Helicopter: నాలుగు గంటలు గాల్లో చక్కర్లు కొట్టిన హెలికాప్టర్.. వీడియో వైరల్
కొన్ని సందర్భాల్లో హెలికాప్టర్లు, విమానాలు గాల్లో తెగ చక్కర్లు కొడుతుంటాయి. ఇలాంటి సమయంలో హెలికాప్టర్లు చక్కర్లు కొట్టడం ఆందోళన కలిగిస్తుంటుంది. శత్రువు..
Updated on: Feb 07, 2023 | 5:00 AM
కొన్ని సందర్భాల్లో హెలికాప్టర్లు, విమానాలు గాల్లో తెగ చక్కర్లు కొడుతుంటాయి. ఇలాంటి సమయంలో హెలికాప్టర్లు చక్కర్లు కొట్టడం ఆందోళన కలిగిస్తుంటుంది. శత్రువు దేశాలు ఏమైనా కుట్రకు ప్లాన్ చేస్తున్నాయా అన్న కోణంలో కూడా అనుమానాలు వస్తుంటాయి. తాజాగా జోగులాంబ గద్వాల జిల్లాలో నాలుగు గంటల పాటు గాల్లో చక్కర్లు కొట్టింది ఓ హెలికాప్టర్. ఎన్నడూ లేని విధంగా ఇలా చక్కర్లు కొట్టడంపై కంగారుపడిపోయారు జనం. మానవపాడు, ఉండవెల్లి మండలాల మధ్య సోమవారం నాలుగు గంటల పాటు గుర్తు తెలియని ఓ హెలికాప్టర్ పలు గ్రామాల మీదుగా చక్కర్లు కొట్టింది.
మానవపాడు మండలంలోని గోకులపాడు, చెన్నిపాడు, పోతులపాడు, ఉండవల్లి మండలంలోని ఇటిక్యాల, బోంకూర్ ఇతర గ్రామాల శివార్లలో తక్కువ ఎత్తులో ఎగురుతూ గుండ్రంగా చక్కర్లు కొట్టింది. ఉదయం 8. 30 నుంచి 1. 00 గంటల వరకు గుండ్రంగా తిరిగింది. పంట, పొలాల్లోని రైతులు, ఆయా గ్రామాల ప్రజలు ఆసక్తిగా తిలకించారు. సాంకేతిక లోపం వల్ల అలా చక్కర్లు కొట్టిందా లేక ఇతర ఏమైన కారణాలున్నాయా అనేది తేలాల్సి ఉంది. మానవపాడు పోలీసులు విచారణ చేస్తున్నారు.
అయితే ఇలా ఏకధాటిగా హెలికాప్టర్ గాల్లో చక్కర్లు కొట్టడంపై కొందరు ఆందోళనకు గురయ్యారు. కొందరు హెలికాప్టర్ చక్కర్లు కొడుతున్న వీడియోను ఫోన్లలో రికార్డు చేశారు.
