అదరగొట్టే ఫీచర్లే కాదు, ఆకర్షించే రంగు కూడా.. Tecno Spark 50s పూర్తి వివరాలివే
బడ్జెట్‌లో కొత్త 5G స్మార్ట్‌ఫోన్ కొనాలనుకుంటున్నారా? అయితే Tecno నుంచి రాబోతున్న Spark 50s 5Gపై ఓ లుక్కేయండి. ఆకర్షణీయమైన Burgundy Red, Breeze Blue కలర్ ఆప్షన్లతో వస్తున్న ఈ ఫోన్ డిజైన్ ఇప్పటికే ఆసక్తిని పెంచుతోంది. 120Hz డిస్‌ప్లే, 50MP కెమెరా, శక్తివంతమైన బ్యాటరీ వంటి ఫీచర్లు ఇందులో ఉండవచ్చని ప్రచారం జరుగుతోంది. అయితే ధర, పూర్తి స్పెసిఫికేషన్లపై అధికారిక ప్రకటన వెలువడాల్సి ఉంది.
భారత స్మార్ట్‌ఫోన్ మార్కెట్లో బడ్జెట్ 5G ఫోన్లకు డిమాండ్ పెరుగుతోంది. ఈ నేపథ్యంలో Tecno తన Spark సిరీస్‌ను మరింత విస్తరించేందుకు సిద్ధమైంది. Spark 50s 5Gని అక్టోబర్ 16న భారత మార్కెట్లో విడుదల చేయనున్నట్లు కంపెనీ టీజ్ చేసినట్లు సమాచారం. ఇప్పటికే Spark 50, Spark 50 Pro మోడళ్లను పరిచయం చేసిన సంస్థ.. కొత్త ఫోన్‌తో ఎలాంటి ఫీచర్లు అందించనుందనే ఆసక్తి నెలకొంది.
కొత్త డిజైన్..
Tecno Spark 50s 5G రెండు ఆకర్షణీయమైన రంగుల్లో అందుబాటులోకి రానున్నట్లు సమాచారం. Burgundy Red ఎరుపు రంగు షేడ్‌లో ప్రత్యేకంగా కనిపించనుండగా, Breeze Blue నీలం రంగులో రానుంది. Burgundy Red కలర్ స్టైల్ iPhone 18 Proను గుర్తు చేస్తోందనే చర్చ జరుగుతోంది. అయితే ఈ పోలిక రంగుకు మాత్రమే పరిమితం. రెండు ఫోన్ల డిజైన్, ఫీచర్లు, పనితీరు వేర్వేరుగా ఉండవచ్చు.
కంపెనీ టీజర్‌లో ఫోన్ వెనుక భాగం కనిపిస్తోంది. ఇందులో Google Pixel ఫోన్లను గుర్తు చేసే కెమెరా మాడ్యూల్ డిజైన్ ఉన్నట్లు తెలుస్తోంది. ముందువైపు పంచ్‌హోల్ సెల్ఫీ కెమెరాతో డిస్‌ప్లే ఉండే అవకాశం ఉంది. అయితే AMOLED డిస్‌ప్లే ఉంటుందా అనే విషయం ఇంకా నిర్ధారణ కాలేదు.
120Hz స్క్రీన్..
లీకులు, ప్రాథమిక అంచనాల ప్రకారం ఈ ఫోన్‌లో 6.78 అంగుళాల డిస్‌ప్లే, 120Hz రిఫ్రెష్ రేట్ ఉండవచ్చని తెలుస్తోంది. ప్రాసెసర్ విషయానికి వస్తే MediaTek Dimensity 6400 చిప్‌సెట్‌ను ఉపయోగించే అవకాశం ఉందని ప్రచారం జరుగుతోంది. ఫొటోగ్రఫీ కోసం 50MP ప్రధాన కెమెరా, సెల్ఫీలు, వీడియో కాల్స్ కోసం 8MP ఫ్రంట్ కెమెరా ఉండవచ్చని అంచనా వేస్తున్నారు. సాఫ్ట్‌వేర్ పరంగా Android 16 ఆధారిత HiOS 16తో ఈ ఫోన్ రావచ్చని సమాచారం. అలాగే IP64 రేటింగ్ ఉండే అవకాశం కూడా ఉంది.
6,500mAh బ్యాటరీ..
బ్యాటరీ విభాగంలోనూ Tecno కొత్త ఫోన్‌పై అంచనాలు ఉన్నాయి. ప్రస్తుత Spark 50 మోడల్‌లో 6,500mAh బ్యాటరీ ఉన్నట్లు సమాచారం. ఇదే సామర్థ్యాన్ని Spark 50s 5Gలోనూ అందిస్తారా అనేది తెలియాల్సి ఉంది. 45W వైర్డ్ ఫాస్ట్ ఛార్జింగ్ సపోర్ట్ ఉండవచ్చనే ప్రచారం కూడా ఉంది. ప్రస్తుతం ఈ ఫోన్ ధర, RAM, స్టోరేజ్ వేరియంట్లు, బ్యాటరీ సామర్థ్యం వంటి వివరాలు అధికారికంగా వెల్లడికావాల్సి ఉంది. లాంచ్ సందర్భంగా కంపెనీ పూర్తి స్పెసిఫికేషన్లు ప్రకటించిన తర్వాతే ఫోన్‌పై స్పష్టత రానుంది.