Chicken Karam Podi: నెల రోజుల పాటు నిల్వ ఉండే ఘుమఘుమలాడే చికెన్ కారప్పొడి.. వేడి అన్నంలో నెయ్యితో తింటే స్వర్గమే!
రోజూ ఉదయాన్నే ఆఫీసులకు, కాలేజీలకు వెళ్లే హడావుడిలో ప్రతిసారీ కూరలు చేయడం కుదరకపోవచ్చు. అలాగే హాస్టల్స్లో ఉండే పిల్లలకు ఇంటి భోజనం గుర్తుకొచ్చినప్పుడు త్వరగా తినడానికి ఏదైనా నిల్వ ఉండే పొడి ఉంటే ఎంత బాగుంటుందో కదా! సాధారణంగా మనం పల్లీ పొడి, కరివేపాకు పొడి వంటివి చేసుకుంటుంటాం.
బోన్లెస్ చికెన్తో ఎంతో రుచికరమైన చికెన్ కారప్పొడిని చేసి పెట్టుకుంటే నెల రోజుల పాటు హ్యాపీగా వాడుకోవచ్చు. వేడివేడి అన్నంలో నెయ్యితో పాటు ఇడ్లీ, దోశల్లోకి అదిరిపోయే ఈ చికెన్ కారప్పొడి తయారీ విధానాన్ని ఇప్పుడు చూద్దాం. కావలసిన పదార్థాలు: పావు కేజీ ఎముకలు లేని బోన్లెస్ చికెన్, ఉప్పు, పసుపు, అర టీస్పూన్ అల్లం వెల్లుల్లి పేస్ట్, రెండు టేబుల్ స్పూన్ల ధనియాలు, రెండు టీస్పూన్ల జీలకర్ర, 10 నుండి 12 ఎండుమిర్చి, అర అంగుళం దాల్చిన చెక్క, మూడు లవంగాలు, మూడు యాలకులు, పావు కప్పు తాజా కరివేపాకు, రెండు టేబుల్ స్పూన్ల వెల్లుల్లి రెబ్బలు, పావు టీస్పూన్ ఇంగువ, చిన్న చింతపండు ముక్క మరియు తగినంత నూనె.
తయారీ విధానం: ముందుగా బోన్లెస్ చికెన్ను శుభ్రంగా కడిగి చాలా చిన్న చిన్న ముక్కలుగా కట్ చేసుకోవాలి. ఇందులో ఒక టీస్పూన్ ఉప్పు, పావు టీస్పూన్ పసుపు, అర టీస్పూన్ అల్లం వెల్లుల్లి పేస్ట్ వేసి బాగా కలిపి కనీసం అరగంట పాటు పక్కన పెట్టుకోవాలి. ఇప్పుడు స్టవ్ మీద పాన్ పెట్టి ఒక చెంచా నూనె వేసి ధనియాలు, జీలకర్ర, ఎండుమిర్చి, చెక్క, లవంగాలు, యాలకులు వేసి చిన్న మంటపై వేయించాలి.
తర్వాత కరివేపాకు కూడా వేసి క్రిస్పీగా మారే వరకు వేయించి ఒక ప్లేట్లోకి తీసుకుని చల్లారనివ్వాలి. అదే పాన్లో మూడు నుండి నాలుగు టేబుల్ స్పూన్ల నూనె పోసి మారినేట్ చేసిన చికెన్ ముక్కలను వేయాలి. పచ్చడికి వేయించినట్లుగా చికెన్ ముక్కలు గట్టిపడకుండా క్రిస్పీగా, ఎర్రగా అయ్యేంత వరకు మీడియం మంటపై వేయించి పక్కకు తీసుకోవాలి.
మిగిలిన నూనెలో పొట్టు తీసిన వెల్లుల్లి రెబ్బలను కూడా దోరగా వేయించి తీసుకోవాలి. ఇవన్నీ పూర్తిగా చల్లారిన తర్వాత మిక్సీ జార్లో వేయించిన మసాలా దినుసులు, తగినంత ఉప్పు, ఇంగువ, చిన్న చింతపండు ముక్క వేసి మెత్తగా పొడి చేసి ప్లేట్లోకి తీసుకోవాలి. ఆ తర్వాత అదే మిక్సీ జార్లో వేయించిన చికెన్ ముక్కలను వేసి పల్స్ మోడ్లో పొడిలా గ్రైండ్ చేయాలి. చివరిలో వెల్లుల్లి రెబ్బలను కూడా వేసి ఒకసారి తిప్పి మసాలా పొడితో బాగా కలపాలి.
ఇప్పుడు చికెన్ వేయించిన నూనెలోనే దంచిన వెల్లుల్లి, కరివేపాకు వేసి వేయించి స్టవ్ ఆపేయాలి. ఆ వేడి తాలింపులో ఈ చికెన్ పొడిని వేసి బాగా కలిపితే చికెన్ కారప్పొడి సిద్ధమవుతుంది. పూర్తిగా చల్లారిన తర్వాత గాలి చొరబడని గాజు సీసాలో నిల్వ చేసుకుంటే బయట నెల రోజులు, ఫ్రిజ్లో రెండు నెలల పాటు తాజాగా ఉంటుంది. మీరు కూడా తప్పకుండా ట్రై చేయండి!