భీమేశ్వరాలయ సమీపంలో అరుదైన శ్వేతనాగు.. ప్రత్యక్షం

రాజన్న సిరిసిల్ల జిల్లాలోని ప్రముఖ పుణ్యక్షేత్రం, దక్షిణ కాశీగా భక్తులచే పూజలందుకునే వేములవాడ శ్రీ రాజరాజేశ్వర స్వామి దేవస్థానంలో ఒక అరుదైన దృశ్యం వెలుగుచూసింది. స్వామివారి అనుబంధ ఆలయమైన భీమేశ్వరస్వామి ఆలయ పరిసర ప్రాంతాల్లో సుమారు ఐదడుగుల భారీ శ్వేతనాగు ప్రత్యక్షమైంది. తెల్లని ఆ నాగుపామును చూసి భక్తులు ఒక్కసారిగా ఆశ్చర్యానికి గురయ్యారు. ప్రస్తుతం వేసవి సెలవుల కారణంగా వేములవాడ క్షేత్రం భక్తుల రద్దీతో కిటకిటలాడుతోంది. ఈ క్రమంలో భీమేశ్వరాలయ ప్రహరీ సమీపంలో శ్వేతనాగు స్వేచ్ఛగా సంచరిస్తూ కనిపించింది. సాధారణంగా జనావాసాల్లో, మైదాన ప్రాంతాల్లో శ్వేతనాగులు కనిపించడం అత్యంత అరుదు. ఇవి దట్టమైన అటవీ ప్రాంతాల్లో మాత్రమే జీవిస్తుంటాయి. అలాంటిది సాక్షాత్తు పరమశివుని ఆలయ సన్నిధిలో, అది కూడా భీమేశ్వరుని గుడి వద్ద ఈ శ్వేతనాగు దర్శనమివ్వడం స్వామివారి మహిమేనని భక్తులు నమ్ముతున్నారు. సుమారు అరగంట పాటు ఎవరికీ ఎలాంటి హాని చేయకుండా ఆ పాము అక్కడే తిరుగుతూ ఉంది. ఆలయ సిబ్బంది సమాచారం అందించడంతో వేములవాడకు చెందిన ప్రముఖ స్నేక్ క్యాచర్ జగదీశ్ హుటాహుటిన అక్కడికి చేరుకున్నారు. ఆయన అత్యంత చాకచక్యంగా ఆ శ్వేతనాగును పట్టుకున్నారు. అనంతరం దానిని సురక్షితంగా దట్టమైన అటవీ ప్రాంతంలో వదిలిపెట్టారు. ఇటీవలి కాలంలో భీమేశ్వర ఆలయ పరిసరాల్లో పాముల సంచారం ఎక్కువవడంతో భక్తులు కాస్త ఆందోళన వ్యక్తం చేస్తున్నారు. ఆలయ అధికారులు దీనిపై దృష్టి సారించి భక్తులకు రక్షణ కల్పించాలని కోరుతున్నారు. కాగా, వేసవి తీవ్రత ఎక్కువగా ఉండటం వల్లే భూగర్భంలోని వేడిని తట్టుకోలేక పాములు బయటకు వస్తుంటాయని స్నేక్ క్యాచర్ జగదీశ్ తెలిపారు. ఎక్కడైనా పాములు కనిపిస్తే వాటిని చంపకుండా, తమలాంటి నిపుణులకు సమాచారం అందించాలని ఆయన ప్రజలను కోరారు. ప్రస్తుతం ఈ శ్వేతనాగుకు సంబంధించిన విజువల్స్ నెట్టింట విపరీతంగా వైరల్ అవుతున్నాయి.

మరిన్ని వీడియోల కోసం ఇక్కడ క్లిక్ చేయండి

Also Watch:

కుక్కను వెంబడిస్తూ వెళితే.. బయటపడిన 18 వేల ఏళ్ల రహస్య ప్రపంచం