Realme C63: ఈ బడ్జెట్‌లో ఇన్ని ఫీచర్లు నెవర్‌ బిఫోర్‌.. ఎయిర్‌ గెశ్చర్‌తో పాటు మరెన్నో..
మార్కెట్లో ప్రస్తుతం బడ్జెట్ ఫోన్‌ల హవా నడుస్తోంది. తక్కువ బడ్జెట్‌లో అధునాతన ఫీచర్లతో కూడిన ఫోన్‌లను తీసుకొస్తున్నారు. ఈ క్రమంలోనే తాజాగా చైనాకు చెందిన స్మార్ట్‌ ఫోన్‌ దిగ్గజం రియల్‌మీ మార్కెట్లోకి కొత్త ఫోన్‌ను తీసుకొచ్చింది. రియల్‌ సీ63 పేరుతో ఫోన్‌ను లాంచ్‌ చేశారు. ఇంతకీ ఈ ఫోన్‌లో ఎలాంటి ఫీచర్లు ఉన్నాయి.? ధర ఎంత.? లాంటి పూర్తి వివరాలు ఇప్పుడు తెలుసుకుందాం..
రియల్‌మీ సీ63 పేరుతో భారత మార్కెట్లోకి సోమవారం కొత్త ఫోన్‌ను తీసుకొచ్చింది. అధికారికంగా లాంచ్‌ అయిన ఈ ఫోన్‌ జులై 3వ తేదీ నుంచి అందుబాటులోకి రానుంది. ప్రముఖ ఈకామర్స్‌ సంస్థ ఫ్లిప్‌కార్ట్‌తో పాటు రియల్‌మీ ఇండియా వెబ్‌సైట్‌లో ఈ ఫోన్‌ అందుబాటులోకి రానుంది.
ఫీచర్ల విషయానికొస్తే రియల్‌మీ సీ63 ఫోన్‌లో 6.74 ఇంచెస్‌తో కూడిన హెచ్‌డీ+ స్క్రీన్‌ను అందించారు. 90 హెర్ట్జ్‌ రిఫ్రెష్‌ రేట్‌ను అంందించారు. కెమెరా విషయానికొస్తే ఇందులో 50 మెగాపిక్సెల్స్‌తో కూడిన రెయిర్‌ కెమెరాను అందించారు. అలాగే సెల్ఫీలు, వీడియో కాల్స్‌ కోసం ఇందులో 8 మెగాపిక్సెల్స్‌ ఫ్రంట్ కెమెరాను ఇచ్చారు.
రియల్‌మీ సీ63 ఫోన్‌ 4 జీబీ ర్యామ్‌, 128 జీబీ స్టోరేజ్‌ వేరియంట్‌ ధర రూ. 8,999గా నిర్ణయించారు. ఈ ఫోన్‌ను జేడ్ గ్రీన్‌, లెదర్‌ బ్లూ కలర్స్‌లో తీసుకొచ్చారు. ఇక ఇందులో ప్రత్యేకంగా ఎయిర్‌ గెశ్చర్‌ ఫీచర్‌ను అందించారు.
ఎయిర్‌ గెశ్చర్‌ ఫీచర్‌తో స్క్రీన్‌ను టచ్‌ చేయకుండానే ఆపరేట్ చేసుకోవచ్చు. కొలాప్సబుల్ మినీ క్యాప్సూల్ ఫీచర్‌తో నోటిఫికేషన్స్‌ను పొందొచ్చు. బ్యాటరీ విషయానికొస్తే ఇందులో 5000 ఎంఏహెచ్‌ బ్యాటరీని అందించారు.
ఇక ఈ ఫోన్‌లో అక్టాకోర్‌ యూనిసోక్‌ టీ613 ప్రాసెసర్‌ను అందించారు. ఆండ్రాయిడ్‌ 14 ఆపరేటింగ్ సిస్టమ్‌తో ఈ ఫోన్‌ పనిచేస్తుంది. ఈ ఫోన్‌ 90 నిమిషాల్లో బ్యాటరీ 100 శాతం ఛార్జింగ్‌ అవుతుందని కంపెనీ చెబతోంది.