Male Fertility: పురుషుల సంతానోత్పత్తికి పెనుముప్పు.. ఈ 3 అలవాట్లే దెబ్బేస్తున్నాయి..
పొగతాగడం, మద్యం అలవాట్లు, అధిక ఒత్తిడి పురుషుల సంతానోత్పత్తిని దెబ్బతీస్తున్నాయి. ఇది అందరికీ తెలిసిన విషయమే అయినప్పటికీ ఇవి వీర్యం నాణ్యతను తగ్గించడంలో ప్రమాదకరంగా మారుతున్నట్టు తాజా పరిశోధనలు చెప్తున్నాయి. డీఎన్ఏను సైతం ఇవి దెబ్బతీస్తాయి. సమయం మించిపోకముందే ఈ సమస్యలను గుర్తించి, జీవనశైలి మార్పులతో సంతానోత్పత్తిని కాపాడుకోవాలని నిపుణులు హెచ్చరిస్తున్నారు. వీటికి దూరంగా ఉండాలని చెప్తున్నారు..
పొగతాగడం, మద్యం సేవించడం, దీర్ఘకాలిక ఒత్తిడి (బర్న్అవుట్) పురుషుల సంతానోత్పత్తి సామర్థ్యాన్ని గణనీయంగా దెబ్బతీస్తాయని నిపుణులు హెచ్చరిస్తున్నారు. ఆధునిక జీవనశైలిలో ఈ అలవాట్లు సర్వసాధారణం కావడం వల్ల పురుషులలో వంధ్యత్వ సమస్యలు పెరుగుతున్నాయి. వీటి వల్ల వీర్యం నాణ్యత తగ్గిపోవడం, వీర్యకణాల DNA దెబ్బతినడం వంటి తీవ్రమైన నష్టాలు జరుగుతున్నాయి. ఫలితంగా ఎంతో మంది పిల్లలు లేకుండా బాధపడుతున్నారు. తర్వాత ఎన్ని చికిత్సలు చేసినా లాభం ఉండకపోవడంతో మానసికంగా కుంగిపోతున్నారు. వీటికి రోజూవారి అలవాట్లే కారణమని నిపుణులు చెప్తున్నారు.
పొగతాగడం వీర్యకణాల సంఖ్య, చలనాన్ని తగ్గిస్తుంది. ధూమపానం వల్ల విడుదలయ్యే విష పదార్థాలు ఆక్సీకరణ ఒత్తిడిని పెంచి, వీర్యకణాల DNAను దెబ్బతీస్తాయి. ఇది వీర్యకణాల ఉత్పత్తిని, వాటి పనితీరును ప్రభావితం చేస్తుంది. అదేవిధంగా, అధిక మద్యం సేవించడం వల్ల టెస్టోస్టెరాన్ స్థాయిలు తగ్గుతాయి, వీర్యకణాల సంఖ్య, నాణ్యత క్షీణిస్తాయి. దీర్ఘకాలికంగా మద్యం అలవాటు పునరుత్పత్తి వ్యవస్థపై తీవ్ర ప్రభావం చూపుతుంది.
ఆధునిక జీవితంలో ఎదురయ్యే ఒత్తిడి, మానసిక ఆందోళన (బర్న్అవుట్) కూడా పురుషుల సంతానోత్పత్తికి పెద్ద ప్రమాదం. తీవ్రమైన ఒత్తిడి హార్మోన్ల సమతుల్యతను దెబ్బతీస్తుంది, ఇది వీర్యకణాల ఉత్పత్తిని తగ్గిస్తుంది. నిద్రలేమి, సరైన ఆహారం తీసుకోకపోవడం, శారీరక శ్రమ లేకపోవడం వంటివి ఒత్తిడిని పెంచి, పరోక్షంగా సంతానోత్పత్తిపై ప్రభావం చూపుతాయి.
ఈ అలవాట్ల వల్ల కలిగే నష్టాన్ని ముందుగానే గుర్తించి, జీవనశైలిలో మార్పులు చేసుకోవడం చాలా ముఖ్యం. ధూమపానం, మద్యపానం మానేయడం, ఒత్తిడిని తగ్గించుకోవడానికి యోగా, ధ్యానం వంటివి చేయడం, పౌష్టికాహారం తీసుకోవడం, తగినంత నిద్రపోవడం వంటివి పురుషుల సంతానోత్పత్తి ఆరోగ్యాన్ని మెరుగుపరుస్తాయి.