బిగ్ న్యూస్ బిగ్ డిబేట్: బడ్జెట్ చర్చ.. ఏపీ రచ్చ

ఏపీ క్యాపిటల్ ఫైట్ హస్తినకు మారింది. పార్లమెంట్ అఖిలపక్ష సమావేశంలో టీడీపీ-వైసీపీ మధ్య వాగ్వాదం చోటుచేసుకుంది. రాజధానికోసం ఏకంగా మండలిని రద్దు చేయాలని చూస్తున్నారని టీడిపి ఆరోపించింది. మండలి రద్దుకు బ్రేక్ వేసే పనిలో టీడీపీ ఉంది. దీనిపై వైసీపీ రాజ్యసభ ఎంపీ విజయసాయి రెడ్డి, లోక్‌సభ ఎంపీ మిథున్ రెడ్డి స్పందించారు. రాజధాని మార్పు రాష్ట్రానికి సంబంధించిన విషయమని విజయసాయిరెడ్డి పేర్కొన్నారు. అయితే రద్దు ప్రక్రియ ఆగేది లేదని వైసిపి ఎంపీలు తెలిపారు. రాజధాని విభజనపైనా చర్చించాలని టీడీపీ పట్టుబడుతోంది. మండలి రద్దు అంత సులువుకాదు టీడీపీ ఎంపీ కనకమేడల తెలిపారు. వైసిపి ఎంపీల వైఖరిని రాజ్ నాథ్ ఖండించారని అయన అన్నారు. వ్యూహ ప్రతివ్యహాలతో ఇరు పార్టీల ఎంపీలు హల్ చల్ చేస్తున్నారు.

మరోసారి తెరపైకి ప్రత్యేక హోదా అంశం వచ్చింది. గురువారం ఢిల్లీలో జరిగిన అఖిలపక్షం సమావేశంలో భాగంగా వైసీపీ పలు అంశాలను లేవనెత్తారు. రాష్ట్రానికి సంబంధించి తొమ్మిది అంశాలను లేవనెత్తినట్లు వైసీపీ రాజ్యసభ సభ్యులు విజయసాయిరెడ్డి తెలిపారు. రెవెన్యూ లోటు గ్రాంట్ కింద.. రాష్ట్రానికి రావాల్సిన రూ.18,969 కోట్ల బకాయిలు విడుదల చేయాలని కోరినట్లు తెలిపారు. అంతేకాకుండా.. వెనకబడిన జిల్లాలకు రూ. 23 వేల కోట్లు.. పోలవరం ప్రాజెక్టుకు రాష్ట్ర ప్రభుత్వం ఖర్చు చేసిన రూ. 3,283 కోట్ల రూపాయలను కేంద్రం రీయింబర్స్మెంట్ చేయాలని అడిగినట్లు చెప్పారు. అంతేకాకుండా.. పోలవరం ప్రాజెక్టు సవరించిన అంచనా వ్యయం రూ. 55,548 కోట్లను ఆమోదించాలని… క్యాపిటల్ సిటీ డెవలప్మెంట్ గ్రాంట్ కింద రూ. 47,424 కోట్లు ఇవ్వాలని సమావేశంలో ప్రస్తావించామన్నారు. దుగ్గరాజపట్నం పోర్ట్‌కి బదులుగా రామాయపట్నం పోర్టు, కడప స్టీల్ ప్లాంట్‌కు కేంద్ర ప్రభుత్వం ఆర్థిక సహాయం చేయాలని.. రాష్ట్రానికి పారిశ్రామిక ప్రోత్సాహకాలు, పన్ను రాయితీలు కల్పించాలని… అంతేకాకుండా.. రాష్ట్రానికి ప్రత్యేక హోదా ఇవ్వాలని విజ్ఞప్తి చేసినట్లు విజయసాయిరెడ్డి తెలిపారు.