు. అతను ప్రేరణ కోసం ఎదురు చూడలేదు. ప్రతిరోజూ తన ‘ఒక్క ఇటుక’ను మాత్రం వేస్తూ వెళ్లాడు. తాను చేస్తున్న పనులను గుర్తుంచుకోవడానికి ఒక చిన్న నోట్‌బుక్ కూడా పెట్టుకున్నాడు. ప్రతి రాత్రి ఆ రోజు ఏం చేశాడో రాసుకునేవాడు. కొన్ని రోజుల తర్వాత కూడా పెద్ద మార్పు కనిపించలేదు. కొన్ని రోజులు అతని నోట్‌బుక్‌లో ఇలా మాత్రమే ఉండేది: ‘ఈరోజు పెద్దగా ఏమీ జరగలేదు’. అయినా అతను ఆగలేదు. ఫలితం కనిపించకపోయినా ప్రయత్నం ఆపకూడదు. అతని దుకాణంలో కూడా పరిస్థితి వెంటనే మారలేదు.
ఒక వారం పాటు ఒక్క కస్టమర్ కూడా రాలేదు. దుకాణాన్ని శాశ్వతంగా మూసివేయాలని కూడా అనిపించింది. అప్పుడు అతనికి తన తాత చెప్పిన మాట గుర్తొచ్చింది. నేను గోడను ఎంత ఎత్తుకు నిర్మించానో ప్రతిరోజూ కొలవను. ఆ రోజు వేయాల్సిన ఇటుకను మాత్రమే వేస్తాను’. ఫరీద్ కూడా అదే చేశాడు. అతను తన దుకాణాన్ని కొనసాగించాడు. ప్రతిరోజూ కనీసం ముగ్గురు కస్టమర్లతో మాట్లాడాలని నిర్ణయించుకున్నాడు. వెంటనే అమ్మకం జరగకపోయినా ప్రయత్నాన్ని ఆపలేదు. రోజులు వారాలయ్యాయి. వారాలు నెలలయ్యాయి. అతని గిటార్ సాధన కూడా కొనసాగింది.
కొన్ని నెలల తర్వాత ఓ రోజు ఫరీద్ గిటార్ వాయిస్తుండగా ఓ పొరుగువాడు ఆగి ‘నువ్వు ఇంత బాగా వాయించగలవని నాకు తెలియదు’ అన్నాడు. ఫరీద్‌కు అప్పుడే తన చిన్న ప్రయత్నాల ఫలితం కనిపించింది. అతని దుకాణానికి కూడా క్రమంగా కస్టమర్లు పెరిగారు. అది ఒక్క అదృష్టపు అమ్మకం వల్ల కాదు. ప్రతిరోజూ చేసిన చిన్న ప్రయత్నాల వల్ల. కొంతకాలానికి ఫరీద్ తన తాత దగ్గరకు వెళ్లాడు. పెరట్లో తాత కట్టిన గోడ పూర్తయింది. ‘తాతా.. మీరు గోడ పూర్తి చేశారు!’ అన్నాడు. ఒమర్ నవ్వుతూ.. ‘రోజుకు పది ఇటుకలు మనం అనుకున్నదానికంటే వేగంగా పెద్ద గోడగా మారతాయి’ అన్నాడు. అప్పుడు ఫరీద్ ఇలా చెప్పాడు.. ‘చిన్న ప్రయత్నం అంటే చిన్న ఫలితమే వస్తుందని అనుకునేవాడిని. ఇప్పుడు అర్థమైంది. చిన్న ప్రయత్నాన్ని ప్రతిరోజూ కొనసాగిస్తే అదే పెద్ద ఫలితాన్ని ఇస్తుంది’. తాత తల ఊపాడు. ‘చాలామంది ప్రతిభ లేక విఫలం కావడం లేదు. వారు మొదటి ఇటుక వేసిన తర్వాత వెంటనే గోడ కనిపించాలని కోరుకుంటున్నారు. రెండో ఇటుక వేయకముందే వెళ్లిపోతున్నారు’.
1% మెరుగుదల కూడా ముఖ్యమే
మన జీవితంలోనూ ఇదే సూత్రం వర్తిస్తుంది. ఒకరోజులో మొత్తం జీవితాన్ని మార్చుకోవాల్సిన అవసరం లేదు. రోజుకు ఒక పేజీ చదవండి. రోజుకు ఒక కొత్త విషయం నేర్చుకోండి. రోజుకు కొద్దిసేపు వ్యాయామం చేయండి. రోజుకు కొంత సమయం మీ లక్ష్యానికి కేటాయించండి. రోజుకు ఒక చిన్న తప్పును సరిదిద్దుకోండి. ఈ చిన్న మార్పులు మొదటి రోజుల్లో పెద్దగా కనిపించకపోవచ్చు. కానీ వాటిని నిరంతరం కొనసాగిస్తే కొంతకాలానికి మనలోనే పెద్ద మార్పు కనిపిస్తుంది. మనం గుర్తుంచుకోవాల్సిన విషయం.. విజయం అనేది ఒక్కసారిగా జరిగే అద్భుతం కాదు. అది ప్రతిరోజూ చేసే చిన్న ప్రయత్నాల ఫలితం. మీరు ఈరోజు మీ జీవితంలోని అన్ని సమస్యలను పరిష్కరించాల్సిన అవసరం లేదు. ఈరోజు వేయాల్సిన ఒక్క ఇటుక వేయండి. రేపు మరో ఇటుక వేయండి. మీరు వేసిన ప్రతి చిన్న అడుగు మీ భవిష్యత్తుకు పునాది అవుతుంది. ఒకరోజు వెనక్కి తిరిగి చూసినప్పుడు, మీరు నిర్మించిన గోడ ఎంత ఎత్తుకు ఎదిగిందో మీరే ఆశ్చర్యపోతారు.
గుర్తుంచుకోండి.. ‘ఈ రోజు ఒక్క ఇటుక వేయండి. రేపు మరో ఇటుక వేయండి. ఒకరోజు మీరు నిర్మించిన గోడను చూసి మీరే ఆశ్చర్యపోతారు’. మీ ఎదుగుదల కనిపించడం లేదని ప్రయత్నాన్ని ఆపకండి. గోడ నిర్మాణం జరుగుతూనే ఉంది. మీరు గమనించినా, గమనించకపోయినా..
