Hardik Pandya : బీసీసీఐ మాస్టర్ ప్లాన్.. 2027 వరల్డ్ కప్ కోసం హార్దిక్ పాండ్యాను రిజర్వ్‌లో ఉంచుతున్న బోర్డు

Hardik Pandya : భారత స్టార్ ఆల్‌రౌండర్ హార్దిక్ పాండ్యా గాయం నుంచి కోలుకునే ప్రక్రియను బీసీసీఐ చాలా జాగ్రత్తగా పరిశీలిస్తోంది. ఐపిఎల్ 2026 చివరి దశ నుంచి గాయాలతో బాధపడుతున్న హార్దిక్, ప్రస్తుతం కోలుకునే బాటలో ఉన్నప్పటికీ బీసీసీఐ ఆయన ఎంపిక విషయంలో ఒక కీలక నిర్ణయానికి వచ్చినట్లు నివేదికలు చెబుతున్నాయి. త్వరలో జరగబోయే చిన్న చిన్న ద్వైపాక్షిక సిరీస్‌లలో ఆయనను ఆడించడం కంటే, దీర్ఘకాలిక ఫిట్‌నెస్‌పై దృష్టి సారించడమే ముఖ్యమని బోర్డు భావిస్తోంది.

ఇటీవల తొడ కండరాల గాయం కారణంగా ఆఫ్ఘనిస్థాన్, ఇంగ్లాండ్ వన్డే సిరీస్‌లకు హార్దిక్ దూరమయ్యారు. బీసీసీఐ సెంటర్ ఆఫ్ ఎక్సలెన్స్ (CoE)లో ఆయన రెగ్యులర్‌గా ప్రాక్టీస్ చేస్తూ ఫిట్‌నెస్ క్లియరెన్స్ పొందే దశలో మళ్లీ చిన్నపాటి సమస్యలు ఎదురయ్యాయి. దీనితో ఏదేని ఒక నిర్దిష్ట సిరీస్ కోసం హడావుడిగా పునరాగమనం చేయకుండా, బీసీసీఐ ఆయన కోసం ఒక ప్రత్యేకమైన పెర్ఫార్మెన్స్ బ్లాక్ ప్రోగ్రామ్‌ను రూపొందించింది. ప్రస్తుతం 32 ఏళ్ల హార్దిక్ ఈ ప్రోగ్రామ్ ద్వారా పీక్ ఫిట్‌నెస్ సాధిస్తూ, తన అత్యుత్తమ ప్రదర్శనను తిరిగి పొందే పనిలో ఉన్నారు.

హార్దిక్ పాండ్యా, బీసీసీఐల ప్రధాన లక్ష్యం 2027 వన్డే ప్రపంచకప్ టోర్నీయే. ఆ మెగా టోర్నమెంట్ నాటికి హార్దిక్ పూర్తిస్థాయి ఫిట్‌నెస్‌తో, బౌలింగ్, బ్యాటింగ్ విభాగాల్లో మ్యాచ్ విన్నర్‌గా ఉండటం భారత్‌కు అత్యంత అవసరం. అందుకే ప్రస్తుతం ప్రతి సిరీస్‌లోనూ ఆయనను ఆడించడం ప్రాధాన్యత కాదని బోర్డు వర్గాలు స్పష్టం చేశాయి. రాబోయే ఒక సంవత్సర కాలంలో వరల్డ్ కప్‌ను దృష్టిలో ఉంచుకుని ఆయనను ఎక్కువగా 50 ఓవర్ల ఫార్మాట్‌పైనే దృష్టి పెట్టేలా ప్రణాళికలు రచిస్తున్నారు.

“హార్దిక్ గాయాల చరిత్రను దృష్టిలో ఉంచుకుని ద్విపాక్షిక సిరీస్‌లు ఆడేందుకు ఆయనను తొందరపెట్టడం లేదు” అని ఒక నివేదిక పేర్కొంది. హార్దిక్ ప్రతి మ్యాచ్ ఆల్ రౌండర్‌గా ఆడటం కన్నా, ప్రధాన టోర్నీ సమయానికి 100% ఫిట్‌నెస్‌తో అందుబాటులో ఉండటమే ముఖ్యం. ఆయన కోలుకునే విధానంపై బోర్డు అధికారులు, వైద్య బృందం సంతృప్తికరంగా ఉన్నారని, వరల్డ్ కప్ సమయానికి ఆయన పూర్తి పవర్‌ఫుల్ ఫామ్‌లో ఉంటారని ఆశాభావం వ్యక్తం చేస్తున్నారు. మరోవైపు ఈ గాయాల వివాదం నడుమనే ఐపిఎల్ ట్రేడ్ విండోలో కేకేఆర్ (KKR), సిఎస్‌కే (CSK) జట్లకు హార్దిక్ మారతారనే ఊహాగానాలు కూడా ప్రచారంలో ఉన్నాయి.

మరిన్ని క్రీడా వార్తల కోసం ఇక్కడ క్లిక్ చేయండి..