ఆడవాళ్లకు అదిరిపోయే ఆఫర్.. మీ పని మీరు చేస్తూనే గంటకు రూ.250 సంపాదించే ఛాన్స్! ఎలా అంటే?
మీ ఇంట్లో మామిడికాయలు కోస్తున్నారా? అయితే మీకు డబ్బులు వస్తాయి. బట్టలు మడతపెడుతున్నారా? అకౌంట్లో క్యాష్ పడుతుంది. ఇదెలా సాధ్యం అనుకుంటున్నారా? ఆర్టిఫిషియల్ ఇంటెలిజెన్స్ (AI) పుణ్యమా అని ఇప్పుడు దక్షిణ భారతదేశంలో ఇదొక కొత్త ట్రెండ్గా మారిపోయింది. ముఖ్యంగా చెన్నై లాంటి నగరాల్లో గృహిణులు ఇంట్లో పనులు చేస్తూనే గంటకు 250 రూపాయల వరకు సంపాదిస్తున్నారు. అదెలానో తెలుసుకుందాం పదండి.
Updated on: Aug 01, 2026 | 7:17 PM
టెక్నాలజీ మారుతోంది. భవిష్యత్తు అంతా హ్యూమనాయిడ్ రోబోలదే అని నిపుణులు చెబుతున్నారు. ఈ రోబోలు అచ్చం మనుషుల్లాగే పనిచేయాలి. అందుకోసం మనుషులు ఇంట్లో చేసే పనులను వీడియో తీసి వాటికి శిక్షణగా ఇస్తున్నారు. ఒక స్మార్ట్ఫోన్ను తలకు కట్టుకుని, పనులు చేస్తూ వీడియోలు రికార్డ్ చేస్తున్నారు. ఫస్ట్-పర్సన్ వ్యూ విధానంలో ఈ వీడియోలు రికార్డ్ చేస్తున్నారు. మామిడికాయలు కోయడం, బట్టలు మడతపెట్టడం లాంటి పనులను కెమెరాలో బంధిస్తున్నారు. ఇలాంటి డేటా రోబోలకు చాలా అవసరం. ప్రోగ్రామింగ్ ద్వారా కాకుండా, మనుషుల వీడియోలు చూసి నేర్చుకునేలా ఈ అధునాతన రోబోలను తయారు చేస్తున్నారు.
ఎలన్ మస్క్ కు చెందిన టెస్లా , ఫిగర్ ఏఐ లాంటి అగ్రశ్రేణి కంపెనీలు ఇలాంటి రోబోలను తయారు చేసే పనిలో పడ్డాయి. మనుషుల్లా పనిచేసే రోబోలను మార్కెట్లోకి తెచ్చేందుకు తీవ్రంగా శ్రమిస్తున్నాయి. ఇందుకోసం ఆయా సంస్థలకు భారీగా డేటా అవసరం అవుతోంది. అందుకే మన దేశం నుంచి, ముఖ్యంగా దక్షిణ భారతదేశం నుంచి ఈ వీడియో డేటాను కొనుగోలు చేస్తున్నాయి.
ఈ వీడియో డేటాను సేకరించడంలో ఆబ్జెక్ట్వేస్, మైక్రో1 లాంటి కంపెనీలు కీలకంగా వ్యవహరిస్తున్నాయి. ఆబ్జెక్ట్వేస్ సంస్థ ఈ వీడియోలను విశ్లేషించి, లేబుల్స్ వేసి అమెరికాలోని టెక్ కంపెనీలకు పంపుతోంది. మైక్రో1 లాంటి అమెరికన్ కంపెనీలు నెలకు లక్షా 60 వేల గంటల వీడియోలను సేకరిస్తున్నా.. తమకు ఈ డేటా ఇంకా సరిపోవడం లేదని చెబుతున్నాయి.
చెన్నైకి చెందిన నాగరెడ్డి శ్రీరామచంద్ర అనే గృహిణి, తలకు స్మార్ట్ఫోన్ కట్టుకుని మామిడికాయలు కోస్తూ రోబోలకు శిక్షణ ఇస్తోంది. ఇంట్లో పనులు చేస్తే గంటకు 250 రూపాయలు ఎవరు ఇస్తారు? భవిష్యత్తులో నేనే ఒక రోబోను కొంటానేమో అని ఆమె సంతోషంగా చెబుతోంది.
కేవలం ఇళ్లలోనే కాదు.. టెక్స్టైల్ ఫ్యాక్టరీల్లో పనిచేసే కార్మికులు కూడా స్మార్ట్ గ్లాసెస్, హెడ్ కెమెరాలు ధరించి పనులు చేస్తున్నారు. కరూర్ లాంటి ప్రాంతాల్లో ఈ దృశ్యాలు ఇప్పుడు సర్వసాధారణంగా మారాయి. 2050 నాటికి ప్రపంచవ్యాప్తంగా వంద కోట్ల హ్యూమనాయిడ్ రోబోలు వస్తాయని ప్రముఖ సంస్థ మోర్గాన్ స్టాన్లీ అంచనా వేస్తోంది.
ఆర్టిఫిషియల్ ఇంటెలిజెన్స్ వల్ల భవిష్యత్తులో ఉద్యోగాలు పోతాయనే ఆందోళన ఒకవైపు ఉన్నా.. ప్రస్తుతం ఇలాంటి కొత్త ఉపాధి అవకాశాలు రావడం గమనార్హం. అయితే, మనుషులు నేర్పుతున్న విద్యతో రేపు రోబోలు మన పనులనే పూర్తిగా లాగేసుకుంటాయా అనే చర్చ కూడా ఐటీ వర్గాల్లో నడుస్తోంది. ఏది ఏమైనా.. మన వంటగదులు ఇప్పుడు గ్లోబల్ AI విప్లవానికి కేంద్రాలుగా మారాయి.
మరిన్ని సైన్స్ అండ్ టెక్నాలజీ వార్తల కోసం ఇక్కడ క్లిక్ చేయండి.
