ఆడియో లవర్స్‌కి పండగే..! పిచ్చెక్కించే క్లారిటీతో శాంసంగ్​ ఓవర్‌‌‌‌–ఇయర్​ హెడ్‌ఫోన్స్‌

Samsung Over Ear Headphones

శాంసంగ్ సంస్థ తొలిసారిగా ఓవర్-ఇయర్ హెడ్‌ఫోన్స్ మార్కెట్లోకి ప్రవేశించేందుకు సన్నాహాలు చేస్తోంది. గెలాక్సీ H1 కోడ్‌నేమ్‌తో అభివృద్ధి అవుతున్న ఈ హెడ్‌ఫోన్స్‌లో ఏఎన్‌సీ, ఏఐ అసిస్టెంట్ వంటి అధునాతన ఫీచర్లను అందించనున్నారు. త్వరలోనే టెక్ మార్కెట్లో ఇవి ప్రీమియం బ్రాండ్లకు గట్టి పోటీ ఇవ్వనున్నాయి. టెక్ ప్రపంచంలో తీవ్ర చర్చనీయాంశంగా మారిన ఈ సరికొత్త ప్రీమియం ఆడియో గ్యాడ్జెట్‌కు సంబంధించిన పూర్తి విశేషాలు తెలుసుకుందాం..

అధునాతన ఫీచర్ల విశేషాలు

యాప్ కోడింగ్‌లో ఈ హెడ్‌ఫోన్స్‌కు ‘గెలాక్సీ H1’ అని తాత్కాలికంగా పేరు పెట్టినట్లు సమాచారం. అయితే మార్కెట్లోకి అధికారికంగా వచ్చేసరికి దీని పేరు మారే అవకాశం ఉంది. చాలా కాలం తర్వాత శాంసంగ్ ఓవర్-ఇయర్ విభాగంలోకి అడుగుపెడుతుండటంతో టెక్ ప్రియుల్లో భారీ అంచనాలు నెలకొన్నాయి. ఇవి అత్యుత్తమ బ్లూటూత్ కనెక్టివిటీతో పనిచేస్తాయని లీకైన వివరాలు స్పష్టం చేస్తున్నాయి. ఈ శాంసంగ్ గెలాక్సీ హెడ్‌ఫోన్స్‌లో యాక్టివ్ నాయిస్ క్యాన్సిలేషన్ (ANC), అడాప్టివ్ ఆడియో, అంబియంట్ సౌండ్ మోడ్స్ వంటి టాప్-క్లాస్ ఫీచర్లు ఉండే అవకాశం ఉంది.

అంతేకాకుండా ఆర్టిఫిషియల్ ఇంటెలిజెన్స్ (AI) అసిస్టెంట్ సపోర్ట్, మల్టీ-డివైజ్ ఆటో స్విచ్ వంటి ఫీచర్లు వినియోగదారుల అనుభవాన్ని మరింత సులభతరం చేస్తాయి. సాధారణ ఇయర్‌బడ్స్‌తో పోలిస్తే వీటిలో బ్యాటరీ లైఫ్ చాలా ఎక్కువగా ఉండేలా పక్కాగా డిజైన్ చేస్తున్నారట. లాంగ్-లాస్టింగ్ బ్యాటరీ బ్యాకప్ కోరుకునే మ్యూజిక్ లవర్స్‌కు ఇది ఎంతగానో ఉపయోగపడుతుంది.

మార్కెట్లో గట్టి పోటీ

రాబోయే రోజుల్లో శాంసంగ్ గెలాక్సీ H1 మార్కెట్లోకి వస్తే, యాపిల్ ఎయిర్‌పాడ్స్ మాక్స్, సోనీ, జేబీఎల్ వంటి ప్రముఖ దిగ్గజ బ్రాండ్ల ప్రీమియం మోడళ్లకు ఇది గట్టిపోటీ ఇవ్వడం ఖాయం. ప్రస్తుతం ఈ ప్రాజెక్ట్ ప్రారంభ దశలోనే ఉన్నందున, వచ్చే ఏడాది ఆరంభంలో జరగబోయే గెలాక్సీ అన్‌ప్యాక్డ్ ఈవెంట్‌లో శాంసంగ్ వీటిని అధికారికంగా పరిచయం చేసే అవకాశం కనిపిస్తోంది. సాంకేతిక ప్రియులు ఎంతగానో ఎదురుచూస్తున్న ఈ కొత్త ఆడియో డివైజ్ మార్కెట్లో ఎలాంటి సంచలనాలు సృష్టిస్తుందో వేచి చూడాలి.