132 ఫోర్లు, 168 సిక్స్‌లతో 1670 పరుగులు.. క్రిస్ గేల్‌కే మెంటలెక్కించేలా వైభవ్ విధ్వంసం..

Vaibhav Sooryavanshi Vs Chris Gayle

Vaibhav Sooryavanshi vs Chris Gayle: టీ20 క్రికెట్ ప్రపంచంలో ‘యూనివర్స్ బాస్’గా పేరుగాంచిన క్రిస్ గేల్ విధ్వంసానికి సరికొత్త అర్ధాన్ని ఇచ్చాడు. అటువంటి దిగ్గజ ఆటగాడి ఆరంభ గణాంకాలను ఓ చిన్నవయస్కుడు అధిగమిస్తాడని ఎవరూ ఊహించి ఉండరు. వైభవ్ సూర్యవంశీ మైదానంలోకి దిగితే ప్రత్యర్థి బౌలర్లకు చుక్కలే. తొలి 40 టీ20 ఇన్నింగ్స్ బౌండరీల వర్షంతో రూపుదిద్దుకున్నాయి. విశ్వసనీయమైన ప్రతిభకు అద్భుతమైన ఫామ్ తోడైతే ఫలితాలు ఎలా ఉంటాయో వైభవ్ ప్రదర్శన స్పష్టం చేస్తోంది.

గణాంకాల్లో స్పష్టమైన ఆధిపత్యం..

తొలి 40 ఇన్నింగ్స్ ముగిసేసరికి వైభవ్ ఏకంగా 1670 పరుగులు సాధించాడు. క్రిస్ గేల్ తన మొదటి 40 ఇన్నింగ్స్‌ల్లో 1189 పరుగులు మాత్రమే చేయగలిగాడు. సగటు విషయంలోనూ వైభవ్ 42.82 పాయింట్లతో గేల్ (33.97) కంటే చాలా ముందున్నాడు. క్లాస్ ప్లస్ మాస్ ఆటతీరుతో ప్రత్యర్థులపై నిరంతరం ఒత్తిడి పెంచుతూ ప్రతి మ్యాచ్‌లోనూ కీలక పరుగులు రాబడుతున్నాడు.

స్ట్రైక్ రేట్ సునామీ.. సెంచరీల మోత..

వైభవ్ సాధించిన స్ట్రైక్ రేట్ క్రికెట్ పండితులను సైతం ఆశ్చర్యానికి గురిచేస్తోంది. ఏకంగా 216.32 స్ట్రైక్ రేట్‌తో విరుచుకుపడుతూ టి20 ఫార్మాట్ అసలు మజాను చూపుతున్నాడు. ఇదే సమయంలో క్రిస్ గేల్ స్ట్రైక్ రేట్ 137.29గా నమోదైంది. ఈ 40 ఇన్నింగ్స్‌ల ప్రయాణంలో వైభవ్ 4 సెంచరీలు, 8 హాఫ్ సెంచరీలు సాధించడం విశేషం. గేల్ తన ఆరంభంలో ఒకే ఒక్క సెంచరీ, 7 అరసెంచరీలు నమోదు చేశాడు.

రాబోయే కాలానికి బిగ్ సంకేతం..

వయసు చిన్నదే అయినా వైభవ్ ఆడే షాట్లలో పరిణతి, ఆత్మవిశ్వాసం కొట్టొచ్చినట్లు కనిపిస్తాయి. పవర్‌ప్లేలో చెలరేగిపోవడం, స్పిన్నర్లను ఒత్తిడిలోకి నెట్టడంలో ఈ కుర్రాడి శైలి ప్రత్యేకమైనది. అంతర్జాతీయ స్థాయిలో సుదీర్ఘకాలం ఏలేందుకు కావలసిన అన్ని లక్షణాలు వైభవ్‌లో పుష్కలంగా ఉన్నాయని క్రీడా విశ్లేషకులు స్పష్టం చేస్తున్నారు.

క్రిస్ గేల్ రికార్డులను అధిగమించడం అంటే మామూలు విషయం కాదు. ఈ విధ్వంసకర ప్రదర్శనతో వైభవ్ సూర్యవంశీ భారత క్రికెట్ భవిష్యత్తుపై అభిమానుల్లో భారీ అంచనాలను పెంచేశాడు. రాబోయే కాలంలో ఈ టీనేజ్ సంచలనం మరిన్ని అంతర్జాతీయ రికార్డులను తిరగరాయడం ఖాయంగా కనిపిస్తోంది.

మరిన్ని క్రీడా వార్తల కోసం ఇక్కడ క్లిక్ చేయండి..