తొక్కే కదా అని తీసిపారేయకండి.. అవి చేసే మ్యాజిక్ తెలిస్తే అస్సలు వదలరు..
Orange Peel: సాధారణంగా మనం నారింజ పండును తిని, దాని తొక్కలను చెత్తలో పారేస్తుంటాం. కానీ హెల్త్లైన్ నివేదిక ప్రకారం.. నారింజ పండులో ఎంత పోషకాలు ఉంటాయో, దాని తొక్కలో కూడా అంతే స్థాయిలో ఫైబర్, విటమిన్ సి, ఫ్లేవనాయిడ్లు ఉంటాయి. ఈసారి నారింజ తొక్కలను పారేసే ముందు, వాటితో కలిగే ఈ అద్భుతమైన ప్రయోజనాలను ఒకసారి పరిశీలించండి.
వంటల్లో అద్భుతమైన ఫ్లేవర్: నారింజ తొక్కలను కేకులు, పేస్ట్రీలు, క్రీమీ డెజర్ట్లలో ఉపయోగించవచ్చు. తాజా తొక్కను తురిమి కొద్దిగా జోడిస్తే, వంటకాలకు విభిన్నమైన రుచి, సువాసన వస్తుంది. అయితే, రుచి మరీ ఘాటుగా ఉండకుండా తక్కువ పరిమాణంలో వాడటం మంచిది.
నారింజ తొక్కతో స్పెషల్ టీ: మీరు రెగ్యులర్ గా తాగే బ్లాక్ టీలో రెండు చిన్న నారింజ తొక్కలను వేసి మరిగించి చూడండి. ఇది టీకి అద్భుతమైన సువాసనను ఇవ్వడమే కాకుండా, మిమ్మల్ని రిలాక్స్గా ఉంచుతుంది. ఈ టీ చర్మ ఆరోగ్యానికి కూడా ఎంతో మేలు చేస్తుంది.
ఎయిర్ ఫ్రెషనర్: రసాయనాలతో కూడిన రూమ్ ఫ్రెషనర్లకు బదులుగా, నారింజ తొక్కలతో మీ ఇంటిని సువాసనభరితం చేయవచ్చు. నారింజ తొక్కలు, 5-6 లవంగాలను నీటిలో మరిగించి, ఆ నీటిని స్ప్రే బాటిల్లో నింపి రూమ్ ఫ్రెషనర్గా వాడండి. తొక్కలను ఎండబెట్టి, పొడి చేసి చిన్న చిన్న మూటలుగా కట్టి బట్టల మధ్య ఉంచితే, బట్టలు మంచి సువాసనతో ఉంటాయి.
తలనొప్పికి సహజ పరిష్కారం: వేసవిలో వచ్చే తలనొప్పి లేదా ఒత్తిడి వల్ల కలిగే తలనొప్పికి నారింజ తొక్కల సువాసన అద్భుతంగా పనిచేస్తుంది. ఒక చిన్న ముక్కను వాసన చూడటం లేదా అరోమాథెరపీ బర్నర్లో వీటిని ఉపయోగించడం వల్ల తక్షణ ఉపశమనం లభిస్తుంది.
తోటపనిలో మేటి ఎరువు: నారింజ తొక్కలను కంపోస్ట్లో వేయడం వల్ల మొక్కలకు మంచి పోషకాలు అందుతాయి. అంతేకాకుండా వీటిని ద్రవ ఎరువుగా మార్చి మొక్కలకు వాడటం వల్ల తెగుళ్ల నుండి రక్షణ లభిస్తుంది. కాగా నారింజ తొక్క కేవలం చర్మ సంరక్షణకే కాదు, ఆరోగ్యం, ఇంటి అవసరాలకు కూడా ఎంతో ఉపయోగకరం. కాబట్టి ఇకపై వీటిని పారేయకుండా తెలివిగా ఉపయోగించుకోండి.