రాష్ట్రంలోనే తొలి ప్రైవేటు విశ్వవిద్యాలయం.. మల్లారెడ్డి యూనివర్సిటీ ప్రారంభం..

Malla Reddy University: ఓవైపు కోవిద్-19 కరాళనృత్యం చేస్తోంది. భారత్ లో కరోనా కేసులు భారీగా పెరిగిపోతున్నాయి. ఈ క్రమంలో తెలంగాణ రాష్ట్ర చరిత్రలో తొలి ప్రైవేటు యూనివర్సిటీ ప్రారంభమైంది. మల్లారెడ్డి యూనివర్సిటీ ఈ విద్యాసంవత్సరం నుంచి ఎనిమిది కొత్త కోర్సులను అందుబాటులోకి తీసుకొచ్చింది. మేడ్చల్‌ మల్కాజిగిరి జిల్లా గుండ్లపోచంపల్లి మున్సిపాలిటీ మైసమ్మగూడలోని మల్లారెడ్డి విశ్వవిద్యాలయం ఆడిటోరియంలో వర్సిటీ లోగో, బ్రోచర్‌, వెబ్‌సైట్‌ను రాష్ట్ర ప్రణాళికా సంఘం ఉపాధ్యక్షుడు బోయినపల్లి వినోద్‌కుమార్‌ బుధవారం ఆవిష్కరించారు.

2020-21 విద్యాసంవత్సరం నుంచే ఎనిమిది కొత్త కోర్సులతో యూనివర్సిటీ ప్రారంభంకానున్నదని కార్మికశాఖ మంత్రి మల్లారెడ్డి వెల్లడించారు. కొత్తగా ఆర్టిఫిషియల్‌ ఇంటెలిజెన్స్‌ అండ్‌ మెషిన్‌లెర్నింగ్‌, ఇంటర్నెట్‌ థింకింగ్‌, బ్లాక్‌చైన్‌ టెక్నాలజీ, డాటా సైన్స్‌ అండ్‌ డాటా అనాలిసిస్‌, సైబర్‌ సెక్యూరిటీ, కంప్యూటర్‌ నెట్‌వర్క్స్‌, మల్టీమీడియా టెక్నాలజీస్‌, సాఫ్ట్‌వేర్‌ ఇంజినీరింగ్‌ వంటి కోర్సులు అందుబాటులోకి తెచ్చామని చెప్పారు. రొబోటిక్స్‌, వైర్‌లెస్‌ కమ్యూనికేషన్‌ టెక్నాలజీతోపాటు మెకానికల్‌, సివిల్‌, ఎలక్ట్రికల్‌ ఇంజినీరింగ్‌, ఈసీఈ, కంప్యూటర్‌ సైన్స్‌ ఇంజినీరింగ్‌ వంటి కోర్సులను కూడా అందించనున్నట్టు వివరించారు.