లగ్జరీ ఇంటీరియర్ సహా MG Windsor ఈవీ Indulge Edition పూర్తి వివరాలివే
ఎలక్ట్రిక్ కార్ల మార్కెట్లో తనదైన గుర్తింపు తెచ్చుకున్న MG Motor మరో కొత్త ఎడిషన్‌ను తీసుకొచ్చింది. MG Windsor EV Indulge Edition పేరుతో విడుదలైన ఈ మోడల్‌లో కొత్త షాడో గోల్డ్ కలర్, ప్రత్యేకమైన ఇంటీరియర్, వెనుక ప్రయాణికుల కోసం అదనపు సౌకర్యాలను అందించారు. రూ.17.89 లక్షల ధరతో వచ్చిన ఈ స్పెషల్ ఎడిషన్‌లో మరిన్ని విశేషాలు ఉన్నాయి.
కారులో ప్రయాణించేటప్పుడు లగ్జరీ అనుభూతితో పాటు వెనుక సీట్లలోనూ మెరుగైన సౌకర్యాలు కోరుకునేవారికి MG కొత్త ఎలక్ట్రిక్ కారు ఆసక్తికరమైన ఎంపికగా నిలవనుంది. MG Windsor EV Indulge Editionలో ప్రత్యేకమైన కలర్, ప్రైవసీ స్క్రీన్, అదనపు కుషన్లు వంటి ఫీచర్లు ఆకర్షిస్తున్నాయి. అయితే, బ్యాటరీ విషయంలో మాత్రం కంపెనీ ఒక పరిమితిని విధించింది.
ప్రత్యేకమైన ఇంటీరియర్!
MG Windsor EV Indulge Editionలో ప్రధాన ఆకర్షణ కొత్త షాడో గోల్డ్ ఎక్స్‌టీరియర్ కలర్. దీనికి బ్లాక్ అల్లాయ్ వీల్స్‌, వెనుక క్వార్టర్ గ్లాస్‌పై Indulge బ్యాడ్జింగ్‌ను జోడించారు. 18 అంగుళాల అల్లాయ్ వీల్స్‌తో పాటు LED లైటింగ్‌, బాడీ క్లాడింగ్‌, బ్లాక్ రూఫ్‌, బ్లాక్ ORVMలు కొనసాగుతున్నాయి. స్టాండర్డ్ మోడల్‌తో పోలిస్తే డిజైన్‌లో పెద్దగా మార్పులు లేకపోయినా, కొత్త రంగు, ప్రత్యేక బ్యాడ్జింగ్ ఈ ఎడిషన్‌కు భిన్నమైన రూపాన్ని ఇస్తాయి.
క్యాబిన్‌లో బ్లాక్ అండ్ టాన్ కలర్ లెదరెట్ సీట్ అప్‌హోల్స్టరీని అందించారు. వెనుక ప్రయాణికుల కోసం రూఫ్‌కు అమర్చిన ఫ్లిప్‌డౌన్ స్క్రీన్‌ను కొత్తగా చేర్చారు. MG దీనిని ‘ప్రైవ్ స్క్రీన్’గా పేర్కొంటోంది. అయితే, దీని సైజ్‌, పూర్తి పనితీరు వివరాలను కంపెనీ వెల్లడించలేదు.
ముందు సీట్ల హెడ్‌రెస్ట్‌లపై Indulge అక్షరాలు కనిపిస్తాయి. ముందు ప్రయాణికుల కోసం నెక్ కుషన్లు, వెనుక సీట్లలో కూర్చునేవారి కోసం పిల్లోలను కూడా అందిస్తున్నారు. ఇతర ఫీచర్లు టాప్ స్పెక్ Essence వేరియంట్ మాదిరిగానే ఉంటాయి. అదనంగా వెనుక సన్‌షేడ్‌లు, 3D మ్యాట్స్‌, క్రోమ్ గ్రిల్ యాక్సెంట్స్‌, బంపర్ కార్నర్ ప్రొటెక్టర్లు, బాడీ సైడ్ మౌల్డింగ్‌, లెదర్ కీ కవర్ వంటి యాక్సెసరీలను ఎంపిక చేసుకోవచ్చు.
332 కి.మీ. రేంజ్..
MG Windsor EV Indulge Editionలో 38kWh బ్యాటరీ ప్యాక్‌ను మాత్రమే అందిస్తున్నారు. కంపెనీ ప్రకటించిన వివరాల ప్రకారం, ఒక్కసారి ఛార్జ్ చేస్తే 332 కిలోమీటర్ల వరకు ప్రయాణించవచ్చు. ఇందులో ముందు యాక్సిల్‌పై అమర్చిన ఎలక్ట్రిక్ మోటార్ 136hp పవర్‌, 200Nm టార్క్‌ను ఉత్పత్తి చేస్తుంది.
ఇదే MG Windsor EVలో 52.9kWh పెద్ద బ్యాటరీ ప్యాక్ ఆప్షన్ కూడా ఉంది. ఆ వెర్షన్‌కు కంపెనీ ప్రకటించిన రేంజ్ 449 కిలోమీటర్లు. అయితే, పెద్ద బ్యాటరీతో కూడిన వేరియంట్‌ను Indulge Editionలో అందించడం లేదు. వాస్తవ డ్రైవింగ్ రేంజ్ ట్రాఫిక్‌, వాతావరణం, ఏసీ వినియోగం, డ్రైవింగ్ విధానాన్ని బట్టి మారవచ్చు.
ధర విషయానికి వస్తే.. MG Windsor EV Indulge Editionను రూ.17.89 లక్షలకు అందిస్తున్నారు. ఇది సాధారణ Essence వేరియంట్ కంటే రూ.89,000 ఎక్కువ. కొత్త ఎక్స్‌టీరియర్ కలర్‌తో పాటు వెనుక ప్రయాణికుల కోసం అదనపు సౌకర్యాలు కోరుకునేవారిని ఈ ఎడిషన్ ఆకట్టుకునే అవకాశం ఉంది.