Weather Update: ఆ.. 17 రాష్ట్రాలకు హై అలర్ట్‌.. ఆకాశం నుండి ఊడిపడనున్న గండం

ఎండల తీవ్రతతో అల్లాడిపోతున్న కోట్లాది మంది భారతీయులకు భారత వాతావరణ శాఖ సంచలన వార్త చెప్పింది. ఎండల నుంచి ఊరటతో పాటే ఒక పెను ప్రమాదం కూడా పొంచి ఉందా? అవును, మీరు విన్నది నిజమే! దేశవ్యాప్తంగా నరకప్రాయమైన ఎండలు, వడగాల్పులతో సతమతమవుతున్న జనాలకు ఉపశమనం కలిగిస్తూ నైరుతి రుతుపవనాలు ఎట్టకేలకు భారత భూభాగాన్ని తాకాయి. కేరళ తీరాన్ని రుతుపవనాలు ముంచెత్తుతున్నాయి. అయితే, ఇది కేవలం సాధారణ వర్షం కాదు. రాబోయే 24 నుండి 48 గంటల్లో దేశంలోని ఏకంగా 17 రాష్ట్రాలలో ప్రకృతి తన విశ్వరూపాన్ని చూపించబోతోంది. వాతావరణ శాఖ ఒకేసారి 17 రాష్ట్రాలకు భారీ వర్షాలు, ఈదురుగాలులు, పిడుగుపాట్ల హెచ్చరికలను జారీ చేసింది. కొన్ని ప్రాంతాలలో భీకరమైన ఈదురుగాలులు వీయబోతున్నాయని, ఆకాశం నుండి వడగండ్ల వాన కురిసే ప్రమాదం ఉందని IMD శాస్త్రవేత్తలు ప్రకటించారు. అసలు ఈ రుతుపవనాల గమనం ఎలా ఉంది? కేరళలో ఎలాంటి పరిస్థితులు ఉన్నాయి? ఆ 17 రాష్ట్రాల జాబితాలో మీ రాష్ట్రం ఉందా? మీ జిల్లాలో ఈ రాత్రికి వర్షం పడబోతోందా లేదా? తెలుగు రాష్ట్రాలైన ఆంధ్రప్రదేశ్, తెలంగాణలకు ఎలాంటి ముప్పు పొంచి ఉంది? దిల్లీ, యూపీ, రాజస్థాన్ లలో రాబోయే గంటల్లో ఎలాంటి వాతావరణ మార్పులు జరగబోతున్నాయి? ముందుగా మనం రుతుపవనాల రాక గురించి మాట్లాడుకుంటే, భారతదేశ ఆర్థిక వ్యవస్థకు, వ్యవసాయానికి వెన్నెముక లాంటి నైరుతి రుతుపవనాలు ఎట్టకేలకు కేరళ తీరాన్ని తాకాయి. సాధారణంగా జూన్ మొదటి వారంలో వచ్చే రుతుపవనాలు, ఈసారి కచ్చితమైన సమయానికి కేరళలో అడుగుపెట్టాయి. కేరళలోని అత్యధిక ప్రాంతాలలో గత 24 గంటలుగా ఎడతెరిపి లేకుండా వర్షాలు కురుస్తున్నాయి. భారత వాతావరణ శాఖ తెలిపిన వివరాల ప్రకారం.. కేరళలోని తిరువనంతపురం, కొల్లాం, పతనంతిట్ట, అలప్పుజ, కొట్టాయం, ఇడుక్కి, ఎర్నాకుళం, మరియు త్రిసూర్ జిల్లాలలో వాతావరణం అత్యంత భీకరంగా మారింది. ఈ జిల్లాలకు వాతావరణ శాఖ ‘ఆరెంజ్ అలర్ట్’ జారీ చేసింది. అంటే ఇక్కడ 7 నుండి 20 సెంటీమీటర్ల మేర అత్యంత భారీ వర్షాలు కురిసే అవకాశం ఉంది. కేరళలోని మత్స్యకారులను ఎట్టిపరిస్థితుల్లోనూ సముద్రంలోకి వెళ్లవద్దని ప్రభుత్వం హెచ్చరించింది. సముద్రం విపరీతంగా అల్లకల్లోలంగా ఉందని, రాబోయే ఐదు రోజుల పాటు కేరళ అంతటా ఇవే పరిస్థితులు కొనసాగుతాయని వాతావరణ కేంద్రం స్పష్టం చేసింది. కేరళ తీరాన్ని తాకిన ఈ రుతుపవనాలు శరవేగంగా దేశంలోని ఇతర భాగాలకు విస్తరిస్తున్నాయి. దీని కారణంగానే దేశంలోని మిగిలిన రాష్ట్రాలలో వాతావరణం ఒక్కసారిగా మారిపోయింది. ఇప్పుడు అందరినీ వణికిస్తున్న అసలు విషయానికి వద్దాం. వాతావరణ శాఖ ఒకేసారి 17 రాష్ట్రాలకు ఎందుకు అలర్ట్ ఇచ్చింది? ఆ 17 రాష్ట్రాలు ఏవి? అక్కడ ఏం జరగబోతోంది? అనే వివరాలను చూద్దాం.. IMD శాస్త్రవేత్తల ప్రకారం, కేరళలో రుతుపవనాలు ప్రవేశించడంతో పాటు, ఉత్తర, మధ్య భారతంలో ఒక బలమైన ఉపరితల ఆవర్తనం ఏర్పడ్డాయి. ఈ రెండు వాతావరణ పరిస్థితులు ఒకేసారి కలవడం వల్ల దేశవ్యాప్తంగా విపరీతమైన మార్పులు సంభవిస్తున్నాయి. వాతావరణ శాఖ అలర్ట్ జారీ చేసిన ఆ 17 రాష్ట్రాల జాబితాను ఒకసారి పరిశీలిస్తే.. కేరళ, కర్ణాటక, తమిళనాడు, ఆంధ్రప్రదేశ్, తెలంగాణ, మహారాష్ట్ర, రాజస్థాన్, పంజాబ్, హర్యానా, దిల్లీ, ఉత్తర ప్రదేశ్, మధ్య ప్రదేశ్, బీహార్, జార్ఖండ్, పశ్చిమ బెంగాల్, ఉత్తరాఖండ్, హిమాచల్ ప్రదేశ్ రాష్ట్రాలు ఉన్నాయి. ఈ 17 రాష్ట్రాలలో రాబోయే 24 నుండి 48 గంటల పాటు తీవ్రమైన ఉరుములు, మెరుపులతో కూడిన వర్షాలు పడతాయని, కొన్ని చోట్ల వడగండ్ల వాన కురిసే అవకాశం ఉందని ఐఎండి హెచ్చరించింది. ముఖ్యంగా మైదాన ప్రాంతాలలో గంటకు 50 నుండి 60 కిలోమీటర్ల వేగంతో, కొన్ని చోట్ల వినాశకరమైన ఈదురుగాలులు వీచే ప్రమాదం ఉందని శాస్త్రవేత్తలు చెబుతున్నారు. ఈ గాలుల తీవ్రత ఎంత ఎక్కువగా ఉంటుందంటే, బలహీనంగా ఉన్న ఇళ్లు, హోర్డింగులు, చెట్లు మరియు విద్యుత్ లైన్లు కుప్పకూలిపోయే ప్రమాదం ఉంది. ఇక మన తెలుగు రాష్ట్రాలైన ఆంధ్రప్రదేశ్, తెలంగాణ విషయానికి వస్తే, ఇక్కడ కూడా వాతావరణలో విపరీతమైన మార్పులు రాబోతున్నాయి. గత కొన్ని వారాలుగా ఎండల తీవ్రతతో, ఉక్కపోతతో అల్లాడిపోయిన తెలుగు ప్రజలకు ఇది ఒక రకంగా గుడ్ న్యూస్ అయినప్పటికీ, అప్రమత్తంగా ఉండటం చాలా అవసరం. మొదటగా తెలంగాణ గురించి మాట్లాడుకుంటే, తెలంగాణలో గత కొన్ని రోజులుగా కొనసాగుతున్న వడగాల్పుల హెచ్చరికలను వాతావరణ శాఖ పూర్తిగా వెనక్కి తీసుకుంది. అంటే తెలంగాణ ప్రజలకు ఎండల నుండి విముక్తి లభించినట్లే! అయితే, దీనికి బదులుగా రాష్ట్రంలో ఉరుములు, మెరుపులతో కూడిన తుఫాను గాలుల హెచ్చరికను జారీ చేశారు. ముఖ్యంగా హైదరాబాద్, రంగారెడ్డి, మేడ్చల్ మల్కాజ్‌గిరి, నిజామాబాద్, కరీంనగర్, వరంగల్, ఖమ్మం, నల్గొండ మరియు మహబూబ్‌నగర్ జిల్లాలలో రాబోయే రెండు రోజుల్లో తేలికపాటి నుండి మోస్తరు వర్షాలు కురిసే అవకాశం ఉంది. వర్షం కురిసే సమయంలో గంటకు 40 కిలోమీటర్ల వేగంతో గాలులు వీస్తాయని, ఆ సమయంలో ప్రజలు చెట్ల కింద గానీ, పాత భవనాల కింద గానీ నిలబడవద్దని అధికారులు హెచ్చరిస్తున్నారు. ఇటు ఆంధ్రప్రదేశ్‌లో ముఖ్యంగా కోస్తాంధ్రా మరియు రాయలసీమ ప్రాంతాలలో వాతావరణంలో అద్భుతమైన మార్పులు కనిపిస్తున్నాయి. ఉత్తర కోస్తాంధ్రా, దక్షిణ కోస్తాంధ్రా మరియు యానాంలో అక్కడక్కడా పిడుగులతో కూడిన భారీ వర్షాలు పడే అవకాశం ఉంది. రాయలసీమ జిల్లాలైన అనంతపురం, కడప, కర్నూలు, చిత్తూరు ప్రాంతాలలో తీవ్రమైన ఈదురుగాలులు వీయనున్నాయి. సముద్ర తీర ప్రాంతాల్లో గంటకు 50 నుండి 60 కిలోమీటర్ల వేగంతో గాలులు వీయడం వల్ల మత్స్యకారులు వేటకు వెళ్లకూడదని విపత్తు నిర్వహణ శాఖ స్పష్టం చేసింది. వ్యవసాయ పనుల్లో ఉండే రైతులు, ముఖ్యంగా పొలాల్లో ఉండేవారు ఉరుములు, మెరుపులు వచ్చే సమయంలో సురక్షిత ప్రాంతాలకు వెళ్లాలని, చెట్ల కింద ఆశ్రయం పొందకూడదని హెచ్చరించారు. దక్షిణ భారతదేశాన్ని పక్కన పెడితే, ఉత్తర మరియు మధ్య భారతదేశంలో వాతావరణం మరింత భయంకరంగా మారే సూచనలు కనిపిస్తున్నాయి. రాజస్థాన్, దిల్లీ, పంజాబ్, హర్యానా మరియు ఉత్తర ప్రదేశ్ రాష్ట్రాలలో రాబోయే 3 నుండి 4 రోజుల పాటు వాతావరణ శాఖ ‘ఆరెంజ్ అలర్ట్’ ప్రకటించింది. రాజస్థాన్ రాష్ట్రంలో సాధారణంగా ఎండలు ఎక్కువగా ఉంటాయి. కానీ ఈసారి అక్కడ భారీ ఇసుక తుఫాను ముప్పు పొంచి ఉంది. గంటకు 50 నుండి 70 కిలోమీటర్ల వేగంతో వీచే ఈ దుమ్ము గాలుల వల్ల దృశ్యమానత పూర్తిగా తగ్గిపోయే ప్రమాదం ఉంది. దీనితో పాటు రాజస్థాన్‌లోని కొన్ని జిల్లాల్లో వడగండ్ల వాన కురిసే అవకాశం ఉందని ఐఎండి తెలిపింది. ఎడారి ప్రాంతంలో వడగండ్లు పడటం అనేది వాతావరణంలో వస్తున్న తీవ్ర మార్పులకు సంకేతం. దేశ రాజధాని దిల్లీ, దాని చుట్టుపక్కల ఉన్న నోయిడా, గురుగ్రామ్, ఘజియాబాద్ ప్రాంతాలలో గత కొద్దిరోజులుగా ఉష్ణోగ్రతలు 45 డిగ్రీల మార్కును దాటాయి. అయితే, రాబోయే 24 గంటల్లో దిల్లీలో దట్టమైన మేఘాలు కమ్ముకుని, పిడుగులతో కూడిన వర్షం మరియు ధూళి తుఫాను వచ్చే అవకాశం ఉంది. దీనివల్ల ఉష్ణోగ్రతలు ఒక్కసారిగా 4 నుండి 5 డిగ్రీలు పడిపోయి, దిల్లీ వాసులకు పెద్ద ఉపశమనం లభించనుంది. కానీ అదే సమయంలో గంటకు 60 కిలోమీటర్ల వేగంతో వీచే గాలుల వల్ల విమాన రాకపోకలకు మరియు రోడ్డు రవాణాకు అంతరాయం కలిగే అవకాశం ఉంది. ఉత్తర ప్రదేశ్‌లో ముఖ్యంగా పశ్చిమ ఉత్తర ప్రదేశ్ జిల్లాలలో భారీ ఈదురుగాలులు, మెరుపుల అలర్ట్ జారీ చేశారు. పర్వత ప్రాంతాలైన హిమాచల్ ప్రదేశ్ మరియు ఉత్తరాఖండ్‌లలో పశ్చిమ విక్షోభం తీవ్రంగా ప్రభావం చూపబోతోంది. ఈ రెండు రాష్ట్రాలలో కొండచరియలు విరిగిపడే ప్రమాదం ఉందని, టూరిస్టులు తమ ప్రయాణాలను వాయిదా వేసుకోవాలని అధికారులు సూచిస్తున్నారు. ఇక్కడ భారీ వడగండ్ల వాన కురిసే అవకాశం ఉంది, ఇది ఆపిల్ తోటలకు మరియు స్థానిక పంటలకు తీవ్ర నష్టం కలిగించే ప్రమాదం ఉంది. మరోవైపు తూర్పు మరియు ఈశాన్య భారతదేశంలో కూడా రుతుపవనాల ప్రభావం స్పష్టంగా కనిపిస్తోంది. బీహార్ మరియు జార్ఖండ్ రాష్ట్రాలలో రాబోయే 48 గంటల్లో తేలికపాటి నుండి మోస్తరు వర్షాలు పడతాయని వాతావరణ శాఖ అంచనా వేసింది. అయితే, బీహార్‌లోని కొన్ని జిల్లాల్లో జూన్ 5 నుండి జూన్ 9 వరకు కొన్ని ప్రాంతాలలో మళ్లీ వడగాల్పులు వీచే అవకాశం ఉందని, వాతావరణంలో తీవ్రమైన అస్థిరత ఉంటుందని హెచ్చరించారు. ఈశాన్య రాష్ట్రాలైన అసోం, మేఘాలయ, అరుణాచల్ ప్రదేశ్, నాగాలాండ్, మణిపూర్, మిజోరాం మరియు త్రిపురలలో రుతుపవనాలు చాలా చురుగ్గా ఉన్నాయి. ముఖ్యంగా అసోం, మేఘాలయ రాష్ట్రాలలో జూన్ 8 మరియు జూన్ 9 తేదీలలో “అత్యంత భారీ వర్షాలు” కురిసే అవకాశం ఉందని ఐఎండి పేర్కొంది. దీనివల్ల ఆయా ప్రాంతాల్లోని నదులు పొంగిపొర్లి, వరదలు వచ్చే ప్రమాదం కూడా ఉందని స్థానిక ప్రభుత్వాలు అప్రమత్తమయ్యాయి. రుతుపవనాల రాకతో సముద్ర గమనం పూర్తిగా మారిపోయింది. అందుకే భారత వాతావరణ శాఖ సముద్ర తీర ప్రాంతాల్లో నివసించే ప్రజలకు మరియు మత్స్యకారులకు ఒక ప్రత్యేకమైన ‘మెరైన్ వార్నింగ్’జారీ చేసింది. తమిళనాడు తీరం, శ్రీలంక తీరం, గల్ఫ్ ఆఫ్ మన్నార్, కొమొరిన్ ప్రాంతం, మరియు లక్షద్వీప్-మాల్దీవుల పరిసర ప్రాంతాలలో సముద్రం తీవ్రంగా అల్లకల్లోలంగా మారనుంది. ఈ ప్రాంతాలలో గంటకు 40 కిలోమీటర్ల వేగంతో బలమైన గాలులు వీస్తాయని ఐఎండి తెలిపింది. అలాగే బంగాళాఖాతంలోని దక్షిణ ప్రాంతం, అండమాన్ సముద్రంలో కూడా ఇవే పరిస్థితులు జూన్ నెల అంతటా కొనసాగే అవకాశం ఉందని వాతావరణ శాఖ స్పష్టం చేసింది. కాబట్టి, మత్స్యకారులు ఎవరూ కూడా సముద్రంలో వేటకు వెళ్లరాదని, తీర ప్రాంత ప్రజలు సురక్షిత ప్రాంతాల్లో ఉండాలని విపత్తు నిర్వహణ శాఖ ఆదేశాలు జారీ చేసింది. వాతావరణం ఎప్పుడు ఎలా మారుతుందో చెప్పలేం. ప్రకృతి ముప్పును మనం ఆపలేము కానీ, సరైన జాగ్రత్తలు తీసుకోవడం ద్వారా మనల్ని మరియు మన కుటుంబాన్ని ఖచ్చితంగా కాపాడుకోవచ్చు.మీ ప్రాంతంలో ఆకాశం నల్లగా మారి, బలమైన గాలులు వీస్తున్నప్పుడు ఎట్టిపరిస్థితుల్లోనూ బయటకు వెళ్లకండి. ప్రయాణాలను వాయిదా వేసుకోండి. గాలుల తీవ్రతకు పెద్ద పెద్ద చెట్లు విరిగిపడే ప్రమాదం ఉంది. అంతేకాదు, పిడుగులు ఎక్కువగా చెట్ల పైనే పడతాయి. కాబట్టి వర్షం వచ్చేటప్పుడు చెట్ల కింద అస్సలు నిలబడకండి. రోడ్డుపై నడుస్తున్నప్పుడు లేదా వాహనాలపై వెళ్లేటప్పుడు విద్యుత్ లైన్లు, స్తంభాలు, పెద్ద పెద్ద అడ్వర్టైజ్మెంట్ హోర్డింగులకు దూరంగా ఉండండి. ఉరుములు, మెరుపులు ఎక్కువగా ఉన్నప్పుడు మీ ఇంట్లోని టీవీ, ఫ్రిజ్, కంప్యూటర్ వంటి ఎలక్ట్రానిక్ వస్తువుల ప్లగ్‌లను సాకెట్ల నుండి తొలగించండి. మొబైల్ ఫోన్లను ఛార్జింగ్‌లో పెట్టి మాట్లాడకండి. పొలాల్లో పనిచేసే రైతులు, పశువుల కాపరులు ఆకాశంలో మెరుపులు కనిపించగానే వెంటనే సురక్షితమైన కాంక్రీట్ భవనాల్లోకి వెళ్లాలి. పశువులను చెట్లకు కట్టేయకూడదు. వర్షాల వల్ల నీరు కలుషితమయ్యే అవకాశం ఉంది. కాబట్టి నీటిని కాచి చల్లార్చి తాగడం మంచిది. నైరుతి రుతుపవనాల రాక ఎంత ఊరటనిస్తుందో, అదే సమయంలో అంతటి ప్రమాదాన్ని కూడా మోసుకొస్తోంది. వాతావరణ శాఖ జారీ చేసిన ఈ హెచ్చరికలను అస్సలు తేలికగా తీసుకోవద్దు.

మరిన్ని వీడియోల కోసం ఇక్కడ క్లిక్ చేయండి

Also Watch:

Peddi: కన్నడ కిర్రాక్‌ కలెక్షన్స్‌.. నెంబర్‌ 1గా హీరో మనోడే..!

Peddi: టికెట్స్ తెగడంలో.. పెద్ది రికార్డ్