అణు దాడి భయంతో ఇరాన్ అలర్ట్.. ఏసీలు బంద్ చేయండి.. 24 గంటలు బయటకు రావొద్దు!
మధ్యప్రాచ్యంలో యుద్ధ మేఘాలు కమ్ముకుంటున్నాయి. పికాక్స్ మౌంటెన్ అణు కేంద్రంపై అమెరికా దాడి జరిగే అవకాశం ఉందన్న ఊహాగానాల మధ్య ఇరాన్ ప్రభుత్వం అప్రమత్తమైంది. ఒకవేళ అణు దాడి జరిగితే ప్రజలు ఎలా ప్రాణాలు కాపాడుకోవాలో వివరిస్తూ మార్గదర్శకాలను విడుదల చేసింది. ఇళ్లలోనే సురక్షితంగా ఉండటం, ఏసీలు ఆపేయడం, కిటికీలకు దూరంగా ఉండటం, 24 గంటలు బయటకు రాకుండా ఉండటం వంటి సూచనలు చేసింది.
మధ్యప్రాచ్యంలో యుద్ధ మేఘాలు కమ్ముకుంటున్నాయి. పికాక్స్ మౌంటెన్ అణు కేంద్రంపై అమెరికా దాడి జరిగే అవకాశం ఉందన్న ఊహాగానాల మధ్య ఇరాన్ ప్రభుత్వం అప్రమత్తమైంది. ఒకవేళ అణు దాడి జరిగితే ప్రజలు ఎలా ప్రాణాలు కాపాడుకోవాలో వివరిస్తూ మార్గదర్శకాలను విడుదల చేసింది. ఇళ్లలోనే సురక్షితంగా ఉండటం, ఏసీలు ఆపేయడం, కిటికీలకు దూరంగా ఉండటం, 24 గంటలు బయటకు రాకుండా ఉండటం వంటి సూచనలు చేసింది.
అణు దాడి నుంచి ఎలా తప్పించుకోవాలో 8 నిమిషాల వీడియో!
అమెరికా-ఇరాన్ మధ్య ఉద్రిక్తతలు పెరుగుతున్నాయి. అణు దాడి సమయంలో తీసుకోవాల్సిన జాగ్రత్తలపై ఇరాన్ అధికారిక వార్తా సంస్థ IRNA వీడియోను విడుదల చేసింది. ముఖ్యంగా అణు పేలుడు వల్ల వెలువడే కాంతి, భారీ పేలుడు గాలులు, తీవ్రమైన వేడి, రేడియోధార్మిక పదార్థాల నుంచి ఎలా రక్షించుకోవాలో సూచించారు. ఇరాన్‌లోని ఇస్ఫహాన్ ప్రావిన్స్ రెడ్ క్రెసెంట్ సొసైటీ అధికారులు ఈ మార్గదర్శకాలను వివరించారు. భవనాల కింద ఉండే బేస్‌మెంట్లు లేదా కిటికీలకు దూరంగా ఉన్న గదుల్లో ఆశ్రయం పొందాలని సూచించారు.అణు పేలుడు వల్ల వెలువడే రేడియేషన్ ప్రభావం దూర ప్రాంతాలకు కూడా వ్యాపించే ప్రమాదం ఉందని హెచ్చరించింది.
ఏసీలు ఆపేయండి.. కిటికీలకు దూరంగా ఉండండి!
అణు దాడి జరిగే పరిస్థితి వస్తే ప్రజలు ముందుగా సురక్షితమైన భవనాల్లోకి వెళ్లాలని అధికారులు సూచించారు. ఇంటి తలుపులు, కిటికీలు పూర్తిగా మూసివేయాలి. బయట గాలిని లోపలికి తీసుకొచ్చే ఏసీలు, వెంటిలేషన్ వ్యవస్థలను వెంటనే ఆపేయాలి. కిటికీలకు దూరంగా ఉన్న గదుల్లో లేదా బేస్‌మెంట్లలో ఆశ్రయం పొందాలి. కనీసం 24 గంటల పాటు బయటకు రాకుండా ఇంట్లోనే ఉండాలి. ప్యాకెట్లలో లభించే ఆహారం, సురక్షితమైన బాటిల్ నీటిని మాత్రమే ఉపయోగించాలి. కార్లు, ఇతర వాహనాల్లో ఆశ్రయం పొందేందుకు ప్రయత్నించకూడదు. అయితే 24 గంటలు గడిచిన వెంటనే పరిస్థితి సురక్షితంగా మారుతుందని భావించకూడదు. అధికారుల నుంచి వచ్చే సూచనలను బట్టి మాత్రమే బయటకు రావాలి.
బయట ఉన్నప్పుడు అణు పేలుడు జరిగితే ఏం చేయాలి?
ఒకవేళ అణు పేలుడు జరిగిన సమయంలో ఎవరైనా బయట ఉంటే కొన్ని జాగ్రత్తలు తప్పనిసరిగా పాటించాలని ఇరాన్ అధికారులు సూచించారు. అణు పేలుడు సమయంలో కనిపించే తీవ్రమైన కాంతిని నేరుగా చూడకూడదు. వెంటనే నేలపై పడుకుని తల, ముఖాన్ని చేతులతో కప్పుకోవాలి. సమీపంలో గోడ లేదా ఇతర రక్షణ కవచం ఉంటే దాని వెనుకకు వెళ్లాలి. పేలుడు వల్ల వచ్చే గాలి ఒత్తిడి తగ్గిన తర్వాత సమీపంలోని బలమైన భవనంలోకి వెళ్లాలి.పేలుడును చూడటానికి, ఫొటోలు తీయడానికి బయట ఉండకూడదు. వాహనాలను రక్షణ కేంద్రాలుగా ఉపయోగించకూడదు. ఆశ్రయం పొందిన భవనంలో మంటలు చెలరేగినా, అది కూలిపోయే ప్రమాదం ఉన్నా వెంటనే మరో సురక్షిత ప్రాంతానికి వెళ్లాలని సూచించారు.
పాకిస్థాన్, భారత్‌కూ రేడియేషన్ ముప్పు ఉందా?
అణు పేలుడు తర్వాత వెలువడే రేడియోధార్మిక కణాలు గాల్లో కలిసి చాలా దూరం ప్రయాణించే ప్రమాదం ఉంది.
గాలుల దిశను బట్టి రేడియోధార్మిక కణాలు ఇతర దేశాల వైపు కూడా ప్రయాణిస్తాయి. గాలులు తూర్పు దిశగా వీచినట్లయితే పాకిస్థాన్‌తో పాటు భారత్‌లోని కొన్ని ప్రాంతాల వరకు రేడియోధార్మిక ప్రభావం చేరే అవకాశం ఉందని నివేదికలో తెలిపింది.
రేడియేషన్ ధూళి పడితే ఏం చేయాలి?
రేడియోధార్మిక ధూళి శరీరంపై పడినట్లు అనుమానం వస్తే జాగ్రత్తలు తీసుకోవాలని అధికారులు సూచించారు.
దుస్తులను జాగ్రత్తగా తొలగించి ప్లాస్టిక్ సంచిలో మూసి ఉంచాలి. చర్మం, జుట్టును గోరువెచ్చని నీరు, సబ్బుతో శుభ్రం చేసుకోవాలి. స్నానం చేసే అవకాశం లేకపోతే తడి వైప్స్‌తో శరీరంపై ఉన్న ధూళిని తొలగించుకోవాలి. కండిషనర్ లేని సాధారణ షాంపూతో జుట్టును శుభ్రం చేసుకోవాలని కూడా సూచించారు. రేడియోధార్మిక ధూళి కలిసే అవకాశం ఉన్న ఆహారం, నీటిని తీసుకోకూడదని హెచ్చరించారు.
అయోడిన్ టాబ్లెట్లు సొంతంగా వేసుకోవద్దు!
అణు ప్రమాదాల సమయంలో అయోడిన్ మాత్రలు ఉపయోగపడతాయని చాలా మంది భావిస్తుంటారు. అయితే వైద్యుల సలహా లేకుండా వాటిని తీసుకోవద్దని ఇరాన్ అత్యవసర వైద్య సేవల ప్రతినిధి అబ్బాస్ అబేది హెచ్చరించారు.కొన్ని ప్రత్యేక పరిస్థితుల్లో స్థిరమైన అయోడిన్ మాత్రలు థైరాయిడ్ గ్రంథి రేడియోధార్మిక అయోడిన్‌ను గ్రహించకుండా కొంతవరకు రక్షిస్తాయి. కానీ అణు పేలుడు వల్ల వెలువడే అన్ని రకాల రేడియేషన్ నుంచి ఇవి రక్షణ కల్పించలేవు. సీజియం-137 వంటి కొన్ని రేడియోధార్మిక పదార్థాలు శరీరంలోకి చేరిన సందర్భాల్లో ప్రష్యన్ బ్లూ (Prussian Blue) మందులను వైద్యుల సూచన మేరకే వాడాలి. అణు పేలుడు వల్ల ఏర్పడే ఎలక్ట్రోమాగ్నెటిక్ పల్స్ (EMP) కారణంగా ఎలక్ట్రానిక్ పరికరాలు, కమ్యూనికేషన్ వ్యవస్థలు దెబ్బతింటాయి. బ్యాటరీతో పనిచేసే రేడియోలను అందుబాటులో ఉంచుకోవాలని సూచించారు.
అమెరికా దాడి భయంతో ఇరాన్ అప్రమత్తం
ఇరాన్‌లోని ‘పికాక్స్ మౌంటెన్’ (Pickaxe Mountain) పై అమెరికా దాడి చేయవచ్చన్న ఊహాగానాలు ఇటీవల పెరిగాయి. అక్టోబర్ 16న అమెరికా అధ్యక్షుడు డొనాల్డ్ ట్రంప్ ఈ ప్రాంతాన్ని లక్ష్యంగా చేసుకునే అవకాశంపై మాట్లాడారు. అయితే అణ్వాయుధాలను ఉపయోగించే ఉద్దేశం లేదని స్పష్టం చేశారు. ఇజ్రాయెల్ ప్రధాని బెంజమిన్ నెతన్యాహు.. ఈ ప్రాంతంపై దాడి చేయాలని ట్రంప్‌పై ఒత్తిడి తెస్తున్నారని అమెరికా జర్నలిస్ట్ టక్కర్ కార్ల్‌సన్ ఆరోపించారు. అయితే ఇవి ఆయన చేసిన ఆరోపణలు మాత్రమే. అణు దాడి జరగబోతోందని అధికారికంగా నిర్ధారణ కాలేదు.
గతంలోనూ అణు దాడులను ఎదుర్కొన్న ఇరాన్ !
2025 జూన్‌లో ఇజ్రాయెల్, అమెరికా కలిసి ఇరాన్ అణు కేంద్రాలపై వైమానిక దాడులు చేసాయి. అప్పట్లో ఆ ప్రాంతాల బయట రేడియేషన్ వ్యాపించలేదని ఇరాన్ అధికారులు ప్రజలకు భరోసా ఇచ్చారు. అయితే ఇప్పుడు అణు పేలుడు జరిగితే ఎలా ప్రాణాలు కాపాడుకోవాలో వివరిస్తూ వివరమైన మార్గదర్శకాలను జారీ చేయడం ప్రాధాన్యత సంతరించుకుంది.