ప్రపంచ ఆస్తమా దినోత్సవం 2026..ఊపిరితిత్తుల ఆరోగ్యం కోసం ఈ ఆహార మార్పులు తప్పనిసరి!
ప్రతి ఏటా మే నెలలో జరుపుకునే ప్రపంచ ఆస్తమా దినోత్సవం ఇవాళ. శ్వాసకోశ వ్యాధులపై అవగాహన పెంచడానికి ఉద్దేశించబడింది. ఆస్తమా లేదా ఉబ్బసం ఉన్నవారు కేవలం మందుల మీదనే కాకుండా, తీసుకునే ఆహారంపై కూడా దృష్టి సారించాలని వైద్యులు సూచిస్తున్నారు. సరైన జీవనశైలి, సమతుల్య ఆహారం ద్వారా ఆస్తమా లక్షణాలను అదుపులో ఉంచి, ఊపిరితిత్తుల ఆరోగ్యాన్ని ఎలా కాపాడుకోవాలో డాక్టర్ ఎస్. సురేష్ సహదేవన్ వివరించారు. ఆ వివరాల్లోకి వెళ్దాం..
ఆస్తమా అనేది అన్ని వయసుల వారిని ప్రభావితం చేసే ఒక దీర్ఘకాలిక ఊపిరితిత్తుల వ్యాధి. ఆస్తమాపై అవగాహన కల్పించడానికి ప్రతి సంవత్సరం మే నెల మొదటి మంగళవారం నాడు ప్రపంచ ఆస్తమా దినోత్సవాన్ని పాటిస్తారు. 2026వ సంవత్సరంలో ఇదే రోజున, ఆస్తమా రోగుల జీవనశైలిలో ఆహారం ఎంత ముఖ్యమైన సాధనమో మీరు తెలుసుకోవచ్చు. ఈ మేరకు చెన్నైలోని గ్లెనెగల్స్ ఆసుపత్రి వైద్యుడైన డాక్టర్ ఎస్. సురేష్ సహదేవన్ మాట్లాడుతూ , ఆస్తమా ఇన్హేలర్ చికిత్సకు ఆహారం ప్రత్యామ్నాయం కానప్పటికీ, అది శ్వాసనాళాల వాపు, రోగనిరోధక వ్యవస్థ సమతుల్యత, మొత్తం ఊపిరితిత్తుల ఆరోగ్యంపై గణనీయమైన ప్రభావాన్ని చూపుతుంది అని అన్నారు. సరైన ఆహారం ఆస్తమా తీవ్రతను తగ్గించడంలో, లక్షణాలను నియంత్రించడంలో, జీవన నాణ్యతను మెరుగుపరచడంలో సహాయపడుతుంది అని ఆయన అంటున్నారు.
ఆస్తమా లేదా ఉబ్బసం అనేది శ్వాసనాళాల్లో వాపు రావడం వల్ల కలిగే ఒక దీర్ఘకాలిక సమస్య. వాతావరణ కాలుష్యం, అలర్జీలతో పాటు మనం తీసుకునే ఆహారం కూడా ఆస్తమా తీవ్రతపై ప్రభావం చూపుతుంది. 2026 ప్రపంచ ఉబ్బసం దినోత్సవం సందర్భంగా, ఊపిరితిత్తులను దృఢంగా ఉంచుకోవడానికి పాటించాల్సిన ఆహార నియమాల గురించి ఆరోగ్య నిపుణులు కొన్ని కీలక సూచనలు చేశారు.
ఆస్తమా ఉన్నవారు తీసుకోవాల్సిన ఆహారాలు:
విటమిన్ డి అధికంగా ఉండే ఆహారం: విటమిన్ డి శరీరంలో రోగనిరోధక శక్తిని పెంచడమే కాకుండా, శ్వాసనాళాల వాపును తగ్గిస్తుంది. పాలు, గుడ్లు, సూర్యరశ్మి ద్వారా దీనిని పొందవచ్చు.
యాంటీ ఆక్సిడెంట్లు: ఆపిల్, బెర్రీలు, క్యారెట్లు, ఆకుకూరల్లో ఉండే యాంటీ ఆక్సిడెంట్లు ఊపిరితిత్తుల కణాలను రక్షించడంలో సహాయపడతాయి. ముఖ్యంగా విటమిన్ సి, ఇ ఉన్న పండ్లు శ్వాసకోశ సమస్యలను తగ్గిస్తాయి.
మెగ్నీషియం: మెగ్నీషియం శ్వాసనాళాల కండరాలను సడలించి, గాలి సజావుగా ఆడేలా చేస్తుంది. బాదం, పాలకూర, తృణధాన్యాల్లో ఇది పుష్కలంగా లభిస్తుంది.
ఒమేగా-3 ఫ్యాటీ యాసిడ్స్: చేపలు, అవిసె గింజలు (Flax seeds), వాల్నట్స్ తీసుకోవడం వల్ల శరీరంలో ఇన్ఫ్లమేషన్ తగ్గుతుంది.
తినకూడని ఆహారాలు:
ప్రిజర్వేటివ్స్ ఉన్న ఆహారం: ప్యాక్ చేసిన ఆహార పదార్థాలు, డ్రై ఫ్రూట్స్, వైన్ వంటి వాటిలో ఉండే సల్ఫైట్స్ ఆస్తమా అటాక్ వచ్చేలా చేస్తాయి.
అధిక ఉప్పు: ఉప్పు ఎక్కువగా తీసుకోవడం వల్ల ఊపిరితిత్తుల వాపు పెరుగుతుందని పరిశోధనలు చెబుతున్నాయి.
గ్యాస్ కలిగించే ఆహారాలు: బీన్స్, కార్బోనేటెడ్ డ్రింక్స్, క్యాబేజీ వంటివి పొట్ట ఉబ్బరానికి దారితీస్తాయి. ఇది డయాఫ్రమ్పై ఒత్తిడి తెచ్చి శ్వాస తీసుకోవడం కష్టతరం చేస్తుంది.
ఆస్తమాను పూర్తిగా నివారించలేకపోయినా, సరైన ఆహారం, వ్యాయామం ద్వారా దానిని సమర్థవంతంగా నిర్వహించవచ్చు. ధూమపానానికి దూరంగా ఉండటం, డాక్టర్ సూచించిన ఇన్హేలర్లను క్రమం తప్పకుండా వాడటంతో పాటు పైన పేర్కొన్న ఆహార నియమాలు పాటిస్తే ఊపిరితిత్తుల ఆరోగ్యం మెరుగుపడుతుంది.
మరిన్ని లైఫ్ స్టైల్ న్యూస్ కోసం క్లిక్ చేయండి..