Men Belly Fat: పురుషుల్లో భారీ పొట్ట వెనుక అసలు విలన్ ఎవరో తెలుసా?
పొట్ట కొవ్వు కేవలం ఆహారపు అలవాట్ల వల్ల మాత్రమే కాకుండా హార్మోన్ల అసమతుల్యత వల్ల కూడా పెరగవచ్చు. సరైన జీవనశైలిని పాటించడం ద్వారా ఈ సమస్యను నియంత్రించవచ్చు. అసాధారణ లక్షణాలు కనిపిస్తే ఆలస్యం చేయకుండా వైద్య సలహా తీసుకోవడం ఉత్తమం అని నిపుణులు సూచిస్తున్నారు..
Updated on: Jun 12, 2026 | 8:19 PM
నేటి కాలంలో పురుషుల్లో బెల్లీ ఫ్యాట్ (పొట్ట) పెరగడం ఒక సాధారణ సమస్యగా మారింది. ఎక్కువగా తినడం, వ్యాయామం లేకపోవడం, ఒత్తిడి వంటి జీవనశైలి కారణాలే ప్రధానంగా భావించినప్పటికీ, శరీరంలో హార్మోన్ల అసమతుల్యత కూడా దీనికి ముఖ్య కారణమని ఆరోగ్య నిపుణులు చెబుతున్నారు. వయసు పెరుగుతున్న కొద్దీ పురుషుల శరీరంలో హార్మోన్ల స్థాయిల్లో మార్పులు జరుగుతాయి. అసమతుల ఆహారం, నిద్రలేమి, శారీరక శ్రమ లేకపోవడం, అధిక ఒత్తిడి వంటి అంశాలు ఈ హార్మోన్ల సమతుల్యతను దెబ్బతీస్తాయి. హార్మోన్లు శరీరంలో జీవక్రియ (metabolism), కొవ్వు నిల్వ, శక్తి వినియోగాన్ని నియంత్రించడంలో కీలక పాత్ర పోషిస్తాయి. ఈ సమతుల్యత దెబ్బతిన్నప్పుడు పొట్ట చుట్టూ కొవ్వు పెరగే అవకాశం ఎక్కువగా ఉంటుంది. నేషనల్ లైబ్రరీ ఆఫ్ మెడిసిన్ (NLM) ప్రకారం, కొన్ని ముఖ్యమైన హార్మోన్ల అసమతుల్యత పురుషుల్లో పొట్ట కొవ్వు పెరగడానికి దారితీస్తుంది.
టెస్టోస్టెరాన్ (Testosterone)
టెస్టోస్టెరాన్ పురుషులలో కండరాల అభివృద్ధి, కొవ్వు పంపిణీని నియంత్రించే ముఖ్య హార్మోన్. దీని స్థాయిలు తగ్గినప్పుడు పొట్ట చుట్టూ కొవ్వు పెరుగుతుంది, కండరాల బలం తగ్గుతుంది, శరీర శక్తి తగ్గిపోతుంది.
ఇన్సులిన్ (Insulin)
ఇన్సులిన్ శరీరంలో చక్కెరను నియంత్రిస్తుంది. ఇది అసమతుల్యంగా ఉంటే కొవ్వు నిల్వ పెరుగుతుంది. బరువు త్వరగా పెరుగుతుంది. డయాబెటిస్ ప్రమాదం పెరుగుతుంది.
కార్టిసాల్ (Cortisol)
ఒత్తిడి హార్మోన్గా పిలువబడే కార్టిసాల్ అధికంగా ఉంటే పొట్ట చుట్టూ కొవ్వు పెరుగుతుంది. ఆకలి పెరుగుతుంది. నిద్ర సమస్యలు వస్తాయి.
థైరాయిడ్ హార్మోన్లు (Thyroid Hormones)
థైరాయిడ్ పనితీరు తగ్గితే జీవక్రియ మందగిస్తుంది. బరువు తగ్గడం కష్టమవుతుంది. అలసట పెరుగుతుంది.
ఈ లక్షణాలను నిర్లక్ష్యం చేయకండి
పొట్ట ఉబ్బరంతో పాటు ఈ లక్షణాలు కనిపిస్తే హార్మోన్ల అసమతుల్యతకు సంకేతం కావచ్చు:
- తరచూ అలసటగా ఉండటం
- శక్తి తగ్గిపోవడం
- కండరాల బలహీనత
- నిద్రలేమి
- మూడ్ స్వింగ్స్
హార్మోన్ల సమతుల్యతను కాపాడుకోవడానికి సూచనలు
- రోజువారీ వ్యాయామం చేయడం వల్ల హార్మోన్లు సమతుల్యంగా ఉంటాయి మరియు కొవ్వు తగ్గుతుంది.
- పండ్లు, కూరగాయలు, ప్రోటీన్ అధికంగా ఉన్న ఆహారం తీసుకోవాలి.
- రోజుకు 7–8 గంటల నిద్ర హార్మోన్ల సమతుల్యతకు అవసరం.
- ధ్యానం, యోగా లేదా హాబీలు ఒత్తిడిని తగ్గిస్తాయి.
- క్రమం తప్పకుండా హార్మోన్ మరియు బ్లడ్ టెస్టులు చేయించుకోవడం మంచిది.
