Aaryavir Sehwag: 16 సిక్సర్లు.. 303 పరుగులు.. అండర్-19 ఆసియా కప్‌లో సెహ్వాగ్ కొడుకు విధ్వంసం!
Aaryavir Sehwag: అండర్-19 ఆసియా కప్ 2026లో వీరేంద్ర సెహ్వాగ్ కుమారుడు ఆర్యవీర్ సెహ్వాగ్ పరుగుల వరద పారిస్తున్నాడు. నాలుగు ఇన్నింగ్స్‌ల్లో 303 పరుగులు చేసి టాప్ స్కోరర్‌గా నిలిచాడు. అతడి ఖాతాలో 16 సిక్సర్లు, 29 ఫోర్లు ఉన్నాయి. ఆఫ్ఘనిస్థాన్‌పై సెమీఫైనల్లో హాఫ్ సెంచరీ చేశాడు. నవంబర్ 14న పాకిస్థాన్‌తో జరిగే ఫైనల్లోనూ ఆర్యవీర్ ఎలా ఆడతాడన్న ఆసక్తి అభిమానుల్లో పెరిగింది.
Updated on: Nov 12, 2026 | 6:37 PM
Aaryavir Sehwag: అండర్-19 ఆసియా కప్ 2026లో టీమిండియా యంగ్ బ్యాటర్ ఆర్యవీర్ సెహ్వాగ్ అదరగొడుతున్నాడు. మాజీ క్రికెటర్ వీరేంద్ర సెహ్వాగ్ కుమారుడైన ఆర్యవీర్ ఈ టోర్నీలో పరుగుల వరద పారిస్తున్నాడు. ఇప్పటివరకు ఆడిన నాలుగు ఇన్నింగ్స్‌ల్లో 303 పరుగులు చేసి అత్యధిక పరుగులు చేసిన బ్యాటర్ల జాబితాలో అగ్రస్థానంలో నిలిచాడు. ముఖ్యంగా 16 సిక్సర్లు బాదడం అతడి దూకుడు బ్యాటింగ్‌కు నిదర్శనం. ఆఫ్ఘనిస్థాన్‌తో జరిగిన సెమీఫైనల్లోనూ అర్ధశతకం సాధించి భారత్ ఫైనల్ చేరడంలో కీలక పాత్ర పోషించాడు.
నాలుగు ఇన్నింగ్స్‌ల్లో 303 పరుగులు
ఆర్యవీర్ ఈ టోర్నీలో ఇప్పటివరకు నాలుగు ఇన్నింగ్స్‌లు ఆడాడు. మొత్తం 303 పరుగులు సాధించాడు. అతడి బ్యాటింగ్ సగటు 101 కాగా, స్ట్రైక్ రేట్ 95.58గా ఉంది. ఈ పరుగుల్లో 29 ఫోర్లు, 16 సిక్సర్లు ఉన్నాయి. ఈ టోర్నీలో అత్యధిక పరుగులు చేసిన ఆటగాళ్ల జాబితాలో అతడే మొదటి స్థానంలో ఉన్నాడు. పాకిస్థాన్ బ్యాటర్ ఉస్మాన్ ఖాన్ నాలుగు ఇన్నింగ్స్‌ల్లో 238 పరుగులతో రెండో స్థానంలో కొనసాగుతున్నాడు. అతడి ఖాతాలో 31 ఫోర్లు, 3 సిక్సర్లు ఉన్నాయి.
సెమీఫైనల్లో మరో హాఫ్ సెంచరీ
ఆర్యవీర్ తన అద్భుత ఫామ్‌ను కీలక మ్యాచ్‌ల్లోనూ కొనసాగిస్తున్నాడు. యూఏఈతో జరిగిన మ్యాచ్‌లో ఏకంగా 160 పరుగులు చేసి భారత జట్టు విజయంలో కీలక పాత్ర పోషించాడు. నేపాల్‌తో జరిగిన మ్యాచ్‌లో అజేయంగా 70 పరుగులు చేశాడు. తాజాగా ఆఫ్ఘనిస్థాన్‌తో జరిగిన సెమీఫైనల్లో 57 బంతుల్లో 51 పరుగులు సాధించాడు. ఈ ఇన్నింగ్స్‌లో 4 ఫోర్లు, 4 సిక్సర్లు బాదాడు. కెప్టెన్ లక్ష్య రైచందానితో కలిసి తొలి వికెట్‌కు 117 పరుగుల భాగస్వామ్యం నెలకొల్పాడు. దీంతో 228 పరుగుల లక్ష్యాన్ని భారత్ రెండు వికెట్లు మాత్రమే కోల్పోయి ఛేదించింది.
గ్రూప్ మ్యాచ్‌లో పాక్ చేతిలో ఓటమి
ఈ టోర్నీ గ్రూప్ దశలో భారత్‌కు పాకిస్థాన్ చేతిలో ఓటమి ఎదురైంది. ఆ మ్యాచ్‌లో ఆర్యవీర్ 22 పరుగులకే పరిమితమయ్యాడు. ఈ టోర్నీలో అతడు 50 పరుగుల కంటే తక్కువ చేసిన ఏకైక మ్యాచ్ ఇదే. తొలుత బ్యాటింగ్ చేసిన భారత్ 208 పరుగులకు ఆలౌటైంది. లక్ష్య ఛేదనలో పాకిస్థాన్ మరో 11 బంతులు మిగిలి ఉండగానే మూడు వికెట్ల తేడాతో విజయం సాధించింది. ఇప్పుడు ఫైనల్లో మరోసారి పాకిస్థాన్‌తో తలపడే అవకాశం రావడంతో భారత జట్టు ఆ ఓటమికి బదులు తీర్చుకోవాలని చూస్తోంది.
నవంబర్ 14న భారత్, పాకిస్థాన్ ఫైనల్
అండర్-19 ఆసియా కప్ సెమీఫైనల్లో భారత్ ఆఫ్ఘనిస్థాన్‌ను ఓడించి ఫైనల్‌కు చేరింది. మరో సెమీఫైనల్లో పాకిస్థాన్ బంగ్లాదేశ్‌పై తొమ్మిది వికెట్ల తేడాతో గెలిచి తుది పోరుకు అర్హత సాధించింది. దీంతో నవంబర్ 14న భారత్, పాకిస్థాన్ మధ్య ఫైనల్ మ్యాచ్ జరగనుంది. భారత కాలమానం ప్రకారం ఉదయం 10:30 గంటలకు మ్యాచ్ ప్రారంభం కానుంది. టోర్నీలో అత్యధిక పరుగులు చేసిన ఆర్యవీర్‌పై ఇప్పుడు అందరి దృష్టి ఉంది. ఫైనల్లోనూ అతడు ఇదే ఫామ్ కొనసాగిస్తే భారత్‌కు మరోసారి మంచి ఆరంభం లభించే అవకాశం ఉంది.
మరిన్ని క్రీడా వార్తల కోసం ఇక్కడ క్లిక్ చేయండి..
