రాయలసీమ స్టైల్ పచ్చిమిర్చి టమాటా పప్పు.. తింటే, మళ్ళీ మళ్ళీ అదే కావాలంటారు
రాయలసీమ స్టైల్ పచ్చిమిర్చి టమాటా పప్పు ఒక్కసారి తింటే అస్సలు వదలరు. కందిపప్పు, పచ్చిమిర్చి, టమాటా ప్రధానంగా చేసుకొనే ఈ పప్పు అన్నం, జొన్న రొట్టె, చపాతీల్లోకి అద్భుతంగా ఉంటుంది. సులభమైన వంటకం, రుచికి తగ్గట్టు కారం, పులుపుని సరిచూసుకుంటూ చింతపండుతో, పచ్చిమిర్చితో కూడిన ఈ పప్పుని మీ ఇంట్లోనే చేసుకోండి.
కావాల్సిన పదార్థాలు: కందిపప్పు: అర కప్పు, నీళ్లు: కందిపప్పు తీసుకున్న కప్పుతో మూడు కప్పులు, పచ్చిమిర్చి: 10, ఉల్లిపాయ: 1 పెద్దది (ముక్కలుగా కట్ చేయాలి), టమాటాలు: 3 మీడియం సైజు (ముక్కలుగా కట్ చేయాలి), పసుపు: అర టీస్పూన్, ధనియాల పొడి: అర టీస్పూన్ ( వేయించిన ధనియాలు), కరివేపాకు: 1 రెమ్మ, కొత్తిమీర: 2 రెమ్మలు , చింతపండు: చిన్న ఉసిరికాయ సైజు, నూనె: 2 టేబుల్ స్పూన్లు, ఉప్పు: రుచికి సరిపడా తీసుకోవాలి. ఆవాలు, జీలకర్ర, శనగపప్పు, మినప్పప్పు కలిపి: 1 టేబుల్ స్పూన్, ఎండుమిర్చి: 3, వెల్లుల్లి రెబ్బలు: 5-6 , ఉల్లిపాయ: 1 మీడియం సైజు , కరివేపాకు: 1 రెమ్మ తీసుకోవాలి.
ముందుగా, ఒక కుక్కర్ తీసుకొని, అందులో అర కప్పు కందిపప్పు వేసుకోవాలి. పప్పును రెండు నుండి మూడు సార్లు శుభ్రంగా కడిగి, ఆ నీటిని పారబోయండి. కడిగిన కందిపప్పులో, మీరు ఏ కప్పుతో అయితే పప్పు తీసుకున్నారో అదే కప్పుతో మూడు కప్పుల నీళ్లు పోయాలి. కందిపప్పును అరగంట పాటు నానబెట్టుకుంటే మరింత మెత్తగా ఉడికి, రుచి కూడా బాగుంటుందని గుర్తుంచుకోండి.
ఇప్పుడు, దీనిలో మీ కారానికి సరిపడా పది పచ్చిమిర్చి, పెద్ద సైజు ఉల్లిపాయ ముక్కలు, మీడియం సైజు మూడు టమాటా ముక్కలు, అర టీస్పూన్ పసుపు, అర టీస్పూన్ ధనియాల పొడి వేయండి. ధనియాల పొడికి బదులుగా, వేయించిన ధనియాలు కూడా వాడుకోవచ్చు. ఒక రెమ్మ కరివేపాకు, రెండు రెమ్మల కొత్తిమీరను పైన వేయండి.
చింతపండును పప్పుపై ఉంచండి. ఈ పప్పులో చింతపండు ఎక్కువగా వేయరు, కాస్త పులుపు కోసం మాత్రమే. మీకు చింతపండు ఇష్టం లేకపోతే, టమాటా కొద్దిగా ఎక్కువ వేసుకోవచ్చు. రెండు టేబుల్ స్పూన్ల నూనె కూడా వేయండి. కొంతమంది వెల్లుల్లి రెబ్బలను ఈ దశలో వేసి పప్పుతో పాటు ఉడికిస్తారు, మరికొంతమంది తాలింపులో వేసుకుంటారు. ఈ విధానంలో తాలింపులో వేసుకుంటారు. ఈ పదార్థాలన్నీ వేసిన తర్వాత, కుక్కర్ మూత పెట్టి నాలుగు లేదా ఐదు విజిల్స్ వచ్చే వరకు ఉడికించుకోండి. పప్పు బాగా మెత్తగా ఉడకాలి.
కుక్కర్ ఆవిరిపోయిన తర్వాత మూత తీయండి. పప్పు బాగా ఉడికి ఉంటుంది. దీనిలో మీ రుచికి సరిపడా ఉప్పు వేసి, పప్పు గుత్తితో బాగా మెత్తగా ఎనుపుకోండి. ఇప్పుడు స్టవ్ పై ఒక పాన్ పెట్టి, రెండు టేబుల్ స్పూన్ల నూనె వేసి వేడి చేయండి. నూనె కాగిన తర్వాత, ఆవాలు, జీలకర్ర, శనగపప్పు, మినప్పప్పు కలిపి ఒక టేబుల్ స్పూన్ వేయండి. ఆవాలు చిటపటమనే వరకు వేయించాలి. తరువాత, మూడు ఎండుమిర్చి, కచ్చాపచ్చాగా దంచిన ఐదు నుండి ఆరు వెల్లుల్లి రెబ్బలు వేసి వేయించాలి. దీనిలో పొడవుగా కట్ చేసుకున్న మీడియం సైజు ఉల్లిపాయ ముక్కలు వేసి, అవి లేత గోధుమ రంగులోకి మారే వరకు రెండు నిమిషాలు వేయించుకోండి. చివరగా, ఒక రెమ్మ కరివేపాకు వేసి, అది కూడా వేగిన తర్వాత, ముందుగా ఎనిపి పెట్టుకున్న పప్పు మిశ్రమాన్ని ఈ తాలింపులో వేయండి. పప్పును తాలింపులో వేసిన వెంటనే స్టవ్ ఆఫ్ చేసి, అంతా బాగా కలుపుకోవాలి. ఎంతో రుచికరమైన రాయలసీమ స్టైల్ పచ్చిమిర్చి టమాటా పప్పు రెడీ. దీనిని జొన్నరొట్టె, వేడి అన్నం, చపాతీతో కూడా దీనిని తినొచ్చు.