సమ్మర్లో ఇది తాగితే మామూలుగా ఉండదు.. చిన్న గింజలే అని చీప్గా చూశారో మీకే నష్టం..
తెలుగు రాష్ట్రాల్లో ఎండలు మండిపోతున్నాయి. మార్చి నెలలోనే భానుడు తన ప్రతాపాన్ని చూపిస్తుండటంతో.. సామాన్యులు ఉక్కిరిబిక్కిరి అవుతున్నారు. తీవ్రమైన ఎండలు, వేడి గాలుల కారణంగా వడదెబ్బ , డీహైడ్రేషన్, నీరసం వంటి సమస్యలు వచ్చే అవకాశాలు ఉన్నాయి. ఈ క్రమంలో శరీరాన్ని లోపలి నుండి చల్లబరిచే సహజ సిద్ధమైన మార్గాలపై ఆయుర్వేద నిపుణులు కీలక సూచనలు చేస్తున్నారు.
శరీరానికి సబ్జా రక్షణ కవచం: వేసవిలో మన శరీరం చెమట రూపంలో నీటిని, ఖనిజ లవణాలను వేగంగా కోల్పోతుంది. దీనివల్ల తలతిరుగుడు, తలనొప్పి వంటి లక్షణాలు కనిపిస్తాయి. వీటికి చెక్ పెట్టాలంటే మన వంటింట్లో దొరికే సబ్జా గింజలు అత్యుత్తమ పరిష్కారమని నిపుణులు చెబుతున్నారు.
అద్భుత ప్రయోజనాలు: సబ్జా గింజలకు శరీరాన్ని తక్షణమే చల్లబరిచే గుణం ఉంది. ఇవి శరీర ఉష్ణోగ్రతను అదుపులో ఉంచి, వడదెబ్బ తగలకుండా కాపాడతాయి. ఈ గింజలు నీటిని పీల్చుకుని జెల్ లాగా మారతాయి. వీటిని తీసుకోవడం వల్ల శరీరంలో నీటి శాతం తగ్గిపోకుండా ఉంటుంది.
జీర్ణక్రియ మెరుగు: వీటిలో ఉండే ఫైబర్ కంటెంట్ వల్ల మలబద్ధకం తగ్గుతుంది. కడుపులో మంట, ఎసిడిటీ వంటి సమస్యల నుంచి ఉపశమనం లభిస్తుంది. సబ్జాలో ఉండే యాంటీఆక్సిడెంట్లు, ఐరన్ శరీర రోగనిరోధక శక్తిని పెంచి, వేసవిలో వచ్చే సీజనల్ వ్యాధుల నుంచి రక్షణ కల్పిస్తాయి.
గుమ్మడి గింజలు: సబ్జాతో పాటు గుమ్మడి గింజలను కూడా ఆహారంలో చేర్చుకోవాలని నిపుణులు సూచిస్తున్నారు. వీటిలో ఉండే మెగ్నీషియం, కాల్షియం, ఒమేగా-3 ఫ్యాటీ యాసిడ్లు గుండె ఆరోగ్యానికి, ఎముకల పుష్టికి ఎంతో మేలు చేస్తాయి. తక్కువ కేలరీలు ఉండటం వల్ల బరువు తగ్గాలనుకునే వారికి ఇవి పర్ఫెక్ట్ స్నాక్.
ఎలా తీసుకోవాలి?: ఆరోగ్యంగా ఉండటానికి సబ్జా నీటిని తయారు చేసుకునే విధానం చాలా సులభం. ఒక గ్లాసు నీటిలో ఒక టీస్పూన్ సబ్జా గింజలను వేసి..10 నుండి 15 నిమిషాల పాటు నానబెట్టాలి. ఈ నీటిలో కొద్దిగా నిమ్మరసం, తేనె లేదా పటిక బెల్లం కలుపుకుని తాగవచ్చు. కృత్రిమ కూల్ డ్రింక్స్ జోలికి వెళ్లి ఆరోగ్యం పాడుచేసుకోవడం కంటే.. ప్రకృతి ప్రసాదించిన ఈ సబ్జా గింజలను అలవాటు చేసుకోవడం మేలని వైద్యులు సూచిస్తున్నారు.