మాలాసనంలో కూర్చుని నీళ్లు తాగుతున్నారా? దీని వెనుక ఉన్న అసలు రహస్యం ఇదే!
మన పూర్వీకులు, ఆయుర్వేద నిపుణులు నీటిని తాగే పద్ధతికి ఎంతో ప్రాధాన్యత ఇచ్చారు. నేటి ఆధునిక జీవనశైలిలో చాలామంది నిలబడి, వేగంగా నీళ్లు తాగేస్తుంటారు. కానీ, ఆయుర్వేదం ప్రకారం, నిలబడి నీళ్లు తాగడం కంటే మాలాసనంలో లేదా పీటపై కూర్చుని నీళ్లు తాగడం ఆరోగ్యానికి అత్యంత మేలు చేస్తుంది. ఇలా తాగడం వల్ల శరీరానికి కలిగే అద్భుత ప్రయోజనాలు ఇవే..
Updated on: Oct 05, 2026 | 3:48 PM
మాలాసనంలో కూర్చుని ఉండి నీళ్లు తాగడం ఆరోగ్యానికి ఎంతో శ్రేయస్కరమని ఆయుర్వేద నిపుణులు చెబుతున్నారు. నుంచుని నీళ్లు తాగడం వల్ల నీరు వేగంగా జీర్ణవ్యవస్థలోకి వెళ్లి మూత్రపిండాలు, కీళ్లపై ఒత్తిడి పెంచుతుంది. అదే మాలాసనం లేదా పీటపై కూర్చుని నీటిని సిప్ చేస్తూ తాగడం వల్ల జీర్ణక్రియ సమర్థవంతంగా పనిచేస్తుంది. ఆరోగ్యంగా ఉండేందుకు రోజూ కూర్చుని నీళ్లు తాగే అలవాటు చేసుకోవడం మంచిది. పూర్తి ప్రయోజనాలేంటో ఇప్పుడు చూద్దాం..
జీర్ణక్రియ మెరుగుపడుతుంది: మాలాసనంలో కూర్చున్నప్పుడు పొత్తికడుపు భాగంపై తేలికపాటి ఒత్తిడి పడుతుంది. ఈ భంగిమలో నీరు తాగినప్పుడు అది జీర్ణ వ్యవస్థలోకి నెమ్మదిగా వెళ్తుంది. ఇది జీర్ణ రసాల ఉత్పత్తిని పెంచి, తిన్న ఆహారం త్వరగా అరగడానికి, పోషకాలు శరీరానికి సరిగ్గా అందడానికి తోడ్పడుతుంది.
మలబద్ధకం నివారణ: మాలాసనం అనేది పేగుల ఆరోగ్యానికి ఎంతో మంచిది. ఈ భంగిమలో నీళ్లు తాగడం వల్ల ప్రేగుల కదలికలు సులభతరం అవుతాయి. ఉదయాన్నే ఈ భంగిమలో గోరువెచ్చని నీళ్లు తాగడం వల్ల దీర్ఘకాలిక మలబద్ధకం సమస్య నుంచి ఉపశమనం లభిస్తుంది.
మూత్రపిండాల ఆరోగ్యం: నిలబడి నీళ్లు తాగినప్పుడు నీరు నేరుగా వేగంగా కిడ్నీల గుండా వెళ్తుంది, దీనివల్ల నీటిలోని వ్యర్థాలు సరిగ్గా ఫిల్టర్ కావు. అదే మాలాసనంలో కూర్చుని తాగితే, మూత్రపిండాలు నీటిని సమర్థవంతంగా శుద్ధి చేసి, శరీరంలోని విషపదార్థాలను బయటకు పంపుతాయి.
కీళ్ల నొప్పుల ప్రమాదం తగ్గుతుంది: నిలబడి నీళ్లు తాగడం వల్ల శరీరంలో ద్రవాల సమతుల్యత దెబ్బతిని, కీళ్లలో ద్రవాలు పేరుకుపోయే అవకాశం ఉంది. ఇది భవిష్యత్తులో ఆర్థరైటిస్, కీళ్ల నొప్పులకు దారితీస్తుంది. కూర్చుని తాగడం వల్ల ఎలక్ట్రోలైట్ల సమతుల్యత కాపాడబడుతుంది.
నాడీ వ్యవస్థ శాంతిస్తుంది: మాలాసనంలో కూర్చుని నీటిని మెల్లగా చప్పరిస్తూ తాగడం వల్ల పారాసింపథెటిక్ నాడీ వ్యవస్థ ఉత్తేజితమవుతుంది. ఇది ఒత్తిడిని తగ్గించి శరీరాన్ని ప్రశాంతపరుస్తుంది. అందుకే ఆరోగ్యకరమైన జీవితం కోసం నిలబడి నీళ్లు తాగే అలవాటును మానుకుని, రోజువారీ జీవితంలో మాలాసనంలో లేదా కూర్చుని నీరు తాగే పద్ధతిని అలవర్చుకోవడం ఎంతో శ్రేయస్కరం.
