Credit Card: క్రెడిట్ కార్డు తీసుకున్న వ్యక్తి మరణిస్తే.. అతడి బిల్లు ఎవరు చెల్లించాలి..? బ్యాంకింగ్ రూల్స్ ఏం చెబుతున్నాయంటే..?
క్రెడిట్ కార్డు తీసుకున్న వ్యక్తి మరణిస్తే అతడి బిల్లును ఎవరు చెల్లించాలి.. కుటుంబసభ్యులపై ఆ భారం పడుతుందా.. అసలు నిబంధనలు ఏం చెబుతున్నాయి అనే ప్రశ్నలు చాలామందిలో ఉంటాయి. చాలామందికి ఈ విషయాలు తెలియవు. బ్యాంకింగ్ నిబంధనలు ఏం చెబుతున్నాయనేది చూద్దాం.
ప్రస్తుత ఆర్ధిక పరిస్ధితుల కారణంగా చాలామంది క్రెడిట్ కార్డులను ఉపయోగిస్తు్న్నారు. వ్యాపారులు, ఉద్యోగులు అనే తేడా లేకుండా అందరూ క్రెడిట్ కార్డులను యూజ్ చేస్తున్నారు. కొంతమంది సకాలంలో బిల్లు చెల్లిస్తే.. మరికొంతమంది బిల్లులు కట్టలేక సతమతమవుతుంటారు. అయితే క్రెడిట్ కార్డ్ హోల్డర్ మరణిస్తే.. బిల్లు ఎవరు చెల్లిస్తారు? అనే అనుమానం చాలామందికి ఉంటుంది. కార్డుదారుడు చనిపోతే అతడి కుటుంబం బిల్లును చెల్లించాల్సి ఉంటుందా..? బ్యాంకింగ్ నిబంధనలు ఏం చెబుతున్నాయి..? అనే విషయాలు ఇప్పుడు చూద్దాం.
నిబంధనల ప్రకారం.. కార్డుదారుడు చనిపోతే.. ఆ బిల్లు నేరుగా హోల్డర్ కుటుంబంపై పడదు. ఆ మొత్తాన్ని మొదట కార్డుదారుడి ఆస్తి నుండి చెల్లిస్తారు. బ్యాంక్ ఖాతాలు, ఫిక్స్డ్ డిపాజిట్లు, పెట్టుబడులు, ఇళ్లు, కార్లు, నామినీ లేని బీమా వంటి వాటి నుంచి తీసుకుంటారు. క్రెడిట్ కార్డ్ కేవలం మరణించిన వ్యక్తి పేరు మీద మాత్రమే ఉన్నట్లయితే.. ఆ అప్పు వారి ఆస్తి నుండి మాత్రమే వసూలు చేయస్తారు. అయితే ఉమ్మడి క్రెడిట్ కార్డ్ అయితే.. జీవించి ఉన్న ఉమ్మడి వినియోగదారుడు చెల్లించాల్సిన మొత్తం బకాయిని చెల్లించాల్సి ఉంటుంది. కేవలం అధీకృత వినియోగదారుడిగా ఉన్నంత మాత్రాన ఒక వ్యక్తి అప్పుకు వ్యక్తిగతంగా బాధ్యుడు కారు.
క్రెడిట్ కార్డ్ హోల్డర్ మరణించిన తర్వాత కుటుంబ సభ్యులు ముందుగా బ్యాంకుకు లేదా క్రెడిట్ కార్డ్ కంపెనీకి తెలియజేయాలి. కార్డును వెంటనే బ్లాక్ చేసి కొత్త లావాదేవీలు జరగకుండా నిరోధించాలి. డెత్ సర్టిఫికేట్, చట్టపరమైన వారసత్వ ధృవీకరణ పత్రం, వీలునామా లేదా అవసరమైతే వారసత్వ ధృవీకరణ పత్రం వంటి అవసరమైన పత్రాలను సమర్పించాలి. అలాగే బ్యాంకు నుండి పూర్తి బ్యాలెన్స్ స్టేట్మెంట్ను పొంది అన్ని లావాదేవీలను సరిచూసుకోవాలి. మరణించిన వ్యక్తి ఆస్తి అప్పును పూర్తిగా తిరిగి చెల్లించలేకపోతే.. బ్యాంకుతో ఒక పరిష్కారం గురించి చర్చించవచ్చు. చాలా సందర్భాలలో బ్యాంకులు ఆర్థిక పరిస్థితిని బట్టి తక్కువ మొత్తంతో ఖాతాను మూసివేస్తాయి. కొన్ని సమయాల్లో చిన్న రుణాలను మాఫీ చేయవచ్చు. కార్డుదారుడు మరణించిన తర్వాత కూడా చాలా మంది రోజువారీ ఖర్చుల కోసం కార్డులను వాడుతూనే ఉంటారు, కానీ చట్టపరంగా ఇది మోసంగా పరిగణించబడుతుంది. అలా చేయడం వల్ల చట్టపరమైన చర్యలు, నేరారోపణలు కూడా ఎదుర్కోవలసి రావచ్చు. అందువల్ల కార్డుదారుడు మరణించిన వెంటనే అన్ని కార్డులను మూసివేయాలి.