మరో మూడు, నాలుగు రోజులు తేలికపాటి వర్షాలు..!

రాబోయే మూడు నాలుగు రోజుల్లో తెలంగాణలో తేలికపాటి నుండి ఓ మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం డైరెక్టర్ నాగరత్నం తెలిపారు. ప్రస్తుతం దక్షిణ కోస్తా ఆంధ్ర మీదుగా 1.5 కిలోమీటర్ల నుండి 3.6 కిలోమీటర్ల ఎత్తు వద్ద ఉపరితల ఆవర్తనం ఏర్పడిందన్నారు. మరోక ఉపరితల ఆవర్తనం మరాట్వాడా ప్రాంతంలో 3.1 కి.మీ లో కేంద్రీకృతమైందని, ద్రోణి ఒకటి మధ్యప్రదేశ్ నుండి మహారాష్ట్ర వరకు కొనసాగుతోందని నాగరత్నం వెల్లడించారు. అయితే షీర్ జోన్ బలహీనపడిందని దీని ప్రభావంతో తెలంగాణ వ్యాప్తంగా ఒకటి రెండు చోట్ల భారీ వర్షాలు పడే అవకాశముందని హెచ్చరించారు. గంటకు 30 నుంచి 40 కిలో మీటర్ల వేగంతో ఈదురు గాలులు వీచే అవకాశముందన్నారు. అటు సంగారెడ్డి, మెదక్, సిద్దిపేట, వికారాబాద్, యాదాద్రి, మహబూబ్ నగర్, వనపర్తి, జనగాం, నల్గొండ, జయశంకర్ భూపాలపల్లి, భద్రాచలం ఖమ్మం జిల్లాల్లో భారీ వర్షాలు పడే అవకాశముందని హైదరాబాద్ వాతావరణ శాఖ వెల్లడించింది.