Asian Games 2026: ఆసియా క్రీడల్లో చరిత్ర సృష్టించిన భారత్.. కబడ్డీలో డబుల్ గోల్డ్ మెడల్స్

Asian Games 2026: జపాన్ వేదికగా జరుగుతున్న ఆసియా క్రీడలు 2026 (Asian Games 2026) ఎనిమిదో రోజు భారత్‌కు అద్భుతమైన విజయాలను అందించింది. ముఖ్యంగా కబడ్డీ విభాగంలో పురుషుల, మహిళల జట్లు రెండూ స్వర్ణ పతకాలను సాధించి చరిత్ర సృష్టించాయి. ఈ రెండు విజయాలతో భారత్ పతకాల సంఖ్య ఏకంగా 28కి చేరింది. మహిళల కబడ్డీ ఫైనల్‌లో భారత్ 37-34 తేడాతో ఇరాన్‌ను ఓడించి గోల్డ్ మెడల్ కైవసం చేసుకోగా, ఆ తర్వాత జరిగిన పురుషుల ఫైనల్‌లోనూ మనోళ్లు 40-34 తేడాతో ఇరాన్‌ను చిత్తు చేసి మరో స్వర్ణాన్ని తమ ఖాతాలో వేసుకున్నారు.

44 ఏళ్ల తర్వాత మారథాన్‌లో చారిత్రాత్మక రికార్డు

ఈ రోజు జరిగిన పోటీలలో అథ్లెటిక్స్ విభాగం నుంచి సావన్ బర్వాల్ దేశానికి చిరస్మరణీయమైన క్షణాలను అందించారు. పురుషుల మారథాన్ పోటీలో సావన్ బర్వాల్ 2:11:37 సమయంలో గమ్యస్థానాన్ని చేరుకుని రజత పతకాన్ని సాధించారు. 1982 తర్వాత ఆసియా క్రీడల మారథాన్‌లో భారత్‌కు పతకం రావడం ఇదే మొదటిసారి కావడం విశేషం. ఈ అద్భుతమైన ప్రదర్శనతో ఆయన తన సొంత జాతీయ రికార్డును కూడా మెరుగుపరుచుకున్నారు. ఈ పతకం ద్వారా భారత్ అథ్లెటిక్స్ పతకాల ఖాతాను మరింత బలపరిచింది.

షూటింగ్, స్క్వాష్‌లోనూ పతకాల పంట

షూటింగ్ విభాగంలోనూ భారత్ తన పట్టును నిలుపుకుంది. మహిళల 50 మీటర్ల రైఫిల్ 3 పొజిషన్స్ టీమ్ ఈవెంట్‌లో తిలోత్తమ సేన్, విదర్శ క వినోద్, ఆషి చౌక్సే త్రయం అద్భుత ప్రదర్శన కనబరిచి రజత పతకాన్ని సొంతం చేసుకుంది. ఇక స్క్వాష్‌ విషయానికి వస్తే, యువ సంచలనం అనాహత్ సింగ్, అభయ్ సింగ్ తమ విభాగాల్లో అద్భుత విజయాలు సాధించి ఫైనల్స్‌కు దూసుకెళ్లారు. అనాహత్ సింగ్ అద్భుతమైన కమ్‌బ్యాక్‌తో ఫైనల్‌కు చేరుకుని కనీసం రజతాన్ని ఖాయం చేసుకోగా, మిక్ైడ్ డబుల్స్‌లో జోష్నా చినప్ప, వెలవన్ సెంథిల్‌కుమార్ జోడీ కాంస్య పతకాన్ని సాధించింది.

పతకాల పట్టికలో టాప్-10 వైపు భారత్ అడుగులు

ఈ విజయాలన్నింటితో కలిపి భారత్ తన పతకాల సంఖ్యను 28కి పెంచుకుంది. ఇందులో 4 స్వర్ణాలు, 11 రజతాలు, 13 కాంస్య పతకాలు ఉన్నాయి. కబడ్డీలో రెండు స్వర్ణాలు రావడంతో భారత్ పతకాల పట్టికలో తన స్థానాన్ని మరింత మెరుగుపరుచుకుంది. బ్యాడ్మింటన్ వంటి ఇతర విభాగాల్లోనూ భారత క్రీడాకారులు తమ పోరాటాన్ని కొనసాగిస్తున్నారు. రాబోయే రోజుల్లో మరిన్ని పతకాలు వచ్చే అవకాశం ఉండటంతో దేశవ్యాప్తంగా క్రీడాభిమానుల్లో ఉత్సాహం తారాస్థాయికి చేరింది.

మరిన్ని క్రీడా వార్తల కోసం ఇక్కడ క్లిక్ చేయండి..