Hardik Pandya: ఏంటి హార్దిక్ భయ్యా.. దరిద్రం నిన్నే పట్టుకుంది.. మళ్లీ గాయపడిన పాండ్యా

Hardik Pandya: భారత క్రికెట్ జట్టు స్టార్ ఆల్‌రౌండర్ హార్దిక్ పాండ్యా రీఎంట్రీ ఇస్తారనుకుంటే మళ్లీ తీవ్ర నిరాశ ఎదురైంది. మైదానంలోకి అడుగుపెట్టాలని ఉత్సాహంగా ఉన్న హార్దిక్‌కు గాయం మరోసారి బ్రేక్ వేసింది. అక్టోబర్ 6 నుంచి ప్రారంభం కానున్న ఆస్ట్రేలియా ఏ జాతీయ జట్టుతో జరిగే సిరీస్ కోసం హార్దిక్‌ను ఇండియా ఏ జట్టులో ఎంపిక చేశారు. అయితే ప్రాక్టీస్ సమయంలో ఆయన మళ్లీ గాయం బారిన పడ్డారు. దీంతో ఆయన రీ ఎంట్రీ పై నీలి నీడలు కమ్ముకున్నాయి.

టైమ్స్ ఆఫ్ ఇండియా నివేదిక ప్రకారం.. ఈ వారంలో హార్దిక్ పాండ్యా తన కుడి కాಲು పిక్క భాగంలో తీవ్రమైన నొప్పి ఉన్నట్లు ఫిర్యాదు చేశారు. దీంతో బీసీసీఐ వైద్య బృందం వెంటనే ఆయనకు కొత్తగా స్కానింగ్ పరీక్షలు నిర్వహించింది. గత కొంతకాలంగా ఈ నొప్పితో బాధపడుతున్న ఆయన, సెంటర్ ఆఫ్ ఎక్సలెన్స్‌లో కోలుకోవడానికి ఎంతో కష్టపడ్డారు. కానీ సమస్య పూర్తిగా తగ్గకపోవడంతో, వైద్యులు ఆయనకు మరో 10 నుంచి 15 రోజుల పాటు ఎలాంటి శారీరక శ్రమ చేయకుండా పూర్తి విశ్రాంతి తీసుకోవాలని స్పష్టంగా సూచించారు.

న్యూజిలాండ్ సిరీస్‌కు కూడా దూరం

ఆస్ట్రేలియా ‘ఏ’ సిరీస్ ద్వారా మళ్లీ ఫామ్‌లోకి వచ్చి, త్వరలో జరిగే న్యూజిలాండ్‌తో ఐదు మ్యాచ్‌ల టీ20 సిరీస్ ద్వారా అంతర్జాతీయ క్రికెట్‌లోకి రీఎంట్రీ ఇవ్వాలని హార్దిక్ భావించారు. కానీ ప్రస్తుత పరిస్థితుల్లో రాబోయే రెండు వారాల పాటు ఆయన మైదానానికి దూరంగా ఉండాల్సి రావడంతో కివీస్‌తో జరిగే టీ20 సిరీస్‌లోనూ ఆయన ఆడటం దాదాపు అసాధ్యంగా మారింది. ఇక ఆ తర్వాత జరిగే వన్డే సిరీస్ విషయంలోనూ సెలెక్టర్లు ఎలాంటి రిస్క్ తీసుకోవడానికి ఇష్టపడట్లేదు. 2027 వన్డే ప్రపంచ కప్‌ను దృష్టిలో ఉంచుకుని మేనేజ్‌మెంట్ ఆయన ఫిట్‌నెస్ పట్ల చాలా జాగ్రత్తగా వ్యవహరిస్తోంది.

సూర్యాంశ్‌కు అవకాశం

హార్దిక్ పాండ్యా గాయంపై బీసీసీఐ నుంచి ఇంకా అధికారిక ప్రకటన వెలువడనప్పటికీ, ఆయన స్థానంలో ఆస్ట్రేలియా ‘ఏ’తో జరిగే మూడు మ్యాచ్‌ల సిరీస్‌కు యువ ఆటగాడు సూర్యాంశ్ షెడ్గేను ఎంపిక చేసే అవకాశాలున్నట్లు తెలుస్తోంది. ప్రస్తుతం సూర్యాంశ్ కూడా సెంటర్ ఆఫ్ ఎక్సలెన్స్‌లోనే శిక్షణ పొందుతున్నారు. హార్దిక్ వంటి కీలక ఆటగాడు తరచూ గాయాల బారిన పడటం టీమిండియా మేనేజ్‌మెంట్‌ను ఆందోళనకు గురిచేస్తోంది.

మరిన్ని క్రికెట్ వార్తల కోసం ఇక్కడ క్లిక్ చేయండి..