ఇక మిలిటరీ మీటింగ్.. పబ్లిక్ లోకి మళ్ళీ వచ్చిన కిమ్ !

ఆ మధ్య దాదాపు నెల రోజులుగా పత్తా లేకుండా పోయి.. అసలు ఉన్నాడో. లేడో కూడా అని ప్రపంచ దేశాలను అయోమయంలో ముంచి.. మళ్ళీ ఒక్కసారిగా జనాల్లోకి వఛ్చిన నార్త్ కొరియా అధినేత కిమ్ జోంగ్ ఉన్.. మొత్తానికి కనబడ్డాడు. ఓ ఎరువుల ఫ్యాక్టరీ ప్రారంభోత్సవంలో పాల్గొని అందర్నీ ఆశ్చర్యంలో ముంచెత్తాడు.  అది జరిగిన మూడు వారాల  తరువాత.. తిరిగి యాక్టివ్ అయినట్టున్నాడు. మొదటిసారి తన దేశ సైనికాధికారుల సమావేశంలో ప్రత్యక్షమయ్యాడు. నార్త్ కొరియా అణు సామర్థ్యాన్ని ఎలా పెంచుకోవాలన్న విషయాన్ని చర్చించేందుకు వారితో భేటీ అయ్యాడు. సెవెంత్ సెంట్రల్ మిలిటరీ కమిషన్ ఆఫ్ ది వర్కర్స్ పార్టీ ఆఫ్ కొరియా ఆధ్వర్యంలో జరిగిన మీటింగ్ లో తమ దేశం ఎల్లప్పుడూ ఎలా హై అలర్ట్ లో ఉండాలో కిమ్ బోధించాడు. విదేశీ అణు ముప్పును ఎదుర్కొనేందుకు ఎప్పుడూ సన్నద్ధంగా ఉండాలని సూచించాడు. చేతిలో ఓ పెద్ద వైట్ స్టిక్ పట్టుకుని మాస్టారు మాదిరే ప్రెజెంటేషన్ బోర్డు వద్ద ప్రెజెంటేషన్ ఇచ్చాడు కిమ్. తలలు నెరిసిన సీనియర్ సైనికాధికారులంతా 36 ఏళ్ళ కిమ్ గారి లెక్చర్ ని బుధ్దిగా వినక తప్పింది కాదు.