యువత రీల్స్ పిచ్చి వ్యసనంగా మారుతోంది. తామేం చేస్తున్నామో, అది ఎంతటి ప్రమాదానికి దారి తీస్తుందోననే స్పృహ లేకుండా రీల్స్ చేయడంలో మునిగిపోతున్నారు. ఒక్కోసారి ప్రాణాలమీదకు తెచ్చుకుంటున్నారు.. కొన్ని సందర్భాల్లో ప్రాణాలే కోల్పోతున్నారు. తాజాగా షార్ట్ వీడియో చిత్రీకరణ కోసం ఓ యువతి మరో యువకుడి సాయంతో అత్యంత ప్రమాదకరమైన రీతిలో భవంతిపై నుంచి వేలాడింది. ఈ వీడియో నెట్టింట కలకలం రేపడంతో రంగంలోకి దిగిన పోలీసులు యువతి, ఆమెకు సహకరించిన వారిపై కేసు నమోదు చేశారు. పూణెలో ఈ ఘటన వెలుగు చూసింది. తమ పిడికిలి శక్తి ఎంత ఉందో పరీక్షించేందుకు యువతీయువకులు ఈ ప్రాణాంతక స్టంట్‌కు పూనుకున్నారు. ఓ యువకుడు యువతి చేయి పట్టుకుని భవనంపై నుంచి 100 అడుగుల ఎత్తున వేలాడదీశాడు. పూణెలోని స్వామి నారాయణ్ టెంపుల్‌లో రీల్‌ను చిత్రీకరించినట్టు తెలుస్తోంది. ఈ స్టంట్‌ను అన్ని కోణాల నుంచి చిత్రీకరించేందుకు వారు ఏకకాలంలో పలు కెమెరాలను కూడా వినియోగించారు. ఒకరు మేడ పైనుంచి, మరొకరు నేలపై నిలబడి రికార్డు చేశారు. మరోవ్యక్తి, యువతిని పట్టుకున్న యువకుడి పక్కనే బోర్లాపడుకుని వీడియోను రికార్డు చేశాడు. ఈ ఘటనకు సంబంధించి కేసు నమోదు చేసినట్టు పోలీసులు తెలిపారు. ప్రాణాపాయం కలిగేలా నిర్లక్ష్యంగా వ్యవహరించిన నేరం కింద కేసు నమోదు చేసినట్టు వెల్లడించారు.
మరిన్ని వైరల్ వీడియోల కోసం ఇక్కడ క్లిక్ చేయండి
Also Watch: