India A vs England Lions: 4 ఓవర్లలో 4 వికెట్లు.. ఇంగ్లాండ్ బ్యాటింగ్ లైనప్ కి చుక్కలు చూపించిన CSK బౌలర్!

Khalil Ahmed

ఇంగ్లాండ్‌లో జరుగుతున్న రెండో అనధికారిక టెస్టులో ఇండియా A జట్టు తరఫున ఖలీల్ అహ్మద్ తన అద్భుతమైన బౌలింగ్‌తో మ్యాచ్‌పై పట్టు సాధించాడు. లయన్స్‌తో జరిగిన ఈ మ్యాచ్‌లో ఖలీల్ నాలుగు కీలక వికెట్లు తీసి ఇంగ్లాండ్ లయన్స్‌ను కుప్పకూల్చాడు. 4 ఓవర్లలోనే 4 వికెట్లు తీయడం ద్వారా అతను తన పవర్‌ను రుజువు చేశాడు. ఇంగ్లాండ్ లయన్స్ బలమైన స్థితిలో ఉన్న సమయంలో ఖలీల్ దాడికి దిగాడు. అతని పొడవైన శరీరాన్ని ఉపయోగించి షార్ట్ పిచ్ బంతులతో బ్యాటర్లను ఇబ్బంది పెట్టే ప్రయత్నం చేశాడు. వీటికి తోడుగా, అటు మిడిల లెంగ్త్, ఇటు ఫుల్ లెంగ్త్ బంతులతో బ్యాటర్లను ఆశ్చర్యానికి గురి చేశాడు. 51వ ఓవర్లో జోర్డాన్ కాక్స్‌ను ఔట్ చేసి ఖలీల్ దూకుడు ప్రారంభమయ్యాడు. అనంతరం 55వ ఓవర్లో వరుస బంతుల్లో జేమ్స్ రెవ్, జార్జ్ హిల్‌లను పెవిలియన్‌కి పంపించాడు.

ఆ తర్వాత ఖలీల్ తన ఎడమచేతి పేస్ బౌలింగ్‌కు తగిన యాంగిల్‌ను వినియోగించుకుని, క్రిస్ వోక్స్‌ను ఓడించాడు. దీనివల్ల ఇంగ్లాండ్ లయన్స్ స్కోరు 229/7 వద్ద నిలిచింది. జోర్డాన్ కాక్స్, జేమ్స్ రెవ్ వికెట్లు బ్యాట్స్‌మెన్‌కు దూరంగా దూసుకెళ్లే డెలివరీల ద్వారా రాగా, జార్జ్ హిల్‌ను ఖలీల్ అద్భుతమైన యార్కర్‌తో క్లీన్‌బోల్ చేశాడు. ఇంగ్లాండ్ లయన్స్ జట్టు తొలి ఇన్నింగ్స్ చివరిలో ఆధిక్యంలోకి వెళ్ళే అవకాశం ఉండగా, ఖలీల్ స్పెల్‌తో వారి ఆశలు చల్లారిపోయాయి. దీంతో భారత్ A జట్టు 348 పరుగుల ఆధిక్యాన్ని సాధించే దిశగా ముందుకెళ్తోంది.

ఖలీల్‌తో పాటు తుషార్ దేశ్‌పాండే రెండు వికెట్లు పడగొట్టగా, తనుష్ కోటియన్, అన్షుల్ కాంబోజ్ ఒక్కొక్క వికెట్ తీశారు. ఖలీల్ అహ్మద్ ప్రదర్శన అతనిలోని టాలెంట్‌ను బయటపెట్టింది. ముఖ్యంగా ఇండియా ప్రధాన జట్టు త్వరలో ఇంగ్లాండ్‌తో టెస్ట్ సిరీస్ ఆడనుండగా, ఖలీల్ ఈ ఫామ్‌ను కొనసాగిస్తే, అతను గాయాల కారణంగా కోల్పోయే ప్లేయర్ల స్థానాన్ని భర్తీ చేయగలడు. ఖలీల్ తక్కువ అవకాశం వచ్చినా తన శైలితో ప్రత్యర్థులపై ప్రభావం చూపగలడు అనే నమ్మకాన్ని అందిస్తున్నాడు. ఇది భారత క్రికెట్‌కు మంచి సంకేతంగా చెప్పుకోవచ్చు.

మరిన్ని క్రికెట్ వార్తల కోసం ఇక్కడ క్లిక్ చేయండి..