ఎడమ చేయి లేకున్నా అమెజాన్‌లో రూ.50 లక్షలకు పైగా ప్యాకేజీ.. NIT వరంగల్ విద్యార్థి సక్సెస్ స్టోరీ
పుట్టుకతోనే ఎడమ చేయి లేకపోయినా తన లక్ష్యాన్ని చేరుకునేందుకు పట్టుదలతో కృషి చేశారు నిట్ వరంగల్ గ్రాడ్యుయేట్ సాయి భరత్. ప్రస్తుతం అమెజాన్‌లో సాఫ్ట్‌వేర్ డెవలప్‌మెంట్ ఇంజినీర్-2 (SDE-II)గా పనిచేస్తూ, రూ.50 లక్షలకు పైగా వార్షిక ప్యాకేజీతో కొలువు సాధించాడు. సాయి భరత్ స్ఫూర్తిదాయక ప్రయాణం నెటిజన్ల ప్రశంసలు అందుకుంటోంది..
హైదరాబాద్, అక్టోబర్ 12: సంకల్పం బలంగా ఉంటే శారీరక వైకల్యాలు విజయానికి అడ్డంకులు కావని నిరూపిస్తున్నారు సాయి భరత్. పుట్టుకతోనే ఎడమ చేయి లేకపోయినా తన లక్ష్యాన్ని చేరుకునేందుకు పట్టుదలతో కృషి చేసిన ఆయన.. ప్రస్తుతం ప్రముఖ అంతర్జాతీయ టెక్నాలజీ సంస్థ అమెజాన్‌లో సాఫ్ట్‌వేర్ డెవలప్‌మెంట్ ఇంజినీర్ 2 (SDE-II)గా పనిచేస్తున్నారు. ఆయన వార్షిక ప్యాకేజీ రూ.50 లక్షలకు పైనే. సాయి భరత్ విజయగాథ ప్రస్తుతం నెట్టింట చర్చనీయాంశంగా మారింది.
నిట్ వరంగల్‌లో బీటెక్.. అమెజాన్‌లో ఉద్యోగం
సాయి భరత్ 2023లో వరంగల్‌లోని నేషనల్ ఇన్‌స్టిట్యూట్ ఆఫ్ టెక్నాలజీ (NIT) నుంచి కంప్యూటర్ సైన్స్‌లో బీటెక్ పూర్తి చేశారు. పుట్టుకతోనే ఎడమ చేయి లేకపోయినా.. ఆ పరిస్థితిని తన లక్ష్యాలకు అడ్డంకిగా భావించలేదు. సాఫ్ట్‌వేర్ రంగంలో రాణించాలనే ఆశయంతో నైపుణ్యాలను పెంపొందించుకుంటూ ముందుకు సాగారు. పట్టుదల, కృషి, సాంకేతిక పరిజ్ఞానంపై పట్టు సాధించడంపై దృష్టి సారించి తన కెరీర్‌లో ముందడుగు వేశారు. ప్రస్తుతం అమెజాన్‌లో SDE-IIగా పనిచేస్తూ తన ప్రతిభను చాటుకుంటున్నారు. సోషల్ మీడియాలో అందుబాటులో ఉన్న సమాచారం ప్రకారం, ఆయన అమెజాన్ పే (Amazon Pay) యాప్‌కు సంబంధించిన పనుల్లో భాగస్వామిగా ఉన్నారు. ఈ యాప్ అమెజాన్ షాపింగ్ యాప్‌కు భిన్నంగా ప్రత్యేక అప్లికేషన్‌గా పనిచేస్తుంది.
సాయి భరత్ విజయానికి సంబంధించిన పోస్టును ఎక్స్ (గతంలో ట్విట్టర్) వినియోగదారు @VikasAlwys షేర్ చేయడంతో ఆయన ప్రయాణం పలువురి దృష్టిని ఆకర్షించింది. ఆయన లింక్డ్ఇన్ ప్రొఫైల్‌కు సంబంధించిన వివరాలు కూడా చర్చలోకి వచ్చాయి. శారీరక పరిమితులను అధిగమించి ప్రతిష్ఠాత్మక సంస్థలో ఉద్యోగం సాధించడంపై నెటిజన్లు ప్రశంసలు కురిపిస్తున్నారు. సాయి భరత్‌తో కళాశాలలో కలిసి చదువుకున్న ఓ వ్యక్తి స్పందిస్తూ.. ఆయన ఎంతో నిరాడంబరంగా, ఉల్లాసంగా ఉండేవారని, కష్టపడి పనిచేసే వ్యక్తి అని పేర్కొన్నారు.
మరో నెటిజన్ తన అనుభవాన్ని పంచుకుంటూ.. తాను సాయి భరత్ ఉంటున్న పీజీలోనే ఉండేవాడినని తెలిపారు. పెద్ద పెద్ద లగేజీ బ్యాగులతో మొదటిసారి అక్కడికి వెళ్లినప్పుడు, వాటిని లిఫ్ట్‌లో పెట్టేందుకు సాయి భరత్ సహాయం చేయడానికి ప్రయత్నించారని గుర్తుచేసుకున్నారు. ఆయన బ్యాడ్మింటన్ కూడా ఆడేవారని, ఎప్పుడూ చిరునవ్వుతో పలకరించేవారని చెప్పారు. ఆయన అమెజాన్‌లో పనిచేస్తున్న విషయం తనకు తెలియదని, సాయి భరత్ మరింత ఉన్నత స్థాయికి చేరుకోవాలని ఆకాంక్షించారు. సాయి భరత్ ప్రయాణం యువతకు, ముఖ్యంగా శారీరక వైకల్యాలతో సవాళ్లు ఎదుర్కొంటున్న వారికి ప్రేరణగా నిలుస్తోంది. వ్యక్తి సామర్థ్యాన్ని శారీరక పరిస్థితులతో మాత్రమే అంచనా వేయలేమని ఆయన విజయం గుర్తుచేస్తోంది. సరైన లక్ష్యం, నైపుణ్యాల అభివృద్ధి, నిరంతర ప్రయత్నం ఉంటే ఎన్నో అడ్డంకులను అధిగమించి అనుకున్న గమ్యాన్ని చేరుకోవచ్చనే సందేశాన్ని సాయి భరత్ ప్రయాణం అందిస్తోంది.