November Vegetable Farming: నవంబర్‌లో సాగు చేసే 5 కూరగాయాలు.. తక్కువ పెట్టుబడితో లక్షల్లో లాభం..!
November Vegetable Farming: మార్కెట్‌లో డిమాండ్ ఎక్కువగా ఉండే సరైన పంటలను ఎంచుకుంటే తక్కువ పెట్టుబడి, తక్కువ శ్రమతోనే అధిక దిగుబడులు, లక్షల్లో లాభాలు సాధించవచ్చు. ఓ అగ్రి ఫామ్ సూచనల మేరకు, ఈ నవంబర్‌లో మనం ఎంచుకునే కూరగాయలు రాబోయే సంక్రాంతి పండుగ..
Updated on: Nov 11, 2026 | 1:44 PM
November Vegetable Farming: నవంబర్ మాసం చలికాలపు కూరగాయల సాగుకు ఎంతో అనుకూలమైన సమయం. మార్కెట్‌లో డిమాండ్ ఎక్కువగా ఉండే సరైన పంటలను ఎంచుకుంటే తక్కువ పెట్టుబడి, తక్కువ శ్రమతోనే అధిక దిగుబడులు, లక్షల్లో లాభాలు సాధించవచ్చు. ఓ అగ్రి ఫామ్ సూచనల మేరకు, ఈ నవంబర్‌లో మనం ఎంచుకునే కూరగాయలు రాబోయే సంక్రాంతి పండుగ, పెళ్లిళ్ల సీజన్‌ను లక్ష్యంగా చేసుకుని ప్రణాళిక చేయాలి. అప్పుడే పెట్టిన ప్రతి రూపాయికి రెట్టింపు ఆదాయం వస్తుంది. నవంబర్‌లో అత్యధిక లాభాలు పొందగల ఐదు ప్రధాన కూరగాయల పంటల గురించి వివరంగా తెలుసుకుందాం.
1. క్యాలీఫ్లవర్, క్యాబేజీ:
ఈ రెండు పంటలు చలికాలపు రారాజులుగా ప్రసిద్ధి. చలి వాతావరణం వీటికి అమృతం లాంటిది. చలి తీవ్రత పెరుగుతున్న కొద్దీ గడ్డ గట్టిగా, మంచి సైజులో తెల్లగా వస్తుంది. నారు నాటిన 60 నుండి 70 రోజుల్లో కోతకు వస్తాయి. సరిగ్గా జనవరి పండగ సీజన్‌కు మార్కెట్‌లోకి వెళ్తాయి. అందుకే మంచి, స్థిరమైన ధర పలికే అవకాశం ఉంటుంది. ఉదయం పడే మంచు వల్ల ఆకు తినే పురుగు, నల్ల మచ్చ రాకుండా ముందస్తుగా వేప నూనెను పిచికారీ చేయడం ద్వారా రక్షణ కల్పించవచ్చు.
2. ఫ్రెంచ్ బీన్స్, తీగ చిక్కుడు:
శీతాకాలంలో పెళ్లిళ్లు, గృహప్రవేశాలు, శుభకార్యాలు అధికంగా ఉంటాయి. ఫంక్షన్లలో చిక్కుడు, బీన్స్ వాడకం భారీగా ఉంటుంది. హోల్‌సేల్ మార్కెట్‌లో వీటికి ఎప్పుడూ మంచి డిమాండ్ ఉంటుంది. విత్తనం నాటిన 45 నుండి 50 రోజులకే కోతలు ప్రారంభమై, దాదాపు రెండు నెలల పాటు నిరంతరం దిగుబడి వస్తూనే ఉంటుంది. డ్రిప్, మల్చింగ్ పద్ధతులతో పాటు పందిరి లేదా కర్రల ఆధారంగా సాగు చేస్తే కాయ నాణ్యత బాగుండి మార్కెట్‌లో మొదటి రకం ధర లభిస్తుంది.
3. ముల్లంగి, క్యారెట్:
ఇవి తక్కువ పెట్టుబడితో స్వల్పకాలంలో చేతికి వచ్చే దుంప పంటలు. ముల్లంగి విత్తిన 35 నుండి 40 రోజులకే పంట చేతికి వచ్చేస్తుంది. రోజువారీ ఖర్చులకు, తక్షణ నగదుకు ఇవి రైతులకు పెద్ద ఆసరా. క్యారెట్ సుమారు 75 నుండి 85 రోజుల సమయం పడుతుంది. ఈ చలికాలంలో పెరిగే క్యారెట్‌కు చక్కటి ఎరుపు రంగు, సహజమైన తీయదనం వస్తాయి. వీటిని రైజ్డ్ బెడ్ (ఎత్తైన మడుల) పై విత్తుకుంటే నేల గుల్లబారి దుంప వంకర పోకుండా పొడవుగా, లావుగా, నాణ్యంగా పెరుగుతుంది.
4. పచ్చి బఠానీ (గ్రీన్ పీస్):
శీతాకాలంలో పచ్చి బఠానీ ఒక ప్రత్యేక పంట. నవంబర్ మొదటి లేదా రెండో వారంలో ఆర్కెల్ లేదా పూస ప్రగతి వంటి రకాలు విత్తుకుంటే 60 నుండి 65 రోజుల్లో మొదటి కోత వస్తుంది. డిసెంబర్ చివర్లో లేదా జనవరి మొదట్లో స్థానిక మార్కెట్‌లో పచ్చి బఠానీకి అద్భుతమైన ధర లభిస్తుంది. అంతేకాకుండా, ఈ పంట నేలలో నత్రజనిని స్థిరీకరించి భూసారాన్ని కూడా పెంచుతుంది.
5. టమాటా, వంగ:
యాసంగి కోసం టమాటా, గ్రాఫ్టెడ్ వంగ నారు నాట్లు వేసుకోవచ్చు. నవంబర్‌లో నారు నాటుకుంటే జనవరి రెండో వారం నుండి ఫిబ్రవరి వరకు దిగుబడి పీక్ స్టేజికి వస్తుంది. ఆ సమయంలో వర్షాకాలపు పంటలు పూర్తయి, మార్కెట్‌లో సరఫరా తగ్గుతుంది. దాంతో టమాటా, వంగ ధరలు పుంజుకునే అవకాశం పుష్కలంగా ఉంటుంది. డ్రిప్ ఇరిగేషన్, మల్చింగ్ పేపర్ వేసి సాగు చేస్తే కలుపు సమస్య ఉండదు. తేమ ఆరిపోదు. రసం పీల్చే పురుగుల నివారణకు పొలంలో పసుపు, నీలి జిగురు రంగు అట్టలు ఏర్పాటు చేసుకుంటే చాలా మటుకు రోగాలను నియంత్రించవచ్చు.
ఇది కూడా చదవండి: Multibagger Stock: రూ.1 లక్షను రూ.6.5 లక్షలు చేసిన షేర్.. 2026లో ఏకంగా 500 శాతానికిపైగా రాబడి!
చిట్కా: ప్రధాన పంటల బెడ్స్ అంచుల్లో లేదా ఖాళీ జాగాల్లో కొత్తిమీర, పాలకూర, మెంతికూర వంటి ఆకుకూరలు చల్లుకోండి. 25 నుండి 30 రోజుల్లోనే కోతకు వస్తాయి. ప్రధాన పంట నుండి ఆదాయం వచ్చేలోపే మీ పొలం ఖర్చులు, కూలీల ఖర్చులు ఈ ఆకుకూరలే తీర్చేస్తాయి. సరైన పంటల ఎంపిక, సకాలంలో సస్యరక్షణ చర్యలు పాటిస్తే తక్కువ విస్తీర్ణంలోనే చక్కటి లాభాలు సాధించవచ్చు.
ఇది కూడా చదవండి: Biryani Business: రూ.99 బిర్యానీ.. ఓనర్‌కు రోజుకు ఎంత లాభం వస్తుంది? ఇలా చేస్తేనే సక్సెస్‌.. లేకుంటే నష్టమే..!
ఇది కూడా చదవండి: Indian Railways: రైలు ప్రయాణికులకు అలర్ట్.. ఇక ఈ రైళ్లకు తత్కాల్ టికెట్లు ఉండవు.. కొత్త రూల్స్ ఇవే!
మరిన్ని బిజినెస్ వార్తల కోసం ఇక్కడ క్లిక్ చేయండి
