వరల్డ్ కప్ 2019: శ్రీలంకపై దక్షిణాఫ్రికా ఘన విజయం

వరల్డ్ కప్‌లో భాగంగా శుక్రవారం శ్రీలంక-సౌతాఫ్రికా మధ్య జరిగిన మ్యాచ్‌లో సఫారీ జట్టు ఘన విజయం సాధించింది. తొలుత బ్యాటింగ్ చేసిన శ్రీలంక 203 పరుగులకే ఆలౌట్ కాగా, ఆ లక్ష్యాన్ని సౌతాఫ్రికా బ్యాట్స్‌మెన్ అలవోకగా ఛేదించారు.  ఛేజింగ్‌కు దిగిన సౌతాఫ్రికా ఓపెనర్ డికాక్(15) తక్కువ పరుగులకే ఔటైనా, హషీం ఆమ్లా (80), కెప్టెన్ డూప్లెసిస్ (96) మరో వికెట్ పడకుండా లక్ష్యాన్ని పూర్తి చేశారు. శ్రీలంక బౌలర్లలో మలింగకు ఒక వికెట్ దక్కింది. అంతకుముందు బ్యాటింగ్‌కు దిగిన శ్రీలంక సఫారీ బౌలర్లను ఎదుర్కొనడానికి చాలా తంటాలు పడింది. ఆ జట్టులో ఏ ఒక్క బ్యాట్స్‌మన్ 30 పరుగులకు మించి చేయలేదంటే ఎంత కష్టపడ్డారో అర్థం చేసుకోవచ్చు. సఫారీ బౌలర్లు అద్భుత ప్రదర్శన చేశారు. రబాడా 2, క్రిస్ మోరిస్ 3, ప్రిటోరియస్ 3 వికెట్లు, జెపి డుమిని, ఫెలుక్వాయో చెరో వికెట్ తీశారు. ప్రిటోరియస్‌కు మ్యాన్ ఆఫ్ ద మ్యాచ్ అవార్డు దక్కింది.