Virat Kohli: విండీస్‌పై కోహ్లీకి విచిత్రమైన రికార్డ్.. ఈసారి కూడా ఫెయిలైతే హ్యాట్రిక్!

Virat Kohli: భారత క్రికెట్ జట్టు మాజీ కెప్టెన్, రన్ మెషీన్ విరాట్ కోహ్లీ మరోసారి మైదానంలోకి దిగడానికి సిద్ధమయ్యాడు. సెప్టెంబర్ 27 నుంచి భారత్, వెస్టిండీస్ జట్ల మధ్య మూడు మ్యాచ్‌ల కీలకమైన వన్డే సిరీస్ ప్రారంభం కానుంది. ఈ సిరీస్‌లో అందరి దృష్టి స్టార్ బ్యాటర్లు రోహిత్ శర్మ, విరాట్ కోహ్లీలపైనే నిలిచింది. అయితే ముఖ్యంగా విరాట్ కోహ్లీ విషయంలో సోషల్ మీడియాలో రకరకాల చర్చలు నడుస్తున్నాయి. ఇందుకు ప్రధాన కారణం.. గతంలో వెస్టిండీస్‌తో జరిగిన వన్డే సిరీస్‌లలో కోహ్లీ ఆశించిన స్థాయిలో రాణించకపోవడమే. ఈసారైనా ఆయన తన బ్యాట్‌తో సత్తా చాటుతారా లేదా అనేదానిపై సర్వత్రా ఉత్కంఠ నెలకొంది.

విండీస్‌పై గత రెండు సిరీస్‌లలో కోహ్లీ ప్రదర్శన

వెస్టిండీస్ జట్టుతో జరిగిన గత రెండు వన్డే సిరీస్‌లలో విరాట్ కోహ్లీ ప్రదర్శన కాస్త నిరాశజనకంగానే ఉంది. 2022లో విండీస్‌తో జరిగిన వన్డే సిరీస్‌లో కోహ్లీ కేవలం 3 మ్యాచ్‌లలో కలిపి 26 పరుగులు మాత్రమే చేయగలిగాడు. ఆ సిరీస్‌లో ఆయన బ్యాటింగ్ యావరేజ్ కేవలం 8.66 మాత్రమే ఉండటం గమనార్హం. అలాగే అంతకుముందు 2019లో జరిగిన సిరీస్‌లో కూడా మూడు మ్యాచ్‌లలో కలిపి కేవలం 89 పరుగులు మాత్రమే చేశారు. ఒకవేళ ఈసారి జరిగే సిరీస్‌లో కూడా కోహ్లీ రాణించలేకపోతే, అది ఆయన కెరీర్‌లో వెస్టిండీస్‌పై అత్యంత చెత్త ప్రదర్శనల హ్యాట్రిక్ అవుతుంది.

ప్రస్తుత ఫామ్ ఎలా ఉందంటే ?

గత సిరీస్‌లలో వైఫల్యాలు ఎదురైనప్పటికీ, ప్రస్తుత కాలంలో విరాట్ కోహ్లీ సూపర్ ఫామ్‌లో ఉన్నాడు. ఇంగ్లాండ్‌తో జరిగిన చివరి వన్డే సిరీస్‌లో కోహ్లీ అద్భుతంగా రాణించాడు. కార్డిఫ్‌లో 65 పరుగులు, లార్డ్స్‌లో 74 పరుగుల కీలక ఇన్నింగ్స్‌లు ఆడి జట్టు విజయంలో కీలక పాత్ర పోషించారు. ఈ ఏడాది వన్డే క్రికెట్‌లో కోహ్లీ కేవలం 6 మ్యాచ్‌లలోనే 64 సగటుతో ఏకంగా 384 పరుగులు సాధించారు. ఇందులో ఒక సెంచరీ, మూడు అర్ధశతకాలు కూడా ఉన్నాయి. కాబట్టి ప్రస్తుత ఫామ్‌ను చూస్తే ఆయన ఈసారి కచ్చితంగా అదరగొట్టడం ఖాయమని అభిమానులు ధీమా వ్యక్తం చేస్తున్నారు.

వెస్టిండీస్‌పై ఆల్‌టైమ్ రికార్డులు

వెస్టిండీస్‌తో జరిగిన గత రెండు సిరీస్‌లు మినహాయిస్తే, ఓవరాల్‌గా కరీబియన్ జట్టుపై కోహ్లీకి అద్భుతమైన ట్రాక్ రికార్డ్ ఉంది. ఇప్పటివరకు విండీస్‌పై 66.5 సగటుతో ఏకంగా 2261 పరుగులు సాధించారు. ఇందులో వెస్టిండీస్‌పై ఆయన బ్యాట్ నుంచి 9 సెంచరీలు, 11 హాఫ్ సెంచరీలు వచ్చాయి. కొత్త సిరీస్, కొత్త రోజు కావడంతో కోహ్లీ తన పాత రికార్డులను గుర్తుచేసుకుంటూ మళ్లీ చెలరేగిపోవడానికి సిద్ధంగా ఉన్నారు. అభిమానులు కూడా కింగ్ కోహ్లీ బ్యాటింగ్ విన్యాసాలు కోసం ఎంతో ఆసక్తిగా ఎదురుచూస్తున్నారు.

మరిన్ని క్రీడా వార్తల కోసం ఇక్కడ క్లిక్ చేయండి..