చెక్క.. ప్లాస్టిక్.. స్టీల్.. కూరగాయలు కోయడానికి ఏ కటింగ్ బోర్డు బెస్ట్..?
వంటింట్లో కూరగాయలు, మాంసం తరగడానికి మీరు ఏ కట్టింగ్ బోర్డ్ వాడుతున్నారు? ప్లాస్టిక్, చెక్క లేదా స్టీల్ బోర్డుల్లో దేని వల్ల ప్రయోజనాలు ఎక్కువ.. దేని వల్ల ఆరోగ్య సమస్యలు వచ్చే ప్రమాదం ఉంది? బ్యాక్టీరియా వ్యాప్తిని అరికట్టడానికి ఏ బోర్డును ఎలా వాడాలో ఈ స్టోరీలో తెలుసుకుందాం..
ఆరోగ్యకరమైన ఆహారాన్ని ఎంచుకోవడం ఎంత ముఖ్యమో, ఆ వంటకాలను తయారు చేసేందుకు ఉపయోగించే వంటింటి పరికరాల పరిశుభ్రతపై దృష్టి పెట్టడం కూడా అంతే ముఖ్యం. నిత్యం కూరగాయలు, పండ్లు, పచ్చి మాంసం తరగడానికి ఉపయోగించే కట్టింగ్ బోర్డు విషయంలో చాలామందికి అనేక సందేహాలు ఉంటాయి. మార్కెట్లో దొరికే ప్లాస్టిక్, చెక్క, స్టీల్ బోర్డుల్లో దేని ప్రయోజనాలు, పరిమితులు దానికి ఉన్నాయి. సరైన బోర్డును ఎంచుకోకపోతే ఆహారంలో బ్యాక్టీరియా చేరే ప్రమాదం ఉంది.
చెక్క కట్టింగ్ బోర్డ్
సాంప్రదాయకంగా చెక్క బోర్డులను శతాబ్దాలుగా వాడుతున్నారు. చెక్క మెత్తగా ఉండటం వల్ల కత్తుల పదును త్వరగా తగ్గదు. కొన్ని రకాల సహజ కలపలకు బ్యాక్టీరియాను నిరోధించే గుణాలు ఉంటాయి. చెక్క సహజంగానే నీటిని పీల్చుకుంటుంది. ఎక్కువసేపు నీటిలో నానబెడితే వంగిపోవడం లేదా పగుళ్లు రావడం జరుగుతుంది. ఉపయోగించిన ప్రతిసారీ శుభ్రంగా కడిగి, పూర్తిగా తేమ లేకుండా ఆరబెట్టడం తప్పనిసరి.
ప్లాస్టిక్ కట్టింగ్ బోర్డ్
తక్కువ ధర, తేలికగా ఉండటం వల్ల ఇవి చాలా ఇళ్లలో కనిపిస్తాయి. వీటి నిర్వహణ సులభం, డిష్వాషర్లో వేసి శుభ్రం చేయడానికి అనుకూలంగా ఉంటాయి. కత్తులతో తరుగుతున్నప్పుడు ప్లాస్టిక్ ఉపరితలంపై లోతైన గీతలు పడతాయి. ఈ గీతల్లో సూక్ష్మక్రిములు, ఆహార కణాలు పేరుకుపోయి ఫుడ్ పాయిజనింగ్కు కారణమవుతాయి. అంతేకాకుండా, కూరగాయలు కోసే సమయంలో మైక్రోప్లాస్టిక్ కణాలు ఆహారంలో కలిసే ప్రమాదం కూడా ఉంది.
స్టీల్ చాపింగ్ బోర్డ్
ఇటీవలి కాలంలో ఆధునిక వంటిళ్లలో స్టీల్ బోర్డుల వినియోగం పెరుగుతోంది. స్టీల్కు రంధ్రాలు ఉండవు కాబట్టి ఇది నీరు, ద్రవాలు లేదా ఆహార వాసనలను పీల్చుకోదు. సులభంగా కడగొచ్చు, బ్యాక్టీరియా చేరే అవకాశం దాదాపు ఉండదు. స్టీల్ ఉపరితలం చాలా గట్టిగా ఉండటం వల్ల కత్తి పదును చాలా వేగంగా పోతుంది. అలాగే కోసే సమయంలో కత్తి లేదా కూరగాయలు జారి చేతులు తెగే ప్రమాదం ఉంది. తరిగేటప్పుడు శబ్దం ఎక్కువగా వస్తుంది.
పాత బోర్డును ఎప్పుడు మార్చాలి?
మీ కట్టింగ్ బోర్డుపై లోతైన గీతలు, పగుళ్లు లేదా రంగు మారడం వంటివి కనిపిస్తే దాన్ని తక్షణమే మార్చడం మంచిది. ముఖ్యంగా పచ్చి మాంసం, పచ్చి కూరగాయలు, తినడానికి సిద్ధంగా ఉన్న ఆహార పదార్థాలకు ఒకే బోర్డును వాడకూడదు. దీనివల్ల బ్యాక్టీరియా ఒకదాని నుంచి మరొకదానికి వ్యాపించే ప్రమాదం ఉంటుంది.
ఏది సరైన ఎంపిక?
ఏ ఒక్క బోర్డు కూడా అన్నింటికీ సరిపోదు. మీరు వాడే ఆహార పదార్థాలను బట్టి ఎంపిక చేసుకోవాలి. మాంసాహారానికి, పచ్చి కూరగాయలకు వేర్వేరు బోర్డులను కేటాయించండి. ఏ బోర్డు వాడినా పని పూర్తయ్యాక సబ్బు నీటితో శుభ్రంగా కడిగి ఆరబెట్టడం అలవాటు చేసుకోండి. బోర్డు పాతబడి గీతలు పడగానే కొత్తదాన్ని మార్చుకోవడం మీ కుటుంబ ఆరోగ్యానికి అత్యంత సురక్షితం.