అమెరికాలో భారతీయ సినీ దర్శకుడు అరెస్ట్.. వారెంట్ లేకుండా అదుపులోకి తీసుకున్న ICE
కశ్మీరీ సినీ దర్శకుడు అర్ఫత్‌ షేక్‌ను అమెరికా ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ICE) అధికారులు అదుపులోకి తీసుకున్నారు. సెప్టెంబర్ 24న వాషింగ్టన్ ఎయిర్‌పోర్ట్‌లో వారెంట్ చూపించకుండా అరెస్ట్ చేశారనీ ఆయన విడుదల కోసం ప్రయత్నిస్తున్న ప్రచార క్యాంపెయిన్ సంస్థ నిర్వాహకులు ఆరోపిస్తున్నారు. అర్ఫత్‌ షేక్ ‘Saffron Kingdom’ చిత్రానికి దర్శకత్వం వహించారు.
సెప్టెంబర్ 24న వాషింగ్టన్ లోని డల్లెస్ ఎయిర్‌పోర్ట్‌లో అరాఫత్ విమానం నుంచి బయటకు వచ్చిన వెంటనే పలువురు అధికారులు అతన్ని చుట్టుముట్టారు. ఇమ్మిగ్రేషన్ పత్రాలను చూపించినప్పటికీ అధికారులు అదుపులోకి తీసుకున్నారు. ప్రస్తుతం వర్జీనియాలోని కరోలిన్ డిటెన్షన్ ఫెసిలిటీలో ఉంచినట్లు సమాచారం. ఇమ్మిగ్రేషన్ జడ్జి ఎదుట హియరింగ్‌ ఉందని తెలుస్తోంది. తమ స్నేహితుడు, ఫిల్మ్‌మేకర్ అర్ఫత్‌ షేక్‌ను ICE అక్రమంగా అదుపులోకి తీసుకుందని ‘Support Arfat Sheikh’s Release’ క్యాంపెయిన్ నిర్వాహకులు తెలిపారు. అర్ఫత్‌ ను ICE అధికారులు అదుపులోకి తీసుకుంటున్న వీడియోను విడుదల చేసారు. అతన్ని విడిపించేందుకు న్యాయపరమైన ఖర్చుల నిమిత్తం 50 వేల డాలర్లు సేకరిస్తున్నారు.
2019లో స్టూడెంట్ వీసాపై అమెరికాకు
అర్ఫత్‌ షేక్ 2019లో స్టూడెంట్ వీసాపై చట్టబద్ధంగా అమెరికాలోకి ప్రవేశించారు. జార్జియా స్టేట్ యూనివర్సిటీలో ఫిల్మ్‌కు సంబంధించిన ఉన్నత విద్యను అభ్యసించేందుకు అమెరికా వెళ్లారు. 2020లో అమెరికాలో ఆశ్రయం కోసం దరఖాస్తు చేసుకున్నారు. ప్రస్తుతం ఆ ఇమ్మిగ్రేషన్ దరఖాస్తు పెండింగ్‌లో ఉంది. అర్ఫత్‌ షేక్ వర్జీనియాలోని అలెగ్జాండ్రియాలో నివసిస్తున్నారు.
‘వాళ్లు ICE అధికారులని చెప్పిన అరాఫత్’
ఆర్ట్ అండ్ రెసిస్టెన్స్ అంశంపై జరిగే ఓ కార్యక్రమంలో పాల్గొనేందుకు అవార్డు విన్నింగ్ రచయిత, ఫిల్మ్‌మేకర్ తారా దొరాబ్జీతో కలిసి వాషింగ్టన్‌కు వెళ్తుండగా ఈ ఘటన జరిగింది. అర్ఫత్‌ తో కలిసి ప్రయాణించిన తారా దొరాబ్జీ ఈ ఘటనపై స్పందించారు. విమానం దిగిన సమయంలో అర్ఫత్‌ ను కొందరు వ్యక్తులు చుట్టుముట్టినట్లు తాను గమనించానని చెప్పారు. ‘విమానం నుంచి దిగుతున్నప్పుడు అర్ఫత్‌ ను దాటి వెళ్లిపోయాను. అతడిని పక్కకు తీసుకెళ్లారని అప్పటికి నాకు తెలియదు. అర్ఫత్‌ నన్ను పిలవడంతో వెనక్కి తిరిగి చూశాను. అతడి చుట్టూ చాలా మంది వ్యక్తులు ఉన్నారు’ అన్నారు. అర్ఫత్‌ తనతో, ‘తారా.. తారా.. వీళ్లు ICE. నా కోసం వచ్చారు’ అని చెప్పినట్లు తారా తెలిపారు. వారు సాధారణ దుస్తుల్లో ఉన్నారనీ ఫెడరల్ అధికారులు అని గుర్తించేలా యూనిఫాం ధరించలేదని చెప్పారు. ఎలాంటి వారెంట్ చూపించలేదని, అర్ఫత్‌ ను ఎందుకు తీసుకెళ్తున్నారో కూడా చెప్పలేదని ఆరోపించారు. అనంతరం అర్ఫత్‌ ను జెట్‌వే నుంచి విమానం నిలిపి ఉంచిన ప్రాంతానికి తీసుకెళ్లారనీ అతను ప్రతిఘటించలేదని తెలిపారు.