రెండు చేతులూ కోల్పోయినా ధైర్యం వీడలేదు..
మంచిర్యాల జిల్లా మందమర్రికి చెందిన కుంజు వినోద్ కుమార్ జీవితం ఎంతోమందికి స్ఫూర్తిదాయకం. 2015లో 11 కేవీ విద్యుత్ షాక్తో రెండు చేతులు కోల్పోయినా వెనక్కి తగ్గలేదు. కృత్రిమ చేతులతో తిరిగి వెల్డింగ్ పనిలోకి అడుగుపెట్టి భార్య, ఇద్దరు పిల్లలను పోషిస్తున్నాడు. సొంతంగా వెల్డింగ్ షాప్ ఏర్పాటు చేసుకోవాలన్నది ఆయన కల. ప్రభుత్వం, దాతలు సహకరిస్తే తన కలను సాకారం చేసుకోవాలని ఆశిస్తున్నాడు.
జీవితం అందరికీ పూలబాట పరచదు.. కొన్నిసార్లు కఠినమైన పరీక్షలు పెడుతుంది. రెక్కాడితే గానీ డొక్కాడని నిరుపేద కుటుంబానికి చెందిన మందమర్రికి చెందిన కుంజు వినోద్ కుమార్ జీవితంలోనూ విధి అలాంటిదే ఓ విషాదాన్ని నింపింది. ఐటీఐ పూర్తి చేసి వెల్డింగ్ పని చేస్తూ కుటుంబానికి అండగా ఉంటున్న వినోద్కు, 2015లో జరిగిన ఒక విద్యుత్ ప్రమాదం కోలుకోలేని దెబ్బతీసింది. భవనంపై పనిచేస్తున్న సమయంలో 11 కేవీ విద్యుత్ తీగలు తగలడంతో తీవ్రమైన షాక్కు గురై తన రెండు చేతులనూ కోల్పోయాడు. కళ్లముందే భవిష్యత్తు చీకటైనా, కుటుంబాన్ని పోషించాల్సిన చేతులే కరువైనా అతడు ఏమాత్రం కుంగిపోలేదు. కన్నీళ్లతో కాలం వెళ్లదీయకుండా బతకాలన్న కసితో వినోద్ అడుగు ముందుకు వేసాడు. కృత్రిమ చేతులను అమర్చుకుని తిరిగి తన పాత వృత్తిలోకి అడుగుపెట్టాడు. ఐటీఐలో నేర్చుకున్న నైపుణ్యంతో ఒక వెల్డింగ్ షాపులో పనిచేస్తూ భార్య, ఇద్దరు పిల్లలను పోషించుకుంటున్నాడు. శరీరం సహకరించకపోయినా పిల్లల భవిష్యత్తు కోసం ప్రతిరోజూ ఎంతగానో కష్టపడుతున్నాడు. మరొకరి దగ్గర కూలీగా పనిచేసే పరిస్థితి నుంచి బయటపడి, సొంతంగా ఓ వెల్డింగ్ షాప్ పెట్టుకోవాలన్నదే ఆయన ప్రధాన కల. ఆర్థిక స్థోమత లేక ఇబ్బంది పడుతున్న వినోద్కు ప్రభుత్వాలు లేదా దాతలు ఆసరాగా నిలిస్తే, ఆయన తన కాళ్లపై తాను నిలబడగలడు. రెండు చేతులు లేకున్నా ఆత్మస్థైర్యంతో సాగుతున్న వినోద్ ప్రయాణం ఎంతోమందికి స్ఫూర్తిదాయకం.
మరిన్ని వీడియోల కోసం ఇక్కడ క్లిక్ చేయండి
Also Watch:
Inspiring Mother: చెత్త బండే అమ్మ ఒడి!..బిడ్డల కోసం స్టీరింగ్ పట్టిన యువతి!
NHAI: వాహనదారులకు బిగ్ అలర్ట్.. ఇన్సూరెన్స్ లేని వాహనాలకు భారీగా ఫైన్!
New Building Rules: బిల్డింగ్ రూల్స్ మారుతున్నాయ్..ఇల్లు కట్టుకోవడం ఇక ఈజీ..
Samantha: గాయత్రీ హోమ ఫలితం.. పండంటి మగ బిడ్డకు జన్మనిచ్చిన సమంత
