అతిగా నగలు వేసుకుంటే పెళ్లిలోకి నో ఎంట్రీ! వధువు వింత కండిషన్.. అసలు కథేంటంటే?
పెళ్లి అంటేనే అతిథులు పట్టుచీరలు, భారీ ఆభరణాలతో మెరిసిపోవడం మన దగ్గర సాధారణం. అయితే, సోషల్ మీడియాలో ఒక వధువు తన పెళ్లికి వచ్చే అతిథుల కోసం పెట్టిన వింత నిబంధన ఇప్పుడు అంతర్జాతీయంగా చర్చనీయాంశమైంది. అతిథులు ఎవరూ వధువు కంటే ఎక్కువగా ముస్తాబు కాకూడదు, భారీ ఆభరణాలు ధరించకూడదు అనేదే ఆ నిబంధన. ఒకవేళ ఎవరైనా అతిగా అలంకరించుకుని వస్తే, వారిని పెళ్లి వేడుకలోకి అనుమతించబోమని ఆమె స్పష్టం చేసింది. ఈ వింతైన వివాహ నిబంధన ఇప్పుడు ఇంటర్నెట్ వేదికగా తీవ్ర చర్చకు దారి తీసింది.
Updated on: Mar 15, 2026 | 11:03 AM
పెళ్లి వేడుక అంటే వధూవరుల కంటే అతిథుల హడావుడే ఎక్కువగా కనిపిస్తుంటుంది. ముఖ్యంగా మహిళలు పోటీపడి మరీ పట్టుచీరలు, భారీ బంగారు ఆభరణాలు ధరించి వస్తుంటారు. అయితే, ఒక వధువు మాత్రం తన పెళ్లిలో తానే సెంటర్ ఆఫ్ అట్రాక్షన్గా ఉండాలని భావించి, అతిథుల ముస్తాబుపై ఆంక్షలు విధించింది. ఈ వింత ఘటన చైనాలో వెలుగు చూసింది. సాధారణంగా పెళ్లి కార్డులో భోజనం సమయం, వేదిక వివరాలు ఉంటాయి. కానీ ఈ వధువు మాత్రం ఒక ప్రత్యేకమైన డ్రెస్ కోడ్, జ్యువెలరీ కోడ్ను పంపింది.
ఆమె ప్రకారం.. అతిథులు ఎవరూ మెడ నిండా నగలు వేసుకోకూడదు. కేవలం సింపుల్ ఇయర్ రింగ్స్ లేదా సన్నని గొలుసు మాత్రమే ధరించాలి. వధువు దుస్తుల రంగును పోలిన రంగులు లేదా వధువు కంటే ప్రకాశవంతంగా ఉండే రంగులను అతిథులు ధరించకూడదు. ఈ నియమాలను అతిక్రమించిన వారిని రిసెప్షన్ హాలులోకి అనుమతించబోమని ఆమె తెగేసి చెప్పింది. దీంతో ఈ వెడ్డింగ్ ఇన్వెటేషన్ కాస్త నెట్టింట తెగ హల్చల్ చేస్తోంది.
వధువు వాదన ప్రకారం.. పెళ్లి అనేది తన జీవితంలో అత్యంత ముఖ్యమైన రోజు. ఆ రోజు అందరి కళ్లు తనపైనే ఉండాలి కానీ, వజ్రవైఢూర్యాలతో మెరిసిపోయే అతిథులపై కాదు. విదేశాల్లో వధువు ధరించే తెలుపు రంగు గౌనును అతిథులు ధరించడం అవమానంగా భావిస్తారు. ఇప్పుడు అదే ట్రెండ్ ఆభరణాల వరకు పాకింది.
ఈ వార్తపై నెటిజన్లు రకరకాలుగా స్పందిస్తున్నారు. వధువు కోరికలో తప్పులేదు, అది ఆమె రోజు అని కొందరు అంటుంటే.. అతిథులను పిలిచి వారి అలంకరణపై ఆంక్షలు పెట్టడం మర్యాద కాదు అని మరికొందరు విమర్శిస్తున్నారు. మన దేశంలో కూడా సెలబ్రిటీల పెళ్లిళ్లలో ఇటువంటి నియమాలు (ఉదాహరణకు ఫోన్లు వాడకూడదు, ఫలానా రంగులే వేసుకోవాలి) కనిపిస్తున్నాయి. అయితే మధ్యతరగతి పెళ్లిళ్లలో ఇలాంటి నిబంధనలు వస్తే పరిస్థితి ఎలా ఉంటుందో ఊహించుకోవడమే కష్టంగా ఉంది.
మరిన్ని ట్రెండింగ్ న్యూస్ కోసం క్లిక్ చేయండి…
