గరిబోళ్ల అమృతం.. శరీరంలో వేడిని తగ్గించి శక్తిని ఇచ్చే పాతకాలం నాటి డ్రింక్.. రోజూ ఒక్క గ్లాస్ తాగితే..
బార్లీ నీరు ఆరోగ్యానికి మేలు చేసే పోషకాలతో నిండి ఉంటుంది. జీర్ణక్రియను మెరుగుపరచడం, శరీరాన్ని హైడ్రేట్గా ఉంచడం, కొలెస్ట్రాల్, రక్తంలో చక్కెర స్థాయిలను నియంత్రించడంలో ఇది సహాయపడుతుంది. కిడ్నీ రాళ్లు, యూరినరీ ట్రాక్ట్ ఇన్ఫెక్షన్ల నివారణతో పాటు చర్మ ఆరోగ్యం, తల్లిపాల పెంపు వంటి అనేక ప్రయోజనాలను అందించే సహజ ఆరోగ్య పానీయంగా బార్లీ నీరు గుర్తింపు పొందుతోంది.
బార్లీ నీటిలో ఆరోగ్యానికి మేలు చేసే ఎన్నో పోషకాలు దాగున్నాయి.. ఇందులో విటమిన్లు, ఖనిజాలు, యాంటీ ఆక్సిడెంట్లు పుష్కలంగా ఉంటాయి. ఇది శరీరాన్ని హైడ్రేట్గా ఉంచడంతో పాటు జీర్ణక్రియను మెరుగుపరుస్తుంది. ఇంకా ఎండాకాలంలో బార్లీ నీరు తీసుకుంటే.. శరీరానికి చలువ చేస్తుంది. బార్లీ నీరు బరువు తగ్గడానికి, కిడ్నీలో రాళ్లు, యూరినరీ ట్రాక్ట్ ఇన్ఫెక్షన్లను (UTI) నివారించడానికి, రక్తంలో చక్కెరను, కొలెస్ట్రాల్ను తగ్గించడానికి తోడ్పడుతుంది. బార్లీలో క్యాల్షియం, ఇనుము (ఐరన్), మెగ్నీషియం, భాస్వరం (ఫాస్పరస్) లభిస్తాయి. అంతేకాకుండా.. బీటా-గ్లూకాన్ ఫైబర్.. కొలెస్ట్రాల్ను సహాయపడుతుందని ఆయుర్వేద నిపుణులు చెబుతున్నారు.
బార్లీ, ఆయుర్వేదంలో యవ అని, లాటిన్లో హార్డియం వల్గేర్ అని పిలువబడే ఈ ధాన్యం మానవ ఆరోగ్యానికి అనేక అద్భుతమైన ప్రయోజనాలను అందిస్తుందని పేర్కొంటున్నారు.
కొలెస్ట్రాల్ నియంత్రణ: బార్లీలో ఉండే పెక్టిన్, బీటా-గ్లూకాన్ వంటి జిగురు పదార్థాలు రక్తంలో కొలెస్ట్రాల్ స్థాయిలను తగ్గించడంలో గణనీయంగా సహాయపడతాయి. ఇవి ఆమాశయంలోని కొవ్వు పదార్థాన్ని బంధించి శరీరం గ్రహించకుండా చేస్తాయి. పేగులలోని బ్యాక్టీరియా బార్లీలోని బీటా-గ్లూకాన్ను ఉపయోగించుకుని కొలెస్ట్రాల్ను తయారు చేయకుండా కాలేయాన్ని నిరోధిస్తాయి. టోకో ట్రైఎనాల్ అనే పదార్థం కూడా కొలెస్ట్రాల్ ఉత్పత్తిని అడ్డుకుంటుంది.
మధుమేహ నిర్వహణ: మధుమేహ రోగులకు బార్లీ ఒక అద్భుతమైన ఆహార ఔషధంగా పనిచేస్తుంది. 5 కిలోల బార్లీ, 1.5 కిలోల చిరుశనగలు, 1 కిలో సోయాబీన్స్, 1 కిలో మెంతులు, 1 కిలో గోధుమలు కలిపి పిండి ఆడించి, ఈ పిండితో ఆయిల్లెస్ చపాతీలు లేదా రొట్టెలు ప్రతిరోజూ తీసుకోవడం వల్ల డయాబెటిస్ నియంత్రణలో ఉంటుంది.
మూత్ర సంబంధిత సమస్యలు: మూత్రపిండాల రాళ్లు, మూత్రమార్గపు ఇన్ఫెక్షన్లకు బార్లీ ఒక చక్కటి ఆహార ఔషధం. బార్లీతో చేసిన రొట్టెలు, జావ లేదా పాయసం తీసుకోవడం వల్ల రాళ్లు కరిగి, శరీరం నుండి బయటకు వెళ్తాయి. మూత్ర సంబంధిత ఇన్ఫెక్షన్లలో బార్లీ గంజికి మజ్జిగ, నిమ్మరసం కలిపి తాగడం వల్ల అద్భుతమైన ఫలితాలు కనిపిస్తాయి. మూత్రవిసర్జన కష్టంగా ఉన్నప్పుడు బార్లీ కషాయానికి బెల్లం, నిమ్మరసం కలిపి తీసుకోవచ్చు. ఇది నెఫ్రైటిస్, సిస్టైటిస్ వంటి సమస్యలకు కూడా ఉపయుక్తంగా ఉంటుంది.
జీర్ణక్రియ మెరుగుదల: జీర్ణాశయ పనితీరు మందగించినప్పుడు బార్లీ సహాయపడుతుంది. పావు కప్పు బార్లీ గింజలను రెండున్నర లీటర్ల నీటిలో కలిపి, సగం నీళ్లు మిగిలేంత వరకు మరిగించి, వడపోసుకుని తాగడం వల్ల పేగుల పనితీరు మెరుగుపడుతుంది.
శరీర ఉష్ణోగ్రత నియంత్రణ, మంటలు: శరీరాన్ని చల్లబరచడంలో బార్లీకి ఉన్న ప్రాముఖ్యత అపారం. చర్మంపై మంటలు ఉన్నప్పుడు బార్లీ గింజలను కాల్చి మసి చేసి, దానికి నువ్వుల నూనె కలిపి ఆ ప్రాంతంలో రాసుకుంటే ఉపశమనం లభిస్తుంది.
శ్వాసకోశ సమస్యలు: ఆస్తమా (ఉబ్బసం)లో కూడా బార్లీ చక్కటి ఆహార ఔషధంగా పనిచేస్తుంది. 6 గ్రాముల బార్లీ మసిని లేదా బూడిదను 6 గ్రాముల పంచదార పొడితో కలిపి నీళ్లతో తీసుకోవడం వల్ల ఉపశమనం లభిస్తుంది.
శక్తినిచ్చే గుణాలు: జ్వరంతో నీరసంగా ఉన్నప్పుడు బార్లీ ఒక మంచి ఆహారంగా పనిచేస్తుంది. బార్లీ కషాయానికి కాస్త గ్లూకోజ్ కలిపి తీసుకోవడం వల్ల వెంటనే శక్తి లభిస్తుంది. వాపులతో కూడిన జ్వరాల్లో కూడా బార్లీని ఔషధంగా వాడవచ్చు. చిన్నపిల్లలకు పాలతో లేదా పండ్ల రసంతో కలిపి ఇవ్వవచ్చు.
తల్లిపాల పెంపు: బాలింతల్లో తల్లిపాలు తక్కువగా ఉన్నప్పుడు బార్లీని పాలతో కలిపి లోపలికి తీసుకోవడం వల్ల తల్లిపాలు పెరుగుతాయి.
చర్మ సౌందర్యానికి: బార్లీ సౌందర్య సాధనంగానూ ఉపయోగపడుతుంది
- జిడ్డు చర్మం: బార్లీ పిండిని, చిరుశనగల పిండిని పాలతో కలిపి నలుగు పెట్టుకుని స్నానం చేస్తే జిడ్డు చర్మం తగ్గుతుంది.
- చర్మ కాంతి: రెండు చెంచాల బార్లీ గింజల పొడికి రెండు చెంచాల పాలు, కొంచెం పసుపు, కొంచెం ఆవనూనె కలిపి నలుగుపిండి లాగా రాసుకుని ఎండిన తర్వాత వేడినీళ్లతో స్నానం చేస్తే చర్మం కాంతివంతంగా మారుతుంది. ఇది ఎక్స్ఫోలియేటింగ్ స్క్రబ్గా పనిచేస్తుంది.
- మృదువైన చర్మం: బార్లీ పిండికి మీగడ కలిపి ఫేస్ ప్యాక్గా వేసుకుంటే చర్మం కుసుమ కోమలంగా, అందంగా తయారవుతుంది.
- పొడి చర్మం, దురదలు: డ్రై ఎగ్జిమా, దురదలు, మంట, గరుకుదనం వంటి సమస్యలకు బార్లీ గింజల పిండికి నువ్వుల నూనె, మజ్జిగ కలిపి బాహ్యంగా రాసుకోవచ్చు.
గ్రంథి వాపులు: మెడలో పెరిగే లింఫ్ గ్రంథులు (కంఠమాల, గండమాల) లేదా ఎడినైటిస్, సర్వైకల్ లింఫెడినైటిస్ వంటి సమస్యలకు బార్లీ గింజల పిండికి కొత్తిమీర ఆకుల రసం కలిపి బాహ్యంగా లేపనంగా పూయడం వల్ల వాపు తగ్గుతుంది. నొప్పితో కూడిన వాపు (కర్ణమూల శోధ)కి కూడా ఇది ఉపశమనం కలిగిస్తుంది.
ఈ విధంగా బార్లీ, ఆయుర్వేద దృక్కోణం నుండి చూస్తే, కేవలం ఒక ధాన్యం మాత్రమే కాకుండా, అనేక శారీరక, సౌందర్య సమస్యలకు ఒక సమర్థవంతమైన, సహజమైన పరిష్కారంగా నిలుస్తుంది. అయితే, ఏదైనా వైద్య సమస్యకు చికిత్సగా బార్లీని ఉపయోగించే ముందు వైద్య నిపుణుడిని సంప్రదించడం ఎల్లప్పుడూ మంచిది.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..