లాంగ్ డ్రైవ్ చేసే ఎలక్ట్రిక్ వాహనదారులకు గుడ్ న్యూస్.. ముందే ఛార్జింగ్ స్లాట్ బుకింగ్!

Electric Vehicle Range Charging Station

భారతదేశంలో ఎలక్ట్రిక్ వాహనాల (EV) సంఖ్య రోజురోజుకూ వేగంగా పెరుగుతోంది. పర్యావరణహితం, తక్కువ ఖర్చు కావడంతో చాలామంది ఈవీల వైపు మొగ్గు చూపుతున్నారు. అయితే, నగరాల్లో తిరిగేటప్పుడు ఎలాంటి ఇబ్బంది లేకపోయినా, సుదీర్ఘ ప్రయాణాల (లాంగ్ డ్రైవ్స్) విషయానికి వస్తే మాత్రం.. మధ్యలో ఛార్జింగ్ ఎక్కడ పెట్టుకోవాలి? ఎలా రీఛార్జ్ చేసుకోవాలి? అనేదే ఈవీ వాహనదారుల ముందున్న అతిపెద్ద సమస్య.

బ్యాటరీ అయిపోతుందనే ఈ భయాన్నే సాంకేతిక భాషలో ‘రేంజ్ యాంగ్జయిటీ’ (Range Anxiety) అంటారు. ఈ భయాన్ని పోగొట్టి, ఈవీ డ్రైవర్లు తమ సుదీర్ఘ ప్రయాణాలను సులభంగా ప్లాన్ చేసుకోవడానికి ఇప్పుడు మార్కెట్లోకి అనేక మొబైల్ యాప్‌లు అందుబాటులోకి వచ్చాయి. ఈ యాప్స్ హైవే ప్రయాణాలలో ఛార్జింగ్ స్టేషన్‌ను కనుగొనడానికి అద్భుతంగా సహాయపడుతున్నాయి.

పాపులర్ ఈవీ ఛార్జింగ్ యాప్‌లు:

భారతదేశంలో సుదూర ప్రయాణాలు చేసే ఈవీ యజమానులు ఎక్కువగా ప్లగ్‌షేర్ (PlugShare), స్టాటిక్ (Statiq), టాటా పవర్ ఈజీ ఛార్జ్ (Tata Power EZ Charge), ఛార్జ్‌జోన్ (ChargeZone) వంటి యాప్‌లను ఉపయోగిస్తున్నారు. ఇవి ప్రయాణ మార్గంలో ఉన్న అన్ని ఛార్జింగ్ పాయింట్లను ఒకే చోట చూపిస్తాయి. వాటిలో ఏ ఛార్జర్‌లు ప్రస్తుతం అందుబాటులో ఉన్నాయి, వేటి దగ్గర వెయిటింగ్ టైమ్ తక్కువగా ఉంది, ఏవి ఫాస్ట్ ఛార్జింగ్‌కు సపోర్ట్ చేస్తాయి అనే పూర్తి రియల్-టైమ్ సమాచారాన్ని ఇవి అందిస్తాయి.

రూట్ ప్లానింగ్ చాలా ఈజీ!

ఈ యాప్‌లలో అత్యంత ముఖ్యమైన ఫీచర్ ‘రూట్ ప్లానింగ్’. మీ కారు బ్యాటరీ సామర్థ్యం ఆధారంగా, మీరు వెళ్లే దారిలో ఎక్కడ ఆగి రీఛార్జ్ చేసుకోవాలో ఈ యాప్స్ ముందే రూట్ మ్యాప్ ఇస్తాయి. ఉదాహరణకు, మీరు ఢిల్లీ నుండి జైపూర్‌కు లేదా ముంబై నుండి పూణేకు ప్రయాణిస్తుంటే, మీ కారు బ్యాటరీ అయిపోకముందే సురక్షితమైన ప్రదేశంలో ఉన్న ఛార్జింగ్ స్టేషన్‌ను ఇది సూచిస్తుంది.

అడ్వాన్స్ బుకింగ్ ఫీచర్లు

ఈ యాప్‌లు కేవలం స్టేషన్ల లొకేషన్లు చూపించడమే కాకుండా, అక్కడ ఉన్న ఛార్జర్ రకం ఫాస్ట్ DC లేదా స్లో AC, ఆ స్టేషన్ తెరిచి ఉండే సమయం, బిల్లింగ్ చెల్లింపుల వివరాలను కూడా అందిస్తాయి. కొన్ని యాప్‌లలో అయితే ఒక అడుగు ముందుకు వేసి, మనం అక్కడికి చేరుకునే సమయానికి స్లాట్‌ను ముందే బుక్ (Pre-book) చేసుకునే సదుపాయం కూడా ఉంది. దీనివల్ల స్టేషన్‌కు వెళ్లాక క్యూలో వేచి ఉండాల్సిన అవసరం అస్సలు ఉండదు.

సవాళ్లు – తీసుకోవాల్సిన జాగ్రత్తలు:

ఇన్ని డిజిటల్ ప్రయోజనాలు ఉన్నప్పటికీ, భారతదేశంలో ఈవీ ఛార్జింగ్ నెట్‌వర్క్ ఇంకా పూర్తిస్థాయిలో అందుబాటులోకి రాలేదు. కొన్నిసార్లు యాప్‌లో పనిచేస్తున్నట్టు చూపించే స్టేషన్లు, అక్కడికి వెళ్లాక సాంకేతిక లోపాల వల్ల పని చేయకపోవచ్చు. అందుకే అనుభవజ్ఞులైన ఈవీ డ్రైవర్లు కేవలం ఒకే యాప్‌పై ఆధారపడకుండా, తమ ఫోన్లలో 2-3 రకాల యాప్‌లను బ్యాకప్‌గా ఉంచుకుంటారు. ఏదేమైనా, ఈ సరికొత్త యాప్‌ల పుణ్యమా అని ఈవీలపై లాంగ్ డ్రైవ్ వెళ్లడం గతంలో కంటే ఇప్పుడు చాలా సులభంగా, నమ్మకంగా మారింది.

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..