Imran Khan : ఇమ్రాన్ ఖాన్ కోసం గళమెత్తిన గవాస్కర్, కపిల్ దేవ్.. పాక్ ప్రభుత్వానికి దిగ్గజాల లేఖ

Imran Khan : పాకిస్థాన్ మాజీ ప్రధాని, 1992 ప్రపంచకప్ విజేత కెప్టెన్ ఇమ్రాన్ ఖాన్ జైలులో ఎదుర్కొంటున్న పరిస్థితులపై అంతర్జాతీయ క్రికెట్ దిగ్గజాలు స్పందించారు. ఇమ్రాన్ ఖాన్ ఆరోగ్యం క్షీణిస్తోందన్న వార్తల నేపథ్యంలో భారత దిగ్గజాలు సునీల్ గవాస్కర్, కపిల్ దేవ్ సహా 14 మంది మాజీ అంతర్జాతీయ కెప్టెన్లు పాక్ ప్రభుత్వానికి ఒక బహిరంగ లేఖ రాశారు. ఆయనకు మానవీయ కోణంలో చికిత్స అందించాలని, తగిన వైద్య సదుపాయాలు కల్పించాలని వారు పాకిస్థాన్ ప్రధాని షెహబాజ్ షరీఫ్‌కు విజ్ఞప్తి చేశారు.

గత రెండేళ్లుగా జైలులో ఉంటున్న ఇమ్రాన్ ఖాన్ ఆరోగ్యంపై ఆందోళనకర వార్తలు వస్తున్నాయి. ముఖ్యంగా ఆయన కుడి కంటి చూపు 85 శాతం వరకు తగ్గిపోయిందని, కేవలం 15 శాతం మాత్రమే చూపు ఉందని నివేదికలు చెబుతున్నాయి. సరైన సమయంలో వైద్యం అందకపోవడం వల్లే ఈ పరిస్థితి తలెత్తిందని ఆయన కుటుంబ సభ్యులు, లాయర్లు ఆరోపిస్తున్నారు. ఆస్ట్రేలియా క్రికెట్ దిగ్గజం గ్రెగ్ చాపెల్ చొరవతో రూపొందించిన ఈ ప్రత్యేక వినతి పత్రంపై భారత క్రికెట్ దిగ్గజాలు కపిల్ దేవ్, సునీల్ గవాస్కర్‌లతో పాటు స్టీవ్ వా, అలెన్ బోర్డర్, క్లైవ్ లాయిడ్, మైకేల్ అథర్టన్ వంటి అంతర్జాతీయ స్థాయి హేమాహేమీలు సంతకాలు చేయడం విశేషం. ఈ దిగ్గజ కెప్టెన్లందరూ ఏకగ్రీవంగా పాక్ ప్రభుత్వానికి కొన్ని కీలక డిమాండ్లను ముందుంచారు.

ముఖ్యంగా ఇమ్రాన్ ఖాన్ ఆరోగ్యం క్షీణిస్తున్న నేపథ్యంలో, ఆయనకు తక్షణమే అత్యుత్తమ వైద్యం అందించాలని, అది కూడా ఆయన కోరుకున్న వైద్య నిపుణుల పర్యవేక్షణలోనే జరగాలని వారు డిమాండ్ చేశారు. కేవలం వైద్యమే కాకుండా, అంతర్జాతీయ ప్రమాణాలకు లోబడి జైలులో కనీస మానవీయ సౌకర్యాలు కల్పించాలని, ఒంటరితనంతో బాధపడకుండా ఆయన కుటుంబ సభ్యులను, పిల్లలను కలుసుకునేందుకు తగిన అనుమతులు ఇవ్వాలని వారు కోరారు. అలాగే, ఏ రాజకీయ కక్షలు లేకుండా ఆయనపై ఉన్న చట్టపరమైన ప్రక్రియను ఎటువంటి జాప్యం లేకుండా అత్యంత పారదర్శకంగా నిర్వహించాలని వారు స్పష్టం చేశారు.

మైదానంలో భారత్, పాకిస్థాన్ మధ్య ఎంతటి తీవ్రమైన పోటీ ఉన్నప్పటికీ, ఇమ్రాన్ ఖాన్ క్రీడారంగానికి చేసిన అసమాన సేవలను యావత్ ప్రపంచం గౌరవిస్తుందని ఈ సందర్భంగా వారు గుర్తు చేశారు. “మైదానంలో ఆట ముగిసి స్టంప్స్ తీసిన తర్వాత వైరం కూడా ముగిసిపోతుంది, కానీ ఒక క్రీడాకారుడిగా సంపాదించుకున్న గౌరవం మాత్రం శాశ్వతంగా నిలిచి ఉంటుంది” అని ఈ మాజీ కెప్టెన్లు తమ లేఖలో అత్యంత భావోద్వేగంగా పేర్కొన్నారు.

ఇమ్రాన్ ఖాన్‌ను కేవలం ఒక రాజకీయ నాయకుడిగానే కాకుండా, ఒక దేశానికి ప్రధానమంత్రిగా పనిచేసిన వ్యక్తిగా, ప్రపంచ స్థాయి క్రీడా చిహ్నంగా (Global Sporting Icon) పరిగణించాలని వారు విజ్ఞప్తి చేశారు. రాజకీయాలకు అతీతంగా ఒక క్రీడాకారుడికి దక్కాల్సిన కనీస గౌరవం, మర్యాద ఆయనకు దక్కాలని, మానవతా దృక్పథంతో ఆయన ప్రాథమిక హక్కులను కాపాడాలని ఈ అంతర్జాతీయ క్రికెట్ కూటమి పాకిస్థాన్ ప్రభుత్వాన్ని గట్టిగా కోరింది.

మరిన్ని క్రీడా వార్తల కోసం ఇక్కడ క్లిక్ చేయండి..