బడ్జెట్ 2019 : ఆర్థిక మంత్రి బ్యాగ్‌పై చిదంబరం కామెంట్

బడ్జెట్ సమావేశాల ప్రారంభం రోజు ఆర్థికశాఖ మంత్రులు బ్రీఫ్ కేసుతో పార్లమెంటుకు రావడం గతంలో మనం ఎప్పుడూ చూస్తూ ఉంటాం. కానీ ప్రస్తుత ఆర్థికమంత్రి నిర్మలా సీతారామన్ న్యూ ట్రెండ్ సెట్ చేశారు. నేడు పార్లమెంటులో బడ్జెట్ ప్రవేశపెట్టిన ఆమె.. బడ్జెట్ పద్దులను ఓ ఎర్రటి జూట్ బ్యాగ్‌లో తీసుకొచ్చారు. దాన్ని బహీఖాతా అని పిలుస్తారు. నిర్మలా చేతిలో ఆ బ్యాగ్ ఈ రోజు చాలా చర్చ జరిగింది. ఈ నేపథ్యంలో మాజీ కేంద్ర ఆర్థికమంత్రి, కాంగ్రెస్ సీనియర్ నేత చిదంబరం దీనిపై స్పందించారు.

భవిష్యత్తులో కాంగ్రెస్ పార్టీ అధికారంలోకి వస్తే.. తమ ఆర్థికమంత్రి ఐపాడ్‌తోనే బడ్జెట్‌ను ప్రవేశపెడుతారని చిదంబరం అన్నారు. నిర్మలా సీతారామన్ బడ్జెట్‌పై స్పందిస్తూ చిదంబరం ఈ కామెంట్ చేశారు. చిదంబరం కామెంట్ ఇలా ఉంటే ప్రభుత్వ ప్రధాన ఆర్థిక సలహాదారు మాత్రం నిర్మలా సీతారామన్ తీసుకొచ్చిన ఆ బ్యాగ్.. భారతీయ సాంప్రదాయాన్ని ప్రతిబింబించేందుకే అని స్పష్టం చేశారు.